| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2006 年 11 月 9 日 星期四  | |
| 請不要待我好 |
昨晚烏鴉口問我今日會唔會唔知醒起身，我知你其實想搵個藉口搵我，其實我都覺得我係會唔知醒架！不過我唔想你打比我叫我起身，我唔想習慣左一ｄ野，然後有一日突然之間唔同左，我會好唔開心，覺得失去左ｄ野。
就好似一個出生係貧困國家既小朋友，佢可能會覺得自己生活得麻麻地，會想可以生活得好ｄ，佢係垃圾場上面生活仍然會有笑容，唔會想死；然而當你送佢去到香港無憂無慮咁生活一段時間之後，要佢再番去佢既國家生活，佢好可能寧願死，番到去垃圾場都唔會再展笑容。有ｄ野就係番唔到轉頭。
我無你叫我起身唔會有咩大不了，但係相反，當我習慣左你叫我起身，而突然有一日此情不再既時候，我會好痛苦，所以我唔想你對我好，甚至我怕你對我好，但係唔通要我無啦啦同你講，你唔好對我好咩！如果我可以灑脫ｄ既話，就好勒！！或者我可以得到更多既幸福，不過，其實我已經好幸福。
|
| 刊登時間︰2006-11-09 07:42 PM [ 訪客留言(0) ] [ 編輯日誌 ] [ 分享至FACEBOOK ] |
| 2006 年 11 月 8 日 星期三 | |
做show  |
今日幫嬸嬸做show，以前我比較唔鍾意人地老馮咁叫我幫佢做生意，你搵到＄分比我咩？我做咩要做義工出＄又出力咁同你做？但係而家又開始無咩計較，雖然都係果隻，好鬼老馮咁。
『聽日化少少粧，著靚ｄ。』估唔到呢個華少同kinki講既對白，會由嬸嬸同我講。我更加唔明，點解佢地對我咁無信心，好緊張咁你咩咩咩，你咩咩咩，仲有ｄ咩要求呢？！我唯有答：哦！得架啦！哦！得架勒！好似唱歌咁，都彌補唔到佢地既信心。
咁樣攪個show我估成本唔平，但係收益呢？！我又唔見得好鼓勵到ｄ客買野囉，佢地只係想黎食野同埋抽獎，爭左ｄ野，應該向賣樓既人取ｄ經，做show應該有鼓吹購買慾既氣氛，要比人覺得你今日唔到／唔買會好蝕抵，我好自然就開始諗如果我攪，我應該點樣攪，講就好易，做就有ｄ難，尤其係B2B既生意。
對我黎講呢！我既崗位係好簡單既，好似ｄ攤位遊戲咁幫人整指甲花，其實我都整得幾求其，不過都好靚啦！起碼有人咁講，仲有ｄ話估唔到睇落咁兒戲既野可以整得咁靚。完左之後要趕交場，執好多野，為人為到底，我盡人事幫佢地搬過隔離房等佢地再慢慢執，真係好盡人事架啦，佢地個個都換番衫執野，得我一個著住件瑪麗蓮夢路裝搬野呀！唔知係咪因為件瑪麗蓮夢露裝，哈哈，搬親重野都有人行過黎話幫我，呵呵！
今日整日都好鬼social，包括走果一刻，所有野搬晒過隔離房之後，大家都好鬼攰（包括我），係我早ｄ離場既當時比人串。
當大家都抖緊既時間我同各位講：『我走先啦！』
老闆同老闆娘等都好正常咁回應，今日唔該晒，byebye等等。
點知偉文好無夸咁：『唔好走住得唔得。』
我好自然咁答：『我約左人呀！』
死仔Chris就玩篤爆：『嘩！你出絕招呀，約左人。』
大佬，你唔體諒下我，都體諒下我套瑪麗蓮夢露裝啦（我心諗），但係我個人就仍然好大方咁笑住離場，其實全日都係呢個Social式既笑樣，以前我好憎咁樣，所以我從來都唔會Social，我會覺得自己好假，但係而家突然覺得，Social係正常不過既事，尤其係工作上，靚靚既樣同埋笑容係會令工作更順利架！ 今日至突然覺得我個外表係上帝既恩賜，我應該好好善用，以後唔好咁Cool同呆至得。 |
| 刊登時間︰2006-11-08 09:18 PM [ 訪客留言(0) ] [ 編輯日誌 ] [ 分享至FACEBOOK ] |
| 2006 年 11 月 7 日 星期二 | |
脫離不良情緒的控制  |
呢個係我自己溶滙貫通左既方法：
幻想腦中產生一個以上的自己身份，能夠攞脫現場的不良情緒。
先想像自己睇住自己既狀況（停留十秒），再想像企係自己旁邊約十呎既位置，睇自己、面對既人同週圍既景物。
再返回自己本身，然後再抽離去到約十呎既位置。
之後，回憶一次唔開心既經歷，當時既環境、聲音同埋自己既感受，然後抽離自己至三十呎，睇番當時既你，注意內心感受的減輕，再將自己慢慢不斷抽離現場，例如慢慢往外飛走，當時既景象不斷縮細。當心情平靜時，重返現場，反覆做以上所講數次，直至心中釋然。
再想一ｄ無關痛癢既事(例如今晚食咩黎之類）。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
而家有兩個自己，一個係情緒既我，一個係企係另一處的自己（智慧既我）。
首先，智慧既我睇住情緒既我既情況，環境。智慧既我感受一下當時睇到情緒既我既心情。
然後，智慧既我睇住平靜既我既情況，環境。智慧既我感受一下當時睇到平靜既我既心情。
禮貌地邀請情緒既我離開一陣，換上平靜既我，注意平靜既我既外表、表情、姿態同情緒既我既唔同。智慧既我教導情緒既我學習平靜既我的情況，平靜既感覺係咪好好多？感受平靜既我平靜既感覺在內心湧現。
當情緒駕勞左我，不能自己既時候，可以試下以上方法，雖然有ｄ似精神分裂，自言自語，但係Work架！ |
| 刊登時間︰2006-11-07 10:12 PM [ 訪客留言(0) ] [ 編輯日誌 ] [ 分享至FACEBOOK ] |
| 重整生活 |
今日開始番新工啦，禽晚都早左瞓，好攰，真係好攰，瞓左一個鐘就比人地ｄ笑聲嘈醒左，一醒就想喊，作死！
然後又好困難咁瞓番，係我個人立場呢，其實想笑就笑，想喊咪喊囉，不過如果會影響生活既話，就要諗下方法控制下，我用左一個幾行得通既方法，一陣再分享。
禽晚有人十二點打黎問我係咪瞓左，我今朝起身收到既時候第一個反應係：我個夜鬼角色的確好深入民心！！ 我係瞓左呀！不過一個鐘後比人笑醒左勒！
由今晚開始呢！新戲上演，雖然未有劇本，不過照計無夜鬼呢個角色架勒，編劇果個記住唔好玩我啦，我呢ｄ性格演員黎架嘛，應該可以演活多個角色架，比ｄ機會好喎。
其實想做番個正常人好耐勒，要早ｄ瞓早ｄ起身，唔好做埋ｄ無為野阻住ｄ時間同思緒，仲要靚靚，唔做得長崎樣穗。
生活，還是簡單ｄ好，所以我都重整一下呢個網頁，我想可以簡單一ｄ。
|
| 刊登時間︰2006-11-07 07:13 PM [ 訪客留言(0) ] [ 編輯日誌 ] [ 分享至FACEBOOK ] |
| 2006 年 11 月 6 日 星期一 | |
| 閒人行人 |
因為要出去簽約，所以順便做左好多野，終於都去攞本護照，本來想去報名，不過報唔到，行左好耐街，又買左ｄ野，打左比個朋友仔煩左佢好耐，真係魔鬼黎架！又叫人唔好讀書，又叫人飲酒，好在你唔得閒理我，我都唔得閒等你理。
仲有去左唱ｋ，唱左好多好多歌，乜而家ｄ新歌全部都係ｋ歌黎咁既！都去左同某人第一次拖手仔既地方，無諗起關於你既太多野，我諗我真係放低左你！You are sometimes on my heart, sometimes on my head, but never on the desk.呢個地方實在太舒服，舒服得好想係度好好咁瞓下覺，難怪我地以前成日都去，希望我今晚可以想著這種感覺，舒服咁恬睡，就係呢個舒服到不得了既環境，我諗起一首歌，慢慢咁唱住呢首歌，心好平靜。
神！你在掌管
我望著前路，是迷亂悵惘一片，
幾多挫折打擊，未明白造物旨意。
我踏著細沙，在海邊走過，
晚風中心裡聽你聲。
聽颯颯海風，在寧靜細語低訴，
眺望滔滔海波，在無言默默宣告。
主浩大能力，海天皆響應，
每一刻變幻亦在你的旨意裡，
神！你在掌管時間萬有空間，
在你的手裡一切定有時。
神！我的一生，神你定有預備。
莫計得失只想你來導引。
|
| 刊登時間︰2006-11-06 11:04 PM [ 訪客留言(0) ] [ 編輯日誌 ] [ 分享至FACEBOOK ] |
| 重新開始 |
感謝主。
一路都好窮，考完試之後其實好急切要做既就係搵工，不過都係去左玩同埋無心機啦，考完試三日，我仲係玩緊既時候，半年前果間Agent就第一次介紹工作比我勒，雖然只係Temp job，不過做住先都好啦！
聽日就開始番工，時間真係好配合，好好，我除左覺得要感謝主之外，真係無其他野想講。 |
| 刊登時間︰2006-11-06 10:13 AM [ 訪客留言(0) ] [ 編輯日誌 ] [ 分享至FACEBOOK ] |
| 2006 年 11 月 5 日 星期日 | |
| 大掃除 |
考完試幾日，今日至真真正正乖乖地係屋企唔去街街，橫掂都早左起身，就執下野，間屋真係好亂，好想執到佢整整齊齊，但係人大左之後，真係唔係"野"少架！
掉左一大袋，都唔覺得屋企ｄ空間有大過！真係想掉埋果十幾廿本黃頁，如果我確定唔再讀書的話，真係好阻定，佔左我三分一個書櫃啦，無左幾好呢！
執左半日，我個書枱都係成枱野，都唔知可以放係邊添，好鬼攰＋無心機添。今日見到平時好鍾意食既野，都唔想食，唔可以比自己咁樣，岩岩至脫離柴枝行列，我唔喜歡無謂既骨感架。
除左屋企要大執之外，我個老年殘樣都要執執佢，有時都會諗，讀書讀得咁辛苦，到底為咩呢？！好好地一個女仔攪到殘成咁，為咩呢？！我係有ｄ野想做，但係一路去行呢條路既時候，又係咪可以到達，去到想去既地方呢？！要知道我從來都係迷路王。
一諗呢ｄ野就會諗起伍牧師，有日講道時佢問人咩可以係自己擁有既，＄可以比人打劫，打仗一下之間無晒，權力地位都如是，有人話智識就係自己擁有既，別人攞唔走，然後，伍牧師就話：呢個世界有扑頭黨，扑一扑你就咩都無啦，ｄ後生既仲衰，唔駛比人扑頭呀！失一失戀就已經乜都痴晒啦。我記得我聽到果時笑左好耐，真係好鍾意伍牧師。
其實我有ｄ羨慕果ｄ知道神心意既人，既然都知道了，或者跟住做會好辛苦，但係最起碼你知道你走對左路，而我呢！我一直係度問路，我幾時至可以放低自己，我既驕傲，我既橫蠻．．．都要對自己黎個大掃除至得呀。 |
| 刊登時間︰2006-11-05 04:49 PM [ 訪客留言(0) ] [ 編輯日誌 ] [ 分享至FACEBOOK ] |
| 權能時間 |
今朝係做權能時間既時候突然醒左，真係好突然果隻，一醒就醒晒果隻添！我就好自然咁起身開電視睇，今日有張德培既分享，佢講佢一ｄ有關同神既事，佢話佢都有問神，點解佢要生係中國人，點解佢得5尺9，佢話係神讓佢係1989年，天安門事件發生既時候，讓佢可以得到賽事既冠軍，係中國人好唔開心既時刻，有番樣野令中國人開心。哈！我都從來無將呢兩件事關連過。
之後，牧師今日要講既道係五餅二魚，一個耳熟能詳既事件，不過有一個我無諗過既意思。五千個人（還未包括婦女、孩子），全都吃飽，還有餘。牧師好攪笑咁係禮堂上拋出五個麵包，分比台下既會眾，叫台下既每人分一小部份，睇下可以分到比幾多人，講明唔係想做神蹟，我諗係想令大家好好咁記得呢堂想表達既經文既意思，不過我又真係睇得好好笑。
牧師講到，神叫門徒給眾人吃的，然後門徒就去呢五千人當中，收集到的只有五個餅兩條魚，耶穌就攞住呢五個餅，兩條魚，向上天感恩，牧師話，門徒睇到呢五個餅係缺失，五個餅點可以吃飽五千個男人（還未包括婦女、孩子），但耶穌睇呢五個餅係擁有的，我地將我地擁有的向主感恩，最後吃飽了所有人，還有餘。
牧師最後話，當我地好似耶穌一樣，對我地擁有既感恩，就足以抵擋小信（信心不足），我真係感恩，呢個問題我禽晚至問完，今日主透過牧師為我好好咁解答了。
禽日我至同小肥講開，我問佢有無打算返番教會，因為之前佢滿心歡喜咁同我講佢教會既人同事，真架，係滿心歡喜！佢話因為番得太早，呢個係好大問題，哈！對我黎講，呢個都係好大問題，不過今日聽完呢個講道我就諗，我睇我既時間係一個缺失，但其實佢可以係祝福，雖然我都唔知我係咪真係有呢個動力，改變我由細到大既習性，不過最起碼我應該禱告，我相信主會幫我，都會幫你，食物既需要主知道，瞓覺既需要主都一定知道。 |
| 刊登時間︰2006-11-05 11:31 AM [ 訪客留言(0) ] [ 編輯日誌 ] [ 分享至FACEBOOK ] |
感謝主  |
禽晚心情唔好，跟住又想攪ｄ相，攪到個人都忟忟地，心情仲差，就熄燈瞓覺，熄左燈至諗起，我未睇聖經，唔記得由幾時開始，我開始每晚瞓覺前都會睇一篇經文至瞓，係好自然既事，某程度上比起仲番教會時認真添，因為唔單單既睇，仲會試下諗。
橫掂都熄左燈，心情忟到上左天花板，就同自己講，今晚唔睇勒，無心機睇黎都無謂，就上床瞓，都係係度典，然後腦度閃過呢段對話：『你愛佢比愛主多嗎？』（佢我諗係泛指我當時既一切思緒）我好果斷咁答：『唔係！』然後我就起身開燈做我每晚都會做既野，今次睇到馬可福音第九章。
裡面講到耶穌係彼得、雅各、約翰面前改變形象，其實我有好多疑問，點解要改變形象？然後裡面話佢地甚是懼怕，我又係度諗，點解明知係以利亞同摩西都要怕？雖然我有好多疑問，不過我唔會急住要知答案，因為我知道當係時候的話，我自然會明白我所唔明白既。
我再一路睇落去，睇到害癲狂病的孩子，我記得我以前有試過研究呢段經文既意思，但係果個意思我已經唔記得晒，一ｄ印象都無添，繼續讀到在信的人凡事都能，好多時讀到呢度都會喊，因為我一直都係我信，但我信不足，求主幫助既人，至於我點解咁無信心，我都唔明。
繼續好專心咁讀，本來心實既感覺慢慢放開了，舒服晒咁，係我讀緊聖經既時候，心已經好平靜，眼尾有一道好白既光，初頭無理佢，但係佢越黎越光咁，唔通係主耶穌？我心裡不禁咁問，然後忍唔住望下，光就消失了，但係我忽然間有ｄ驚，就好似我之前問門徒點解會驚一樣，原來就算我知道係主，都會有種莫名既懼怕，真係唔明點解，好奇怪，但係我仍然滿心歡喜咁求主與我同在，直到我重複咁睇完第九章，直到我好安然咁住入夢鄉。
感謝主，就好似呢首歌一樣－『打從心裡暖暖的，祢比自己更重要，我也希望變更好。』哈哈，呢首本來係好普通既情歌，不過我聽起上黎就唔同左啦！
|
| 刊登時間︰2006-11-05 10:48 AM [ 訪客留言(0) ] [ 編輯日誌 ] [ 分享至FACEBOOK ] |
| 甩難 |
今日約左嬏嬏，佢話要教我點整手指甲喎！跟住遲幾日幫佢做show時同ｄ客整。去到至發現其實係ｄ傻ｂ野，似乎佢地對我好無信心，咁簡單，我真係好 咩！！不過後尾佢話另一個人學左好耐喎！下．．．唔係掛。
跟住發生左ｄ好橋既事，首先因為又去朗豪坊睇戲，我又係果度上上落落咁會合我的朋友仔啦，係佢等我，我又搵佢既時候，我見到維維，維維同紫爪行街街囉，唔係我盲中中既話，我地應該唔會遇上，真係橋。
食完飯上朗豪坊，又盲中中咁上多左一層，都係因為咁，我至終於同左無鬚既龍貓合照。之後睇左套充滿情慾但係說教意味濃厚既戲，有好多場我根本唔認得尊尼個樣。都唔算會令人瞓覺，不過如果事先知道係咁既話，我係唔會有睇既意圖或企圖囉。
然後去左飲野，玩左ｄ只會係cafe好無聊既時候玩既野，証明我今日既運氣係OK好啦，十居其九靠估都得到好報。玩得都幾開心，有時都幾難得咁樣玩玩架，本來想早ｄ走，因為間舖頭十一點幾就得番我地一台客，但係想走果時老闆又叫我地坐多陣，唔係佢地無野做喎！咁我地又坐多陣啦，都係因為咁，我走果時又撞到人，我下意識咁望佢隻手，都下意識咁覺得佢望我同邊個一齊，不過最可能係果一剎那佢呆到根本唔知我係邊個，我真係有ｄ嬲，心都實埋，有ｄ被出賣既感覺，你做咩要衍我？！一早都同自己講算啦，只係無諗過會兜口兜面見到，朋友都無得做。（如果你睇到既話．．．．不過我諗你都唔會睇到。）
番到去某人又搵我，雖然我心知你唔係我杯茶，但係我真係想飛身撲埋你度啦！（哈哈哈，不過呢ｄ我一定唔會比你知架！）
|
| 刊登時間︰2006-11-05 03:25 AM [ 訪客留言(0) ] [ 編輯日誌 ] [ 分享至FACEBOOK ] |
« | 22 | 23 | 24 | 25 | 26 | 27 | 28 | 29 | 30 | 31 | ... | 71 | »
|
