為左要應付小測，今日全力以赴左半day，我都仲係用最需要時間既方法溫習，成日都覺得自己好，永遠的事倍功半，還好的是我有的是時間，都係因為咁，懶懶閒地溫過下就出發，唔知係咪係車度係咁比佢搖，考完之後除左隻手勁痛（我懷疑我就黎有學業病，即係類似網球手果ｄ野）條頸都唔係幾妥．．．。

今日既試呢，比想像中好，因為佢都比晒tips既，仲寫埋係題目度，總之唔駛背啦，淨係解釋就得，我以為我預備得少，點知佢問既仲少，如無意外，又順利過關。

一係無無聊聊，一係應接不暇，世事有時就係唔到你想，本來之前諗住得閒ｄ寄下ｄ求職信出去，諗住唔駛咁忙既時間見下工啦！點知就梗係遲遲都唔打黎，就係我又測驗既時候約見工，頂！我都未溫書呀！

次次諗住佢早果ｄ佢就遲，諗住佢遲果ｄ就早，無乜準備果陣就鬼咁多野問，有ｄ準備既時候咩都唔駛點問，真係玩野！！都唔知係我忙定你忙，唯有平常心面對，比ｄ亞嬌精神，祝福下自己啦。

一直都唔敢問既野，到而家都係無問，亦都無謂問，只係睇完你打既野之後，突然心裡閃過一個念頭，你係咪打算離開勒？？其實你明唔明點解？就好似別人問你點解既時候，係咪都過唔到自己？

要離開的話，就即管離開吧！爭扎只是苦了大家又於是無補的事。任何事都會過去的，他朝就會明白，今日看來難過的決定，其實所有人都獲益，只要大家都堅持往前走。

禽日去左個地方見工，真係講你都唔信，其實我自己都唔係好信，本來諗住放ｄ相上黎，點知個software無啦啦用唔到．．。

係去之前，其實我對呢份工都有正面想法，不過見完之後就有ｄ猶豫勒，真係有辡有唔辡，時間同路程係我最大既問題，都幾死穴下，番得早啦，比我以為既番早兩個鐘，早起係我既大忌呀！咁五天工作啦，但係要番勞工假喎！而且人工仲麻麻地！本來諗住我會鍾意個環境既，但去到又同我想像既有ｄ分別啦，等車又等到我忟忟地，仲要諗下如果唔係好似而家咁好既天氣會點呢！

講左好多唔好既，又講下ｄ好架啦，最好既係我可以收＄地學我本來要比＄學既野，而且我覺得呢個機構應該可以有更大既發展空間，或者，我可以參與下呢個發展，可以用下我個豬腦、豬手同豬腳，睇下到底我係咪可以學以致用(基本上，管理學係可以放係任何地方用，只係有無人願意放手比隻豬用下個豬腦者．．），呢度我覺得或者有機會可能可以做下，而呢個可以做下都係我對工作上既期望啦。

至於福利其實都ｏｋ架！仲有番學，又唔可以話好有影響，因為我應該都趕到番學，但係又唔係無影響喎，因為我禽日係裡面玩左半日之後用左好多時間搭車，個人都有ｄ唔舒服，同埋一諗到要夜瞓早起就．．．。

本來我以為會無人見呢ｄ工，不過去既時候又發現原來係有架！但係我諗競爭者無出面咁多啦！本來話星期五至覆，我心諗我都仲有ｄ時間諗諗佢，又或者呢排努力ｄ搵下其他工，不過今朝佢已經狂打黎(都係second in 者），都唔知點好，唯有唔聽住，點呢點呢．．點解我成日都係一股作氣咁去，去到就洩晒氣既，明明原來好想，就得到既時候又唔想，但係到無既時候又想過，好多時都係咁架喎！都唔知咩人黎架．．。

想不到到了學期完結之時，"要求"發育似地長高了不少！就像中學時期，過了一個暑假後再見到同班長高了的男同學時一樣（嘩！食咩黎呀！乜高左咁多既！）

我都唔知食錯左ｄ咩，今日收到測驗卷既時候都唔係咁高興。都話唔識做架啦！！＜－－－呢句說話即時湧起心頭。不過再諗深一層，好似上個學期我只係攞多呢個分數幾分，我已經莫名地暗喜架喎！！但係兩科係無得比架，因為呢期考既都可以攞滿分既，同寫野唔同，就係因為咁，我竟然想攞晒滿分，結果咪自討没趣囉！連做份功課都會因為小左一個"-"符號無左十分而梗梗於懷，就係因為呢十分，我無左唯一可以攞到一百分既可能性，亦都因為咁，呢期一直都覺得自己好差好差，要追番ｄ進度既慾望就像直昇機空降下來。（蕉蕉蕉．．澎！！BI BU BI BU．．）

今個星期又小測，没丁點頭緒，亦還未開始抓頭緒（ｆ），需要一點動力，睇黎要收集下ｄ無元氣油至得啦！（貪Gas)。

今日小鳯結婚，約埋小肥小草一齊去觀禮！我準時到逹，但肚仔餓，就打比佢地，原來佢地都未到，於是我就去左當當食早餐，然後小肥黎，又因小草未到，又去左買早餐，話口未完小草到左，於是橫掂都等小肥，就又去買早餐食勒！！好似好多時間咁，小肥話因為約我約早左，驚我遲喎！咁似乎真係約早左好多喎！我睇住ｄ時間一路咁過．．．最後，我地都係遲！！去到岩岩開始左，其實可能唔關我個人事，遲到根本係我地呢個組合既習性！

為免尷尬，都無入到去觀禮，只係門口影左ｄ相，咁耐無見過小鳯，佢都無咩點變咁，只係覺得當新娘可以再靚ｄ，不過我諗可能佢會覺得唔慣啦，至於吳生呢．．．穩重左好多呀。不過除左外表，我都係覺得佢無咩變，佢地既相處比我既感覺都係咁。

祝　你地幸福快樂啦，就好似童話故事既結尾咁．．．快快樂樂地生活下去。

恭祝完一對新人，跟住就同小肥、草、劉來閒逛+閒聊，好似都好耐無咁一齊"閒"過，睇住小草同劉來對話原來好攪笑，雖然內容好""，不過咁樣都幾好吖，望多兩眼，仲有ｄ似樣添，最初識劉來既時候總係有ｄ抗拒，唔知想點咁，不過而家反而覺得佢都唔差吖，起碼對小草好似幾好！

番到屋企睇番個考試時間表，噢，我31號考最後果科，你估我可唔可以好早溫好書呢？！我驚我做姊妹果日會因未溫好未而心情煩躁喎！！咁點好呢．．．。

馬大為事忙亂　（路 十：38-42)

今日番學陳博士講左個好攪笑既笑話比我地聽，我又講下比大家聽啦！

本來係講緊折舊，咁陳博士就用買車黎舉例勒，講到佢數年前買左架車就開始講題外話．．．

「咁前幾年我買左架車，BMW大家知佢係咩啦，好出名，我唔會買既。

　點解？B-M-W喎！

　．

　．

　．

　咪即係Break My Window囉！叫人吓．．．我唔會買既。

　我買左呢架KIA，韓國車黎既，不過買完之後發覺仲慘，過左無耐我就賣左出去勒，真係唔賣唔得呀！

　知唔知點解？K-I-A喎!

　．

　．

　．

　咪即係Kill In Accident囉，買架車番黎．．．吓！真係即刻賣番出去啦！』

聽完我即刻K-I-L左，唔知？笑死左呀！

今朝一早就醒左，呀！每次係未應該瞓醒既時候起身，個鼻就會不由自主地．．乞．．乞．．乞．．嚏））））．．頂！

唔知做咩好，於是又開左部腦周圍游，心裡面有好多咒駡（無咁毒既，不過都係覺得人地唔好既說話啦！），然後忽然想起一句話：『且看駡人者，人亦駡其人。』真係好岩，我心裡面一直話人地唔岩既時候，我又做過幾多好岩既事呢！

一直係度猶豫，係咪應該番教會呢！又想起當初既一句話，到底　祢叫我番黎係咩意思呢？路仍是繼續地走，有幾多小朋友跌倒既時候會撇開父母既手走左去？！小朋友始終會回家，只係．．．點解唔係而家？好多個

祢永遠係我最好既解題專家，路還是繼續走，漸漸明白，要去面對糟糕的人的理由，佢地就好似一面鏡，可以令人看得清自己，其實我一早就應該明白，其實聖經一早就記下了，其實我看了多次，都聽了多次，只是我看也看不見，聽也聽不見，也不明白，然而，誰知我可以成為麥子？誰知我不是稗子？

聽道而不行道的，就像人對著鏡子看自己本來的面目，看見，走後，隨即忘了他的相貎如何。（雅－23~24)

爺爺對孫兒說：「孫兒呀，我裡面有兩隻小狼經常打架，一隻兇惡兼愚昧，一隻良善兼有智慧。」孫兒聽後便好奇的問：「爺爺，那麼最後是那隻小狼打贏了？」爺爺望著孫兒，沉思了一會，回答道：「是我經常餵飼的那隻。」 

想講，但怕你忙了；想問，但怕你煩了；想知，但怕幫不了；原來我會擔心，願你一切安好。

希望我的朋友們都知道，其實每當知道你們有問題的時候，我都好希望可以為你地做一點事，只是安慰人既說話我根本就搞不懂，唯有默默地為你們禱告，只是原來有時連該怎樣為你們禱告都搞不懂。

就想起聖經裡的一句話：要愛人如己。

我連自己都不懂怎樣愛自己，又怎樣去愛別人呢！

當我遇到問題的時候，我都很少跟自己說些安慰話，有時連怎樣為自己禱告都搞不懂，但可幸的是，　祂懂，願　祂的慈愛臨到受傷的心靈，願　祂的幫助臨到無助的人，願　祂的力量降於乏力的人，願　祂常與眾人同在。