前幾日收到個電話，一位女子的聲音，開場白大約如下：

女子：我係．．．你記唔記得好耐之前見工見過兩個中國籍女子呀？

本人：呀!.....記得。(形容咁得意既..)

女子：因為我之前放左假，所以而家至聯絡你，其實我地都唔係好等人用．．． ．．．

本人：係。（咁即係點呢．．．）

女子：如果我地約你second in，你想唔想黎呢？

本人：好呀！（呢位小姐真係得意．．．）

女子：之前你黎果度唔係你番工果度，咁今次約你去番另外果度見好無呀．．． ．．．

本人：（又講埋ｄ無為野．．．= =")

於是第二日，我就去另一個地方見工，咁岩就有人入左去該單位，係一個好細既地方，同上次好唔同喎．．．

本人：我搵ｘ生見工架！

ｘ生：呢邊吖！（帶我入去既同時，其他男子都想跟住入黎。）

ｘ生：你地唔駛入黎架勒．．．

男子：唔係呀．．．

ｘ生：你地唔駛入黎呀！

男子：咁．．．咁斟茶都要架．．．

ｘ生：唔駛呀！你地唔好阻住啦，出番去！

本人：

然後就係傾計咁講番上次講過既野，問左一輪，我覺得佢已經主觀地覺得我ｏｋ，不過只係佢主觀既意願。見工就係咁，有ｄ人望完覆歷覺得你唔得，就再講咩都唔得，有ｄ人望完覺得ｏｋ，就咩都唔駛點答就ｏｋ，好主觀。

最後ｘ生話呢次主要係比我望下間公司同埋問佢野，唔係佢見我喎！咁係咪即係會請我呢？但係夜晚又打黎問多次番學既事，其實我已經開始係見工既時候淡化番學既野，有時會諗，番學番到我咁值唔值得，不過有時ｄ野又係好奇怪地唔應該問值唔值得。

今日同禽晚突然間唔開心，好想喊！

因為今天請假的關係，昨晚加班，臨收工的時候找到豪少陪我食飯，哈哈！真好．．。

又到尖咀，途中見到一間叫正宗拉麵的店，就想吃拉麵，但豪少說不好吃，於是改到札幌，我也差點忘了這間小店，好味道，大家的話題又開始說起拉麵，原來豪少都知道有間"爵士"，總有一天我要全叫餐牌內的食物(拉麵除外），哇哈哈！

　牛油拉麵　　螃蟹拉麵

 蝦餃子＋沙律

之後就去左甜蜜蜜食甜品，不過我覺得唔好食既，ｄ梳乎里濕又唔香，雪糕唔滑，似心太軟既朱古力唔知咩好硬，我覺得我同熊熊上次整得好味ｄ囉！不過賣相就好ｏｋ既。最好味既係個朱古力醬，點個酸酸既士多啤梨就岩岩好．．。

今日又想試下整燉蛋，不過徹底失敗，本來食譜話要中慢火整，但亞媽話要超慢火，咁就超慢火啦！整左我就入房玩，數分鐘後出黎望到變左大火，原來亞媽又話細火細得滯吹熄左，但係唔可以大火整架喎！望到都老晒，但係裡面未熟，不過都無晒心機勒，我下次要亞媽唔係度既時候試下整至得！

到底點樣至整到好滑既燉蛋呢！

呢幾日都好鬼攰，我記得前日番到屋企都九點，食埋ｄ冷飯菜汁沖埋個涼就十一點勒，即瞓！第日都係好不情願咁起身，星期五番到公司都好攰，拍七話一睇我個樣就知我好眼瞓，我話唔係眼瞓，係好攰，對腳仲不其然咁痛，不過都係要做，好多野做，好多無為野做。

本來攰到神智不清咁都唔係好想出街，但係約左好多次，又唔去真係唔知幾時再見咁！不過見到大家都好開心，都係一樣咁攪笑，一見到就講我個頭，原來我地有成大半年無見過，真係唔講唔知原來我地約左咁耐勒！

番到屋企又係攰屎左咁，今日係屎左咁，好攰好攰好攰呀！！！！！激氣！

本來話禽日會出糧，點知又遲，全公司又係我一個係咁，今次關間銀行事，但係我打去銀行又話唔關佢事，原來係誤會，入得唔岩，本來以為今個月會早ｄ，點知又係遲，我又係趕唔到找數，我真係好想告佢，等佢比番ｄ息我．．。

今日公司放假，我心情又好，身體又唔錯，於是就實行去海邊既計劃。原本想去西貢，不過覺得好遠，有ｄ懶就諗下不如落樓下行，因為好熱好晒既關係，等到六點至出門，行左個幾鐘，影左好多相，不過都未行晒就．．．有個傻佬搵我，哈哈！又問我要唔要荔枝，都無咩理由唔要，只係專登攞黎好似有ｄ唔好意思者。

於是番屋企食飯，之後出街食飯。比我老點之下，由本來去市中心變左入元朗，好難得有人識左我咁耐都仲對我有期望，不如下次叫我認路訓練下我啦！如果唔怕失望的話。係唔知食咩好既情況之下入左元朗，然後我諗起大榮華，隨即又諗起我都係唔認得路去架，點知話口未完，大榮華三個字就係面前出現。

不過今次到佢老點，無胃口又叫左好多野喎！邊有一個食左飯既人仲食得多過未食飯果個既呢！攪到我好大食咁．．。番到屋企攪呢樣攪果樣攪到兩點好想瞓，點知瞓到三點都未瞓得著，就起身睇！

德國對意大利，我仲以為係法國對葡萄牙添！估唔到又超好睇喎，快上快落，時間過得特別快，九十分鐘都係0:0，係最後既兩分鐘，我仲對德國好有期望，點知臨尾香，老實講，都係意大利踢得好ｄ既，佢地輸左都係唔抵ｄ既，但係爭一分鐘就可以十二碼，咁輸法我又覺得有ｄ心翳囉！我開始明白點解ｄ球迷睇完自己捧果隊球隊後會失眠勒，原來個心真係會翳架喎！

六點又上床轉左好多個圈，約七點起身番工，約七點放工，本來諗住比埋飛winkwink，不過佢又要我等！我真係等唔到，又眼瞓又肚餓又好攰，我驚我撐唔到番屋企，等左半個鐘走人，今次真係等唔到一個鐘呀！我發覺好似同親個傻佬食飯果晚都瞓唔著，但係我諗唔起係咪次次都飲左茶，唔可以再係咁通頂！！遲早。

我好得閒!

係27號考完試之後，我其實十分極之很得閒，其實未考都已經好得閒．．呵呵！

於是28號好得閒咁搵個朋友仔同佢慶祝生日(佢叫我唔好話比人聽喎！），佢得到一個好難忘既一日，因為佢約左我之後佢就唔見左個電話勒！等我打極電話都留言，嚇得我以為咩樹添！都話嫌棄佢佢會走架啦！又一次証明呢個係事實．．呵呵。就咁，無啦啦通頂唱ｋ，唱晒全部關淑怡關於我演唱會，跟住係醫神，然後草蜢，再者Beyond，最後睇埋rain既演唱會，激呀！不過到離開時，朋友仔都仲係唉緊！

29號本來諗住食蟹，但係不了了之左。

30號約左Penny睇四條腿，佢話係朗豪坊睇，朗豪坊係一個頗令我討厭既地方，不過似乎佢好想去果度睇我就無出聲啦！點知佢約我6:30，6:28分話比我聽遲，一遲就一個鐘有多，呢排梗係等神纏身，我係個極之討厭的朗豪坊不停兜圈，仲攞住極為重既包伏！= ="，由地下上到十三樓，再由十三樓去到八樓UA，已經無晒後排既飛添，之後佢打黎話係地下，咁我就由八樓落番地下搵佢諗住食飯算啦，點知佢話已經買左飛，就黎開場，我地就由地下上番八樓，睇完戲再上十二樓食飯，之後落左地下，詣問處話攞車要先上四樓，辦完手續落番地下五樓攞車，終於我經過左十八層至逃離呢個鬼商場。

1號，出去同嫲嫲賀壽，唔知係咪唔受得飲宴既食物，定係我暈車浪呢！好多時出去同佢地食飯後番屋企都想嘔，真係好辛苦，不過我咁講又比亞媽鬧。

2號，約左小肥番教會，食完飯都無咩做，不過天氣好好，唔去出海係晒囉！唔知啫喱玩得開唔開心呢！我都好想出海呀．．。

3號，今日公司放假去廸廸尼，我唔駛番工．．呵呵！本來諗住自己去海邊行下影下相，不過可能凍病左，起身就開始傷風。禽晚我真係比個冷氣凍醒左，蓋住張被係度諗，我係咪無蓋到被呢？咁凍既，但係張被其實已經被不折不扣地纏住左我，我都仲係好那凍，凍得我騰騰震，真係震到．．．　．．．不過有人瞓得好冧，我校唔到個冷氣，我都話我好多時都唔鍾意冷氣架啦，又傷風勒。

今日Peggy打番約食飯，佢話星期五，我一口答應，佢好驚訝，我問佢做咩咁驚訝，佢話覺得我好忙！我有咩忙者，呢排又未番學，今個月都好得閒呀！唔知點解ｄ人成日都覺得我好忙(除左公司果ｄ李荗！)，其實我都好得閒架，只係唔知點解通常一係無人約，一係全部都約埋同一日之嘛！

我真係好得閒架！

巴西又一次輸比法國，真叫人失望同失望，想英格蘭嬴，點知唔抵地輸十二碼，想巴西嬴，佢又唔要攪咩輸左，不過又係抵輸既，法國真係踢得好，但係咁四強睇咩呢？！德國、法國、葡萄牙；我估德國嬴，因為主場，但我又想施丹嬴，不嬲都覺得佢其實幾型，如果有番多ｄ頭髮更好，仲有ｃ朗拿度又好可愛喎，喊都喊得得意過人既。

咁點好呢，我仲睇唔睇決賽好呢！

世界盃又到緊張既階段，今晚英格蘭對葡萄牙，其實全場英格蘭攻門都多，守亦守得好，起碼比上次我睇果場好好多，只係．．．如果唔係朗尼紅牌出局，如果唔係碧咸受傷調出，如果一早用最強佈局．．．　．．．

結果，又十二碼，你估德國咩！射十二碼一ｄ都唔利英格蘭，結果真係，個籠門都無信心，就算葡萄牙射失兩球，英格蘭都輸，真係可惜，不過又有ｄ活該。