今日收到兩個消息，一個係我做埋今日就唔駛再番工，老闆娘終於都頂我唔"止"．．．，安格斯一臉無夸，我唯有對佢講我毫不介意，我覺得佢對我既唔介意感到奇怪，仲話可以推薦我，我反而覺得要咁既推薦更奇怪。不過，呢個時間配合得唔錯，番學既壓力即時退郤，今日既Test同星期一既Test我都有時間預備勒！仲有就係．．．呵呵．．．佢賠錢比我走喎！財政上既壓力又暫時得以舒緩，雖然債去債還在！如果賭錢＝倒錢落海，我覺得讀書＝填海，好似有用ｄ，不過ｄ錢都係無晒。

第二個消息呢，都ｏｋ開心既，因為出左成績，上期我只讀兩科，再加上我都攞左好多假hea住黎讀，如我所料，攞唔到Distinciton，其實我係可以攞到架！無奈hea實在太有吸引力。唯一可以寄望攞到No.1既一個學期就咁就死左係hea既手上，我真係要好好檢討下，我是可以做得更好的！

近排又經常發夢，仲要十居其九都係古古怪怪既惡夢，總係有ｄ野死咁啦，而死既手法又趣緻地凶殘，例如我夢到一個個其實係人黎既豬，唔知係故意／無意地自我走上劏豬台，我就眼望住一隻隻豬變成一塊塊由豬肉接合成既豬狀物體，仲可以揀只切某個部位而苟延殘喘．．．　．．．唔知關唔關我既生活事呢！呢排既屎加早一浪接一浪，我都應接不暇，唔通我會死得咁趣緻，=ｏ="。

好攰好攰，成日覺得：如果我可以住近ｄ就好勒！今日企住番工，雙腳而家同我疏軟咁款．．．。聽晚我要變身王琪戰士，誓要打倒會計牛魔王，牛大戰一觸即發，欲知後事如何，請看下回分解。

『有傷風，食必理痛傷風感冒丸無料到！！』

上星期個喉嚨越黎越痛，本來禽日諗住睇下醫生，不過都係無，今日好似無咩痛勒，但就無啦啦傷風／感冒，總之鼻水長流，眼睛睜唔大，但又瞓唔著，成身覺得好熱，但唔受得風扇或冷氣，由起身到而家都唔知想點，食左成藥都係咁！咩藥黎既呢，想退貨。我仲有一份功課同個Test都未攪掂，魚與熊掌！時間緊迫！我既opportunity cost係份功課，因為我決定溫好個Test先算！希望我明啦！救命呀！

個腦成日都有好多野想寫，只係懶／唔知點寫／唔得閒寫，咁就索性唔寫，有時覺得好可惜，又有時覺得自己太無聊，不過無論有幾無聊都係一個自我的見証。

就好似鍾意影相，我成日都覺得自己似個遊客(可能我成日迷路啦!)，咩都想影，不過ｄ人就會覺得奇怪＋白痴，我連屋企樓下果ｄ花花草草都想影，但係當我影既時候就有好多途人望住我，好奇怪咁，不過十年前既樓下同十年後既樓下已經好唔同，十年前既樓下已經無左，十年前行過街邊好易見到既怕羞草，十年後都好難見到，如果果時有影過相，最起碼有番一點點曾幾何時既真實感，就好似古裝戲裡面ｄ古裝衫，好似好無真實感，但當睇番幾十年前ｄ人既相既時候，果時ｄ人又真係咁樣著法，先至發現，做戲既古裝造型唔係假架，以前真係個個都係咁款。

今日有太多野想寫，多到唔知點寫好．．．

今日番工，本來諗住溫下書，不過最後都無咩點溫，係度呆＋傾電話，之後老闆娘來電叫我去幫佢攞野，佢講左個佢認識既地方出黎就話：你知唔知ｘｘｘｘ係邊，你無理由唔知ｘｘｘｘ係邊架喎！通常係呢種情況，我都會答一個佢好唔鍾意聽到既答案：我真係唔知喎。（然後心諗：有乜理由我一定要知ｘｘｘｘ係邊呢！）我想像到佢既面色一沉，通常ｄ人對住老闆都會講ｄ老闆鍾意聽既說話，雖然我唔會講佢鍾意聽既，但最起碼都可以唔講佢唔鍾意聽既吖，之不過通常我都係忍唔住答佢一ｄ明知佢會面色一沉既答案，然後我就諗，我係咪應該為佢係我老闆而唔好講呢！心裡交戰左一秒，最後都係覺得我始終都係個有個性既員工。

之後，佢就教我點去，由邊到行到邊到見到ｄ咩，係咩大廈幾多樓，出電梯後，轉邊面，乜乜公司．．．好清楚既指引，我都清楚咁答佢：明白，我識去勒，但係佢都仲係叫我重複點去．．．當我賓賓咩！每次我話左明，ｏｋ，但係佢都係唔信架！次次都要我重複佢果ｄ長篇大論既描述，攪到我好似個白痴咁，講得黎點去我都去左番黎啦，忙都只係因為要應付佢。

番到屋企就好眼瞓，食完野抖左一陣就瞓下午覺，發左個奇夢，我間屋外既簷上有隻雀生左蛋，有一隻孵化左，雀媽媽就搵蛋殼比雀ｂ食，呢隻雀好似我屋企養咁，佢又唔驚我，我又好幫佢，但係佢就住係屋外，可以自由行動，我見到佢搵蛋殼就幫佢手，後尾雀爸爸番黎，佢整死左雀ｂ，我都唔知點解，就估可能係有氣味係雀b身上，雀爸爸就整死佢勒！知道佢死左都有ｄ唔開心，不過後尾發現原來仲有好多蛋生左係我屋企，有ｄ已經開始裂開，屋企有個變態仔居然用筷子篤穿就快出世既蛋b，仲滿心歡喜想攞黎食，我都阻止唔到．．．，只好盡量保護其他既b蛋，隻隻都就出世，但係雀媽同雀爸就係屋外既簷上雙雙安靜地休息著，真係我仲緊張過佢！．．．　．．．之後我就被人夾碼叫醒左，又係食飯既時候。

食完飯，做兒歌金曲頒獎禮，見到d卡通人物係度郁郁下，我自己一個睇到都會忍唔住笑，但係真係好趣緻，尤其keroro，跟晒音樂節拍FING FING手又FING FING腳，真係得意，我諗我真係好鍾意卡通，係個心智發育未健全靚仔！

第一個出奇：今日一番到公司，老闆娘已經成個坐左係公司，我諗我個樣真係呆左，佢又好出奇咁問我係咪未瞓醒！我個心又有好多說話想講勒！

第二個出奇：人地個老闆又係咁早打比我喎！攪到我老闆見我係度傾電話就係咁叫我．．= ="。

第三個出奇：Lunch去食飯見到開利架車，車箱入面有小龍，好自然就同佢揮揮手，佢呆左兩秒至有反應，仲話唔係唔認得我喎！寒暄左兩句，佢攞左我電話，但係我呢隻死蠧永遠都唔識得攞番人電話架喎！

第四個出奇：又係出街既時候發生，今次見到家強，佢身邊係個同佢差唔多高，相信係亞洲藉既女子，手挽著家強的手，呢ｄ都唔出奇，出奇既係．．．乜原來佢老婆講英文架？！定係果個唔係佢老婆呢？

第五個出奇：安格斯下晏番黎一陣就走，口裡又說著I don't care，身體都表逹著I don't care，不過又叫我幫佢打卡，咪又係care老闆娘果種煩！話走完唔夠一陣又番黎，但係無野攪架喎！佢一走左無耐，老闆娘就搵佢勒，好緊張咁，但其實只係一件小事！起碼係我眼中係小事。

唉...我又病發，學名"依賴無聊重覆慣性思覺失衡手跟心不應症候群"又發作，俗名一個字---"等"。唔好問我等咩，我都唔知自己等咩，只係不停咁重覆著一d動作，習慣性有得依賴就依賴，明明心想做A，隻手就做XYZ，十分無聊，唔知等咩咁！我都唔係好想知！

但係我發現每次真係好眼瞓，但係又好多野未做既時候，都會病發！一發不可收拾，二發不可收手，三發不可收工，四發不可收山，五發不可收場．．．　．．．再發就可收皮！！！！！！

自從番左新工後，每個星期日都好攰，今日唔係食就係瞓，瞓醒一陣就想瞓，其他咩都唔想做！！起身就一邊睇女排，一邊食零食，食左兩包大蝦條，一杯大雪糕，一包非油炸拉麵，一大包餅，1.25L忌廉溝鮮奶，睇完就瞓左陣，瞓醒又食晚餐，總之不停口，而家又想瞓．．，唔知做咩咁眼瞓，就咁就一日，ｄ功課都未做過，唔知點算！日子過得好快，我開始懷疑我的學業是否可以如期過渡，今次出奇地快定左考試日期，如果咁樣落去，十月尾唔遲辭都要告假．．-____-。食得junk food 多個人都junk junk地添．．．。

係我仲諗緊好唔好又辭職，但係又無咩實際行動的時候，舊同事就致電來說舊公司請人，問我有興趣無！當然有啦！只係唔知肯唔肯請我者，都只係內部請人，但係佢就傻更更話寫左至算，咁又好啦！人工高、福利好、仲番五日工、準時收工、無咩壓力，而家真係去邊度搵！

像今天這樣的日子都不俗!

雖然今天要早起來上班，但公司又只有我一個人駐守，閒來没事幹就溫了點書，然後，筆記上多了很多個"？"，就這樣過了一個悠閒的上午。

收工的時候，柏姬來電說想找馬騮，我就上了古董街找找看，馬就多多都有，馬騮就．．．．．．不是比較大件就是相對地細件，而且價錢都不相宜，還是白走了一趟，我在想，找這些傳統擺設還是到大陸找可能合心意點。

然後坐村巴去做面部護理，才半個小時就到達，真快！做完面部護理就去做頭髮護理，相隔只三個星期又到髮型屋剪髮，對我來說應該是一個記錄，看了一個下午無聊雜誌，就變身成為白痴丁，面圓圓的白痴丁，似隻豬仔包的白痴丁。

本來還想去看死亡筆記，但没有人陪，又因應承媽媽回家吃飯而報銷了。吃過飯後還是想吃，一邊上網就一邊想念著我吃不出香檳味的香檳乜乜雪糕，於是去了久違了的百佳！想吃的時候是不該往超市的，我共買了三大袋吃的喝的，回到家就急不及待吃吃喝喝，吃飽的感覺好滿足。

今日又係番工啦，不過唔駛番學啦，越番份工越覺得：死啦！死啦！死啦！（比番學更死啦！死啦！我就黎要比足七個死啦佢！）

原本以為今日有首映睇，點知係我放工收到張飛既時候就發現真係出事，點呢！騙局咁仲去唔去好！最後去左，真係一個騙局！晒我時間，最後諗住真係去睇場戲算數，點知去到間戲院原來摺左，頂！人生不如意事真係十常八九呀！我係咁同亞妹講今日咁黑既！然後佢開始講埋晒ｄ恐怖野，真係好恐怖，如果只係因為仇恨可以令人做ｄ咁既野既話，我覺得人既心魔真係好勁，可以令人眼裡只有恨，好在我仲覺得呢個世界好美好，呢個世界仲有好多好多好好人，可能ｄ衰人已經被我既自動忽略隔離程式刪除左，幸好呢個啟動程序全年運作尚算正常者。

最後都係行街啦，諗起想買ｄ野都係買唔到啦！最後行到十點，就番屋企勒！真係好無為，不過好耐無見妹妹見下傾下計都好開心既，只係晒埋佢ｄ時間添，時間就係＄＄嘛，晒左佢好多$$，下次我會問清楚係咩先去架勒！

今日如常地番工番學，越學就越覺得死啦！

去到巴士站的時候，發現撘了個戲棚做大戲，八卦的我就走去望望，我真係咁大個女都未去過呢種戲棚睇大戲！感覺有點恐怖，首先氣氛冷清，雖然有好多公公婆婆坐係度睇戲，但係佢地好似無相關的，或者有ｄ係太專心啦！

係我經過的時候，佢地有的同時向我報以奇異的眼神，即係恐怖片果隻無啦啦一群人同時將個頭慢慢地、目無表情地移動到望住你果隻樣，我都知，無奶油一個我咁既年紀既人有興趣入去睇大戲既．．．，於是我都只係叫做行左一個圈，望左一望，就走勒。原來戲棚入面除左有人做大戲之外，仲有一ｄ棚係比人燒香呀，唔知做咩咁既，不過奇怪既係，這邊廂在做大戲，那邊廂在吹ｄ打，根本就唔知佢唱乜同播乜，我真係停左兩秒聽佢唱，只係知佢應該係唱緊國語啦，因為有字幕，但係內容就一ｄ都聽唔到！

企左兩秒都開始心寒，因為唔知做咩ｄ公公當我怪物望住晒咁，車又開勒，即閃。