由於今日熱熱既關係，我揀左著裙，好有夏天氣息！點知我一著就覺得唔係好妥，點解變左高腰既？？？？？明明買果時試過係低腰既．．．只係過左一個冬天者，你就高左咁多呀！

　　但係由於時間既關係，我都係著左，好耐都無著過高腰既野，仲要係裙！結果今日個豬腩總係覺得有ｄ唔舒服同埋對腳變左好多蚊爛架！

　　夜媽媽番到屋企忍唔住磅佢一磅．．．woo woo ．．．．wah!

　　同學仔回鄉掃墓，順便買來手信給我們，由於我就快又大左一歲既關係，佢特別買左一個有粒星寫左個"生"字既貝殼啫哩比我(即係好似羅拔臣啫哩果d)，但係點解祝人生日快樂只係得個"生"字咁攪笑既！不過都多謝晒份心意！謝謝！

　　今日去左海運間唔記得乜名食下午自助餐，好耐之前話想去，去到好耐之後的今日才真的嘗試了（我就係咁），可能有期望，所以都失望，或者係我奄尖啦，不過我相信不會再去第二次囉！

　　之後想去睇哈爾移動城堡，今次時間岩岩好，可惜只有最前一行有位，仲要今日只開呢場，我似乎同呢套戲無乜緣份！於是，看什麼對我來說已經没有分別了！朋友就選擇了藉著雨點說愛你，不知由何時開始，我不會主動地想看這類型的電影，但昔日的我，呢ｄ戲我係一定好想睇架！我變了！

　　今次無期望，於是我覺得好好睇，不至讓我哭，但的確觸動了人的心，就正如我的理念，愛是一個選擇，假如兩人都堅持這個選擇的話，一切都會很美。

　　係等待睇戲的期間，去左睇書，我睇晒成本挪亞方舟小說版，本來無諗住睇呢套戲，而家開始有小小意慾，不過都應該唔會夾到時間。

　　然後，去左食手握壽司，好味喎！如果大家係尖東想食壽司的話，推介"羽"壽司，好過係元氣門口等先啦！

　　其實，原本今日出黎既原意係為小肥慶祝生日既，不過全日個感覺都唔係好似，我已經諗左買禮物比你架，只係買唔到咋，睇下係你正日之前我買唔買到啦，哈哈，你知我從來都隨遇而安架啦！

　　今日係亞嫲上班的最後一天，又一証明這間公司流失量十分高，亞嫲應該仲未做夠兩個月就辭職了！係呢層樓的同事當中，我諗我係唯一一個叫做同佢熟ｄ既人，只因為佢就坐我隔離。自從佢黎左，反而有個人同我講下野無咁悶！但係全層樓既同事都無乜邊個鍾意佢，今日亞姐仲為左唔想有機會要同佢食飯而請左半日假（當然都係有ｄ病啦），於是就約左我呢term既人同佢食勒，話題又順帶提到亞嫲，同唔同term既人食飯，當話題講到佢既時候，大家都會覺得佢個人好差，無禮貎啦，粗魯啦．．．．．我亞姐仲話唔會同佢打招呼同講野添！（佢兩個無論公私都無乜機會接觸架）但係，其實佢除左會係電話度大聲鬧人同喜歡大力掉斷電話之外，都無乜野，我反而覺得唔駛同佢客客氣氣咁講野，得閒佢寸下我，我又寸下佢咁仲舒服喎！

　　然後，我又想起社會心理學的理論，就係當大家唔了解大家既時候，偏見就容易產生，就好似好多人話議員都係無個好既，個個都為錢為利！只係我支持既果個唔係咁。點解？因為接觸多，大家溝通得多囉，你明白佢多過所有其他議員囉。同埋，第一個印象好重要，第一個印象比人覺得你係Ａ，以後佢都會認為你係Ａ，用Ａ既態度對你。唔明？就好似周星馳，大家定左佢係引你笑既，就算佢只係呆坐係度，你見到佢既時候，你仍然認為佢係引你笑既，於是你就不其然想笑。

　　所以，你見到有ｄ人既時候，會好想講粗口，見到有ｄ人既時候本來想講粗口都唔會講，見到有ｄ人會想笑，見到有ｄ人好容易就忟．．．一切都唔關對方事，只是你給他們定型了！

讓我同大家分亨一個驚險旅程...

Sa Sa（一個普通女子）不幸被可惡的大隻佬虜到一個偏僻小鎮，強迫作他的唔知二奶定三奶。話就話係小鎮，其實四野無人，全個鎮就只有一間大屋同埋養牛羊禽畜的地方，所有日常用品，大隻佬都要架車外出購買架。

大隻佬間屋，除左有大婆，仲有一個又係被虜的男僕人，幫手做一切的粗重功夫，只是全屋人都無一個會開聲說話，直至不久，沉寂的世界改變了，大隻佬在外購物的同時，又虜多一個女子，呢個女子同Sa Sa好唔同，佢不但識得討大隻佬歡心之餘，仲推動我們逃走。

於是，第一次逃走計劃展開，我們三人計劃在大隻佬下一次外出購物時逃走，男僕人可以開耕田的車帶我們離開．．．終於到了那天，大隻佬居然要我和他一同外出購物，本想取消計劃，但衝動的僕人一意孤行，在村外駕車強搶我上車企圖逃脫，可惜事敗，被大隻佬捉回。還好的，大隻佬只是綁住我困在茅屋多日，但僕人可慘了，Sa Sa看著他一下一下的被鞭打得皮開肉裂、遍體鱗傷，血流滿面時還以醋抺之。大隻佬可殘忍！

只是僕人身體強壯，很快就無事，又再計劃第二、第三次的逃走，可惜三次都不成功Sa Sa已經再唔敢逃走，都ｏｋ啦，住大屋，衣食無憂，唔駛點做，只係一切都要受人指揮，要對住唔想見到既大隻佬者！就因為想Sa Sa走，僕人已經受了很多罪，Sa Sa唔想咁。點知今次連大婆都勸我們逃走，我們還後生，總不能待在這裡一世．．．　．．．

終於，第四次，帶著戰戰兢兢的心情，我們逃亡到懸崖邊，大隻佬仍在身後窮追不捨，我和僕人就盡地一舖，跳落海裡（Sa Sa係唔識游水架），沉到海裡，什麼都不理拼命狂游，差不多到岸時，只見岸邊有很多彈跳著的魚，僕人大叫小心毒魚，被它咬到會中毒．．．，說時遲，那時快，我就被魚咬了！

然後，我無死到，和僕人一起過著冒險的生活，每一次都好驚險，直至僕人最後半身不遂，直至今天和僕人一起支持正要賽車我們的兒子。

睇完係咪覺得好攰呢？我仲攰！因為呢個其實係某晚發既一個夢，瞓醒就好似無瞓過覺咁，仲攰左添，激氣！

哈哈．．見到日日整得咁好玩，我又要玩，不過．．無鬼用既我攪左好耐都唔可以整齊個版面添！

唯有算啦，tinkle咁可愛我唔捨得唔養佢呀！大家得閒多ｄ黎同佢玩下啦！

　　今天做左樣唔知結果會點，又唔知好定唔好既事，或者其實無咩好定唔好既，都做左勒，唔諗最好！一切就交給主啦！

　　今天亞曼莉無返工，歌莉亞返左半day，但係我都係好多野做喎，OT到七點半，落街就覺得"弊"，咁凍既！ 好在臨時取消約會者！不過還未返到屋企就已經覺得中左招，我又要傷風感冒了，喉嚨又痕又痛，眼都唔係幾登得大添！-____-''

　　回到家，食自已，仲收到學校的信，為慶祝我的生辰，學校特別改期要我難得既生日星期天返學架！今次真係中左同學仔講，岩啦，下午可以去玩勒！

　　三月廿七日，我真係有得睇男人之虎喎！都話世事難料，總會盡如人意架啦！ 於是同cell員食完飯後，經都唔查就趕入場勒，好迫咁喎！

　　男人之虎，老實講，睇完都唔係好明男人點"虎"法，只係覺得攪笑既背後，寸左好多人，好可能就係笑得最大聲的果ｄ，哈哈！包括我啦！一黎就玩錯別字啦！香港人好似我呢ｄ已經開始越黎越唔識中文，求其寫個同音字就算Lu；傳煤言之無乜啦，仲有粗口等，真係寸完你都唔覺，只記得好好笑，扮章小蕙，扮亞媽打仔，扮不同國籍的人，扮Sales．．．．．．鍾意亞詹很懂得攪現場氣氛，形體表演更加唔駛講。

　　可惜玩粗口真係唔係亞詹果氾，聽得出佢都唔係講慣粗口既人，黃秋生就講得出神入化得多了！（同係潘惠森既另一個劇，同係粗口對白，秋生的演釋全場拍爛手掌架！）

　　不過，兩個半小時的獨腳戲同埋突破性既演唱，都足夠嚇親我了！

　　由於昨晚早睡，再加上今早的電話騒擾，我早了起床，早了出門，早了乘車，卻遲了下車！只因為臨到站不遠，無故地打了個蓋睡，就過了兩個站，下車後見時間尚早，就由鳯尾街慢遊回永光，由於慢，我發現以前没發現到的一些東西，原來這裡還有舊式的大排檔！（仲要有波睇添！）細細個樓下亦是大排檔，我是食大排檔長大的，好懷念這種風味（唔知呢道ｄ大排檔好唔好味既呢，好耐無食ｄ鑊氣野，諗起都想食呀！ ）

　　繼續走著，又看見一幕經典的街頭理髮，一個在剃鬍子，一個在理髮，真想為他們拍拍照哩！一個街頭理髮價值：成人$25　小童$20。（哈哈！心郁郁想一試添！）

　　轉個彎，又回到我熟識的街道，只見樹都開滿花，有粉紅，有黃，有橙的等等，抬頭看著藍天+飛花，心情豁然開朗，就在我途醉之際，有兩篤白色物體在我身邊咫尺之間墮落 ，然後啪啪啪數聲，一對行兇鳥成功逃脫，我氣得鴉雀無聲，幸好，没中招。

　　回去祟拜的過程很精彩，但都不及今天的講道精彩。下回再續。

　　今天是受難節，應節地要晨早流流起床上學去，上Term 2的第一課Macro，又再見之前的Mr. Keith，已遲到的我，還是要跟大顆兒呆等另外的大顆兒，本班大約有七十多人，等了差不多半小時，還只有二十幾個人仔出現（都話公眾假期不宜上學啦！大半班都咁覺得架！），早知呆等，我就不用這樣早起身啦！

　　放學後和同學仔行街食飯，去左好多人排隊的榮記食車仔麵，食完係得到"口渴"兩個字架，不過料就真係好出面少少既，我就幾鍾意食佢既豬大腸啦 。

　　行左一陣，我當然要上一上SOGO探下親愛的龍貓啦！八折喎！忍住 ，唔買呀！好窮呀！點知．．．比我見到Peter Rabbit個特賣場，入去睇睇又忍唔住附出$10玩玩佢個攤位遊戲，得到毛巾一條，湯殼一個架！雖然只是換來小小禮物，但過程玩得開心！^^(我好耐無咁童真過..哈哈)仲有好多人攞到大奬呢！（玻璃茶壺／杯set／毛巾set）超抵玩！我地仲同Peter Rabbit影相添，有ｄ好似去超迷你廸士尼咁，低ｂ左半日喎。

　　今日難得地仲做左樣野，哈哈！就係做尖勒。踏單車、健康舞、跑步，腳都軟埋咁離場，難得出一身汗，心情開朗，回到家，擁著酸軟的腳很快就沉睡去了！