零晨回到家，還要應付早上要交的Assignment，大家無聽錯，又係Assignment，一個星期三份咁者！唯有漏夜開工啦！點知忽然認真既我一做就一個通宵，還是懞懞撞撞地遲到了！但三個鐘既課堂竟然都無咩點恰眼瞓，連預先買定既咖啡都無飲過添，只係今堂講既野就真係唔係幾明勒！我係時候要追追個進度了！

　　之後，好好既同學仔陪我去食飯，天后而家其實都好多野食呀！再去行行街，其實我都想買份禮物比自己，不過都係買唔到，唔知點解去買野既時候總係覺得呢樣岩呢個朋友喎，果樣岩果個朋友喎，自己反而無份，今次都係，買左樣朋友仔鍾意既野，我都好鍾意，係間舖頭玩到愛不釋手呢！睇下幾時有機會比你先！

　　行完街街返屋企就瞓覺豬勒！咁又大左歲勒！

　　因為星期一無返學，今日要特登咁出去老遠上堂，都係果句，盡左力就好了！放學後有時間，無意中發現一個叫多多甜品既，好似幾好味就梗係要入去試下啦，見到有幻彩明珠，個名好似唔錯，不過原來只係一ｄ放左生果係入面既類似大菜糕物體，即時唔想食！咁就叫左個出名杏仁茶，呢個唔錯，多多都係有一首既．．哈哈哈！

亦都係因為要返學，至去左睇挪亞方舟，其實已經無意中睇左本書，不過的確呢套係一套好差既記錄片，太片面勒！但郤令我對亞拉臘山產生興趣，方舟係其中一個原因啦，另外是因為二十年一次既落紅雪，好想知點解會有二十年一次既紅雪出現，紅雪之後既豐收又係咩原因，最近一年得不到豐收又係咩原因？

　　片裡面常有一句：挪亞的日子怎樣，人子來也要怎樣。朋友話覺得呢句有威嚇成分，我唔覺，反而總係覺得有另外的特別意思，到底係點解，我又未意會到喎！

　　之後去左apm間和花亭食野，都幾貴喎！講開就講起元朗有間一番，佢地話大件夾抵食喎！反而我無去過添！

然後，收到空運抵港既龍貓音樂坐， 我最鍾意大笑既龍貓．．哈哈！多謝晒呀！不過下次果ｄ鱈場蟹同埋神戶牛預埋我就更好啦！

　　星期五，唔知點解老細請食飯，去左北京酒樓，顧名思義係食北京菜既，好味道，不過ｄ伙計好攪笑，其中有道菜係湯黎既，咁佢埋黎我地度分啦，你有無見過有人分湯係好似拉茶咁既呢，係我地全台人都望住佢既時候，佢更得意忘形地將ｄ湯分到天一半地一半，最後仲發起個煲，離遠咁將ｄ湯倒落個殼度，再轉佢兩大轉至倒落碗喎！真係戥坐係起菜位個同事慘慘呢！

　　我公司有個人所共憎的AM，大家給它名字叫姥姥（呢個已經係比較好聽既名），我一入呢間公司，大家己經叫我小心ｄ佢因為佢外表係一個永遠保持友善微笑，令人感覺慈祥的傢伙，初時我真係不以為意，都無咩吖，可能睇野角度唔同者，但後來都明白佢地既忠告是對的。

　　話說我係要比Timesheet佢簽架，由三月尾到四月咁啦，姥姥望住個表話我個個星期一都請假，我望一望自己張表，就好客氣咁話呢ｄ係公眾假期黎架！

之後佢開始同我講好多無黎啦喂既野．．．　．．．

我都覺得你請假請得比較多，點解呢？（咁岩我星期一又真係病！）我唔舒服呀！

你知啦，有時好多野做，你又唔係度．．．　．．．

你係咪返日校，我地公司唔得架！（返日校我仲可以日日係度返工咩，果間日校一個月返一次既？！）我唯有答過第二個應該令佢滿意既答案－考試。

咁考試既話就無得講啦，考試吖嘛！（咁你仲同我講咁多！）

　　到下午，我好多野做，去Printer攞Print out既時候無幫姥攞，轉身就見到佢見到我無幫佢攞咁走左去，我心諗呢期又中招，我攞完野就去左亞曼妮個位幫佢做野，無幾耐，隻姥就打電話比亞曼妮問我既工作表現，整個過程我都聽到晒！唔理返埋位做野，晏ｄ亞曼妮就打黎叫我整都張枱有咁亂得咁亂，姥姥又打比佢話我好得閒， 今朝仲講緊好多野做唔想我唔返工架喎，過左一個朝早我就變得好得閒啦！ 我心諗：我張U字枱都只係得番前小半係無放野，後面同側面都係坐高過我既山喎，仲想點？！

　　晚上，上堂才驚覺下星期要Test，下！咁快既，今日至交第一份Assignment咋喎！唔知點死好！到目前為止，我仲係對呢科無乜頭緒，講左咁多堂，其實我堂堂都唔知佢講乜，更加唔知應該點溫，開始想忘記個"死"字點寫。

　　星期三晚去左Waiting List開會，玩樂了一個晚上！我又開始一個新既工作坊勒，感覺還好，只係好奇怪，大家似乎都有自己的崗位，但我無，未落實呢！雖然話做咩都無乜所為，但都好想得到個知字，時間尚早，希望未來的合作可以有好火花出現啦。

　　我都話，好多時我想既野都莫名奇妙咁得到架啦！原本星期二係約好上栽培班，但係我唔想去，因為趕完星期一份Assignment之後，星期四還要交另一份，一ｄ都無做過，仲要係無乜頭緒既呢！點知最後決定取消上栽培，因為力健－我們的栽培主持人唔得閒，哈哈，正合我意呀！感謝主！

　　由於怕嘈既關係，我選擇放工後返到屋企食完就瞓，之後夜深人靜時才起身做野，連日來都唔夠瞓，但感謝！我仍然可以專心工作，專心上堂，專心做Assignment（雖然做完都唔知自己做左ｄ咩）。

四月十八日　嘔！

無返工，今日係交assignment的日子，還是在限定時間內完成了，只是學還是没有上！星期六補上堂的時候交啦，特登話番比個死人頭聽我係第二班架，諗住方便佢分開唔駛記分時麻煩啦，點知反而比佢寸我無通知佢， 如果因為我遲交扣分，其實我預左，但係只係因為我無通知會遲交而扣分，我就覺得好唔抵，你估我想架咩！遲左先通知你，同我而家話你知又有乜分別，我莫明！不過我已經唔太重視我既分數勒，盡左力就好了！right？

　　話說係無綫仲係宣傳中既時候，我就已經好想睇呢套卡通勒，只可惜由唔駛返學，到每個星期六晚都要返學，每個星期六都總係睇唔到，直到上個禮拜我終於第一次睇到勒，一路睇，一路問點解咁既．．點解咁既．．直到佢做完．．．吓．．．乜做半個鐘架咋！唔夠喉呢！都係覺得，如果可以同高橋由美子果套調轉就好勒！

　　今日有人生日，祝佢生日快樂，以後都開開心心先！

　　但，今日反而係同小肥去街街，終於係好刻意的情況下，睇左哈爾移動城堡，呢套係係宮崎駿系列入面，可以爭做我第二至愛的卡通電影呢！ 睇到中段，就係哈爾推蘇菲出門口見國王的時候，我就醒起，哈爾係木村配音勒，語氣同佢做既日劇一模一樣呀！唔靚仔果段就一定係為佢而設添呀！雖然有好多人彈佢配得唔好，但係無損我對整套戲的好感！

　　之後又係食野同埋食野啦，見到好多認識的人，以前亞sir，前同事，寧寧，但佢地都無一個見到我，哈哈！上左Wink度，大家就雞啄唔斷咁講左好耐，番到屋企都點幾，做功課的計劃取消了，本來打算早些起來完成埋佢，點知．．．．．．瞓瞓下又想嘔，就起身嘔勒！中肥降呀！睇黎下次都係唔好同你去街街！