尋日終於上完呢個學年最後一堂

Micro個prof.仲請我地飲咖啡

勁耐無飲過咖啡(可能有一,兩年)

我只落奶無落糖,又發覺都接受到wor

原來人的口味真係會隨時間改變

好似小時候,甚至直到幾年前

我都好怕食油膩野,例如燒肉個d有舊肥膏的我都唔會食

不過近年我又開始接受到

仲覺得有d食物太瘦入口會好乾好鞋

以前會嫌阿媽煮送落太多油

但呢一年自己煮野食落得越來越多油

咁係咪代表我會走向肥仔之路呢

好彩暫時體型上都好似未有呢個趨勢,哈哈!

離晒題tim xd

講返完sem

話就話完sem,但其實好戲在後頭

今個月16號開始就考final,考到25號考完最後一科

但唔好以為有得抖

考完之後我就要開始執屋

因為"進擊之經濟系"事件令我要被趕走

係5月1號就要搬去新落腳點,好彩都係隔離條街

搬完之後呢?

又要拿拿聲開始溫書,因為5月尾個comps先係重頭戲

好似話on average會fail一科...

但我唔想8月頭返黎重考呀

而且重考真係好大壓力,萬一衰左就玩完

所以...真係要好好prepare,加油呀!

最後近排除左方大同之外都幾鐘意聽一d舊歌

其中一首就係陳淑樺的夢醒時分

係當年的一首hit歌呢~

順帶一提,當年係1989年

即係我1歲個時,真係好遙遠呢xd

原版

我覺得都唔錯的戴佩妮live版 (條片可能會比較大聲,請注意音量)

無計啦,人生太少新鮮事,太多重重複複的生活

無理由開篇blog講下我今朝刷牙刷左幾多下,夜晚又炒燶左菜吧?

唔係wor,諗諗下都真係可以搵日挑戰下記低一日所有細節

有咁詳細得咁詳細,睇下可以寫到幾多野

都係一個幾好玩的挑戰

新鮮事還是有的

溫哥華算正式踏入春天

暖左好多,日間溫度幾乎都10度以上

UBC周圍開左唔少花

因為d花係周圍都有,而唔係特別種係一個花園

所以感覺都幾特別

令人不禁要講一句

春光似海 盛世如花

今日係媽生日呢!

頭先skype佢傾左一陣

之後佢話wechat有人搵佢就收左線

自從買左部IPAD之後佢好沉迷玩wechat

因為大陸D親戚都有用

所以佢都成日玩,仲係咁forward d文比我睇

幾搞笑,都係一件好事

至少唔使咁悶

據說尋日香港落左一場200年一遇的大雨

而且仲落埋冰雹@@

又一城玻璃天幕被輕鬆擊破

正所謂屋漏偏逢連夜雨

又一城變左水舞間

九龍塘站亦變成威尼斯

真係奇景

其實起又一城時係咪無考慮過香港會落雹呢?

溫哥華開始踏入櫻花的季節了

來之前真係唔知原來溫哥華都有櫻花

而且唔止有,聽講有好多下

我發覺原來冬天時見到個d禿晒的樹原來都係櫻花樹

一到春天就唔同樣

感覺都幾得意~

依家只係岩岩開始

4月應該最多

期待到時的花潮xd

另外UBC校園好多地方都圍晒欄

原來係度舉行緊3項鐵人賽

d人又踩單車又跑步又爬牆(無錯係爬牆唔係游水)

都幾搞笑

我諗如果係中大搞的話

上山個下都應該傷心

剛剛阿哥skype我

佢坐緊299入西貢

但佢同我講話架299好怪

無經馬鞍山無後面條高速公路直入西沙路

我上網check下先知原來299呢條線而已係14年1月取消左

取而代之的係299x

唔經馬鞍山直入西貢

而99總站就由烏溪沙延長到恆安

所以沙田同馬鞍山入西貢的巴士由一架299分成299x同99

沙田入西貢即刻快左勁多

阿哥話依家新城市入西徑村只要15-20分鐘@@

點解以前無d咁爽o既野架

曾經陪伴我10年人生路的299都進化了

感覺真奇妙,返香港時要搵日去撘一次xd

恭喜潘碧龍!

睇到你地d相都覺得好開心

一班兄弟撐你場

仲有大勤係Facebook post個段感言

真係好有回憶

終於都輪到我地呢班人踏入人生另一個階段

希望大家都可以幸福

祝新婚快樂!

話說今日同Alan出Richmond

係Aberdeen Centre個food court食野

食完野之後佢拿d功課出黎問我

我地討論期間坐隔離枱的一對香港人夫妻同我地撘訕

後來問我地讀緊咩

我話phd year1時佢地好驚訝

話以為我地係high school students

哈哈,個樣都呃得下人

其實我個樣好似由中學開始都真係無咩點變

係咪呢?我自己都唔肯定

可能樣都係細個,但又殘左d

其實我幾時先會變成一個大人咁o既樣

定係其實唔會

又其實大人樣同年輕人樣最大的分別係咩呢?

真係唔知~

頭先突然諗起之前睇過有關杜鵑鳥下蛋的習性

佢地唔會築巢,而係將蛋生係其他鳥類的巢中

杜鵑鳥的蛋特別快孵化

杜鵑幼鳥有一種本能係把巢中原來的蛋擠出巢

杜鵑最常係鶯科鳥類的巢下蛋

杜鵑幼鳥的體型往往比成年鶯鳥還大

但巢中的鶯鳥父母還是傻傻的把杜鵑幼鳥當自己的子女養大

我感覺呢個自然界的寓意幾有趣

上網search下

原來東野圭吾有一本小說就係叫"杜鵑鳥的蛋是誰的"

真巧合

唔通我已經進入左八奇的思考領域?!

哈哈

話說今日係我生日

雖然溫哥華時間仲係１６日

但鑑於本人係香港出世

生日應該計香港時間

所以我咁就生左日

而我的人生咁又過左４份之１

無錯，係４份之１咋！

因為我打算長命百歲，哈哈！

今日都係同每一個係溫哥華的星期日一樣

起身食早餐（果ｊａｍ方包），去學空手道，返房再做少少體能，食ｌｕｎｃｈ，洗衫，訓個晏覺，起身用下電腦，煮晚飯，食晚飯

平淡的日常生活都無咩不好

不過有時難免缺乏少少生氣

曾經覺得自己都算係幾唔怕寂寞的人

亦有想像過係遼闊的草原過著牧羊人一樣的生活都幾消遙

不過黎溫哥華一個人生活之後就發覺自己始終都係個城市人

都係城市適合我多點

又或者其實牧羊人的生活都真係消遙

只係我境界仲未到ｘｄ

畢竟年輕

小記事一則

下午見到有人係樓下草地格劍

拍已偷

D鬼佬有時真係好鬼正,咩都玩一餐

不過其實好都好想玩,哈哈!

又,前幾日見油麥菜平買左一包

不過無豆豉鯪魚

用左廉價沙甸魚(CA$0.6)代替

效果都唔錯!

完

不知不覺黎左Vancouver已經有半年了

又不知不覺係呢度經歷了一個冬天

11月時由夏令時間轉冬令時間

前晚由冬令時間轉回夏令時間

冬令時間正式名稱是Pacific Standard Time 

夏令時間就係Pacific Daylight Time 

據說係夏天可以充分利用日照時間

我無為意佢前晚轉夏令時間

本身諗住半夜2點幾訓

點知突然發覺已經3點幾

我仲諗點解時間過得咁快,過左3點都唔知

原來係電腦自己match左太平洋時間

由1點59分59秒直接跳到3點=.=

咁就無左一個鐘,要等下年11月先可以賺返,哈哈

而佢個夏令時間又真係轉得幾準

今日落堂後出Richmond比我遇到久違的大晴天

天氣都暖返唔少,有10度左右

其實冬天都真係幾難頂

又凍又濕又早天黑

佢又唔係真係好惡劣,但就係慢慢磨個下慘

如果只係幾個星期,一兩個月可能會覺得無咩野

但整個冬天下來就令人好提唔起勁,心情受影響

北方黎講Vancouver已經算好

係北歐冬天得兩三個鐘日光個d人都唔知點過生活...