今朝零晨，我哋一家四口爭少少就死咗啦！

事原係尋晚11點半左右，老公佢去煲奶樽，我就氹細b瞓覺，我氹細b瞓覺嘅時候，我自己都瞓啦。佢就等緊啲熄火嘅時候就不知不覺咁瞓咗。

咁其實佢番工好累我知，但係佢負責煲奶樽嘅係咪應該負責睇火先，點知佢就走咗去瞓，到我嚇醒咗嘅時候，已經係1點半嘅事啦，一起身就見到成間屋都係煙，跟住就見醒佢，我就走入廚房，我見到個煲著晒火，我好驚，我都唔知點算，細b又比我嚇醒，係咁喊，佢嘅喊聲搞到心都煩埋，嗰一刻我真係以為我就咁就死架啦！

跟住，佢就走入廚房救熄火，我就開晒啲窗等啲煙散，氹番細b，但係啲煙實在太多啦，成個鐘都走唔晒，等咗個半鐘左右，啲煙慢慢咁走晒，但係間屋都仲有陣臭味，好難聞。跟住我叫佢搞番好個廚房佢，佢就只係好求其咁抺，我見到個廚房，我就嬲啦！

我都唔明佢點解要煲緊奶樽嘅時候走咗瞓覺，我真係唔明呀，就算點累都好，等嗰少少時間做咩都得啦，點解一定要走去瞓喎，明知自己一瞓就會瞓著架啦，點解唔做少少嘢等啲時間過，而走咗去瞓呀，我真係諗唔明。

到咗佢番工嘅時候，我叫佢請日假搞番好間屋，但係我見佢堅持要番工個樣，我就好嬲，我唔明佢點解搞到間屋咁仲要番工，兩個女吸咗煙，點解唔觀察佢哋一日，起碼確保佢哋冇事先得架，個廚房又黑晒，唔通唔使理呀，我真係唔明囉，點解次次屋企有事嘅時候，佢都係要番工唔理嘅，我真係唔明呀，我更加唔知佢點諗呀！

唔通，真係江山易改，本性難移！

今日我同frankie落咗深水埗幫亞妹佢哋間屋嘅嘢，起初以為係去長沙灣個社署，點知去到嘅時候先知唔係囉，嗰個主任仲好串咁講話“我哋呢度只係負責搞綜援，唔係搞屋架，如果要搞屋嘅話就要去家庭服務中心嗰度搞。”

跟住一開始就比咗張紙我哋，話可以去搞屋嘅嘢，跟住亞妹就問邊個係負責佢哋個地方，個主任即刻就講，“你自己打去問囉！”我見到張紙有4個地方可以搞同聽到個主任咁講之後，我就好嬲咁同嗰主任講，“你要我哋帶住幾個細路咁樣慢慢搞呀，我哋宜家即刻過去架喇！”個主任聽到之後先好聲好氣咁同我哋講，“哦，你哋宜家過去咁我幫你打去問吓啦！”

到咗最後係去咗南昌邨嘅社區中心度搞，雖然到最後到做唔到啲咩嘢，但係都總算有啲收獲，起碼知道，如果有醫生寫紙證明亞妹有心臟病，唔可以抱住個女行樓梯，咁就可以快少少上樓，我聽到之後，都算覺得幫到佢哋少少嘅。

但係長遠計，真係唔知佢哋要到幾時先可以上到樓，個b可以有個好啲嘅環境生活喇。

唉！總之幫得佢哋幾多就幾多啦，始終都係一家人，唔通真係唔理佢哋，睇住佢哋死咩，我真係做唔出囉，但係唔知佢哋領唔領我呢情咋，我驚到時幫完佢哋之後，佢哋唔記得咗我，到時，到佢哋唔想再理我啦！

今日係2009年1月1日啦，新年啦，希望今年會心想事成，事事如意啦！

尋日我同frankie,亞齡係旺角倒數，今次係我咁大個女第一次倒數，原來係出邊同係屋企倒數係兩回事嚟架，係出邊倒數真係開心啲架，因為係屋企倒數就只係得屋企人同你一齊倒數，但係出邊就唔同啦，分分鐘有成千人同你一齊倒數架，個氣氛好好架，今年我真係好開心呀，因為可以同咁多人一齊倒數呀！

但係整體嚟講，我尋日係唔開心過開心架，點解？

原因就係，我尋日係第一次上去亞妹個屋企，我未上去之前，我個腦一直都以為佢間屋都ok大，起碼夠佢哋三個人住。可惜唔係囉，我上到去原來佢間屋係嗰啲，一個單位入面再細分好多個房嗰啲，入到去仲要係得一張床，床邊就得一個比地面高少少嘅小小小廁所，仲要冇門，間屋跟本就冇地方行，我見到咁嘅環境，我再諗吓個b一路一路大，呢個咁嘅屋邊度夠佢郁呀，我一諗到呢度我就想喊啦，但係因為係佢哋面前，我始終係家姐，我唔想比佢哋見到我喊，所以我一路忍住，可惜，當我同佢哋分開嘅時候，我終於忍唔住啦，係frankie面前喊咗出嚟啦，我知，除夕應該開心，但係我見到我最錫嘅妹宜家嘅生活，我真係笑唔出呀！

只係到咗倒數嘅時候，見到咁多人同我一齊倒數，我先笑番一下，但係當我番到屋企，再諗番亞妹個環境我就瞓唔到啦，因為我要諗吓辦法幫佢哋啦，唔可以再比佢哋住啲咁嘅生活啦！

到咗晏晝，我同兩個寶貝影咗少少生活相，有啲都好靚呀，欣賞吓先！

係咪都ok呢？

天下男人都一樣！

點解個個男人都係一個順口開河嘅人呢嘅，應承咗人嘅嘢永遠都扮唔記嘅。

老公早幾日先應承我整番回鄕証後會同我番大陸影番輯婚紗相，但係過咗幾日啦，佢連預約都冇呀，咁點整呀，我覺得佢係氹住我先，等我唔好發脾氣。

但係佢唔知我好在意呢件事呢？因為結婚呢兩個字對於我呢講係我呢生人最遺憾嘅事，因為我係喺百冇嘅情況嫁，所以當我見到人哋個個結婚都開開心心，我就好想喊，好嬲自己，嬲自己點解當初唔聽媽咪講，唔好咁早結婚，諗清楚先。

我諗，當初我肯聽媽咪講，唔結婚住，我到咗今時今日先結婚，我應該都會好開心。

所以，如果老公佢唔去搞張回鄕証同我影番輯婚紗相，我就自己番上去影，最多咪影個人專輯囉，一樣得。

總之，天下男人都係一個順口開河嘅男人啦！

尋晚係老公個堂老哥嘅結婚日子，見到人哋結婚我應該開心先係嘅，但係當我去到個會場嘅時候，見到啲人個個都好開心，對新人不停咁有人上前講“恭喜晒“，跟住就同對新人影相，我就開始諗番我嗰陣時結婚，結到一張結婚相都未影過，已經好唔開心。

到咗臨開席睇番對新人由細到大啲相嘅時候，我就更加想走，唔想再係個宴會入面，因為我真係好唔開心呀，我嗰陣時已經好想喊啦，但係我都忍住！

到對新人由大門口行入個會場，我望住新娘好開心好幸福咁拖住新郎哥嗰樣，再諗番我嗰陣時結婚咩嘢都冇，我真係好想走，好想喊，但係因為當時我要顧及個場合，所以我都係死忍！

但係，當番到屋企嘅時候，我再諗番對新人同埋個結婚宴會，同我嗰陣時結婚嘅分別，我終於忍唔住喊咗出嚟LU。

因為我唔甘心，點解人哋結婚可以結得開開心心，可以影好多結婚相呀、婚宴相，而我嗰陣時結婚就連一張婚紗相都冇過，更加冇擺過酒，所以一定冇咩婚宴相啦，所以我好唔甘心，好唔開心。

所以，我決定要影番婚紗相，當係補償番嗰陣嘅不足。係影到婚紗相前，我決定唔會再采老公，我嬲死佢呀，係佢搞到我每次去啲婚宴嘅場合都唔開心，我一定唔會原諒佢，直到同我影番婚紗相為止。