呢排唔知仲咩成日整親呀，唔係扭到腳就係界到手，宜家仲要嘔添，真係重傷呀！

尋日我一起身去廁所嘅時候，突然之間覺得好想咳，咁咪咳囉，點知就出事啦！我居然咳到嘔呀，仲要嘔血呀，我起初都覺得冇咩嘢嘅，但係當我番到公司嘅時候，我就開始驚啦，因為我由起身到食晏嘅短短4個鐘入面，我嘔血都嘔咗3-4次啦，仲要次次都好多架，我嗰吓真係驚啦，但係我又唔走得，唯有死頂囉！

諗住番到屋企會好啲啦，點知仲衰啲添，沖沖吓涼都可以嘔血架，我當時只係得個驚字，又唔敢出聲，嗰陣時已經半夜2點嘅事啦，所以我連FRANKIE都冇通知，唯有自己死頂囉！

到咗今日食飯嘅時候，我打比FRANKIE嘅時候，我都冇開到聲，因為我驚佢會叫我去睇醫生，我驚打針呀，我驚睇醫生，我唔知個醫生會點做，所以我到最後都冇同佢講，我尋晚沖涼又嘔過血，希望可以避過呢次睇醫生啦，唔知佢幾時先會知道呢件事呢？到佢知道嘅時候，唔知佢會唔會嬲呢？唔知佢會有咩反應呢？

好耐冇打日記啦，今日先開始打番咋，我由宜家開始會盡量打番日記，將我開心同唔開心嘅事都一一咁記定，到第時老咗嘅時候可以睇番同回憶番。

今朝有件事令到我好嬲架。

今朝我打比frankie嘅時候，佢居然唔聽電話，跟住我咪SEND段訊息比佢囉“你又仲咩唔聽我電話呀，我發覺平均打10次比你，你先聽一次，萬一我有咩事要即刻搵你，咁點算呀”，點知佢收到訊息之後打番比我，佢居然講話唔記改個鈴聲，所以聽唔到電話響，我聽到呢個解釋仲嬲，我都唔明點解佢可以咁對我，大家返工嘅時候，聽唔到我電話，我就算啦，點知佢宜家連朝早同夜晚都係咁，我真係好嬲囉。

我真係好想知，我係佢心目中係喺咩嘢位置囉，問親佢，佢就話係第二位，但係佢做出嚟嘅嘢就唔似囉。佢都知我哋大家見面嘅時間已經好少架啦，成日只係可以講電話，點知佢連講電話啲時間都唔比我，我真係唔知咩嘢叫做拍拖囉。

今日成日都係咁頭痛呀，可能係發燒啦，尋晚先探熱，燒到 102 度，今日雖然係跌咗少少，但係都有 101度，我有諗過唔返工架，但係當我諗到宜家屋企所有嘅開支都落係我度嘅時候，就唯有頂硬上啦，只係唔可以比FRANKIE同亞妹知咋，如果唔係就大件事啦，佢哋一定會鬧死我，所以我決定唔講。

其實尋晚落去搵佢哋嘅時候我係好頭暈同個心係到痛緊架，但係因為我想爭取多啲時間見FRANKIE，所以我忍住痛都要落去，仲要扮到冇事咁，希望可以暪住佢啦，但係唔知佢哋發唔發覺到呢？

今日我幫老細搞架貨車嘅牌簿，但明明係英利間公司講錯啲資料比我聽，唔係我錯，咁我咪同老細講囉，點知佢唔諗辦法事少，佢仲係電話邊講咗句“你老味”，我聽到之後好嬲囉，明明唔係我做錯點解要鬧我，就算係鬧都只係鬧我一個呀，仲咩要連我老豆老母都鬧呀，佢哋無孤架，所以我今次為咗老豆老母，我一定要辭職囉，我唔想老豆老母無端端比人鬧囉。就算佢同我講番SORRY都冇情講囉。雖然話佢返朝9晚5，5日半返工，但係唔準時出糧，又冇嘢做，仲要幫佢哋照顧埋D貓，我整親搞工傷佢哋又唔理，強積金又唔供，有咁多犯法嘅事，為咗自己著想，都係早D走好呀。

但係我又要諗，我應該見成先辭職呀定係辭職先見工呢？

仲有我係咪應該做得串D，見成份工之後就去醫院睇醫生，跟住就比份“永久不適合現時工作”而辭職，咁我就可以唔駛補番一個月通知期比佢仲可以即刻走添。

其實係佢逼我架，我唔想去到咁冇彎轉架， 只係佢唔肯搞我D工傷在先架。仲要咁樣嚟鬧我，係佢逼我架。

今日我幫老細去英利度搞啲續牌嘅嘢，明明係英利間公司講錯比我聽，我至做錯咋，點知同老細講，佢唔但止冇體諒我，仲講句“你老味”，我聽到之後好嬲囉，我好想問佢囉，點解要咁樣話我囉，佢鬧我一個我都忍呀，但係佢鬧埋我老豆老母就唔得，呢件事我一定唔會就咁算囉，我一定要辭職囉，我唔想再做中間人囉，成日比佢兩公婆鬧囉，佢兩公婆嘈完咬就搵我嚟出氣，我忍夠啦，唔想再忍啦，我決定聽日或者星期一同佢講“我要辭職”。

我宜家只係諗見成工先同佢講呀，定係講咗先呢，等佢請定人呢？

我一定唔會補番一個月通知期比佢囉，但係點樣可以令到佢唔駛我補番一個月通知期佢呢？

我真係頂老細同老闆娘唔順啦！

首先，我食飯嘅時候，我用咗半個鐘左右去圖書館度借書，點知去到冇幾耐，老闆娘突然打比我叫我即刻番去話老細有票要我開，但係我話宜家係我嘅食飯時間喎，我可唔可以係食完飯之後先番呀，點知佢話老細等緊呀，如果你唔番就以後都唔好番，我聽到之後就好嬲啦，點解要我食飯時間做公司嘢，咁我即係有冇食飯時間架。

跟住，就係我最嬲嘅嘢啦，就係老細叫我同老闆娘攞支票開票比人，咁老細叫我同老闆娘講聲唔會開抬頭架，點知老闆娘叫我問下間公司應該開咩抬頭，咁我咪照做囉，跟住人哋間公司就問一句張票開幾時架，咁我咪照事實答佢開23號，點知人哋間公司聽到就話唔得要自己打比老細，跟住間公司就打嚟同我講話同老細講好咗開18號，點知啱啱收線老細就打嚟發晒火問我點解要打比嗰間公司，我咪話老闆娘叫嗰囉，跟住佢就打比老闆娘啦。

跟住先係我最嬲嘅嘢呀！我攞番啲支票落去舖面嘅時候，見到老闆娘同老細講緊電話，老闆娘一見到我就收線，跟住就鬧我“叫你問人開咩抬頭，你就講埋票期”，我咪即刻答佢囉“係人哋問架咋”，跟住老闆娘就好大聲咁叫我“stop”，跟住我咪收聲比番啲支票簿同單佢囉，點知佢一接到手嘅時候就發晒脾氣咁拋埋一邊，我見到真係好嬲囉，我好想同佢講囉，我都有亞媽生架，我嚟打工架咋，唔係嚟受氣呀，唔好少少事就對我發脾氣呀。

我番到上寫字樓，我好想打比老細同佢講我唔做啦，你搵個第二個幫你啦。因為我真係頂唔順呀！