今日係我第一日係屯門度番工，但係做咗半日咋，點解，我都唔知喎。

今日食飯嘅時候，我喺公司搵啲舊資料睇吓啦，想快啲上手咋，點知我亞頭話我未問過佢就搵佢啲嘢，佢唔鍾意，咁就話我唔適合份工喎，叫我走喎，佢話出番今日份糧比我$250，我聽到之後好奇怪囉，點解我搵公司啲舊資料嚟睇，佢話唔得囉，我聽到真係唔知比咩反應佢囉，真係好奇怪囉。

不過都好嘅，因為今朝我仲担心緊番工啲錢嘅問題，點知佢就話唔啱我，叫我走仲比番今日人工我，我真係唔知多謝佢好定係求佢比我繼續做好。

唉！又跌咗落去失業人士度啦，唯有搵過份工啦，我搵工好快嘅姐，希望可以快啲搵到嘢做啦，冇做嘢成半個月啦，所有嘅錢都用完啦，點算，下個月都唔知點算，細b又要奶粉，大b又要交學費，總之樣樣都係錢啦，真係好頭痛呀。

有時一諗到屋企樣樣嘢都係錢，但係屋企又冇錢，我真係想死咗去算啦，死咗就咩嘢都唔駛諗囉，又唔駛担心大細b有冇得食，有冇書讀，梗加唔駛煩屋企嘅嘢，咁幾好，我真係好想死呀。

有冇人可以幫到我呀，一係比我死，一係介紹份工比我呀，等我快啲離開呢個咁嘅生活呀，我真係好辛苦呀，我真係頂唔順啦！help！

我轉咗工啦！

雖然都係喺屯門，但係已經唔同咗公司，起碼唔駛對住啲八婆先啦，我係先前間公司真係做得好辛苦，我真係頂唔順啦，所以我一定要轉工。

宜家係間做物流嘅公司度做會計文員，朝9晚6，5日半，但係人工一樣，做嘅嘢都係一樣，希望呢間公司我會做得開心啲，做得長啲啦！

我終於知道幾時攞鎖匙睇屋啦，10月6日，但係未知時間，因為係我自己打上去房屋署度問架咋，所以只係知道個日期未知時間，但係要唔要都成問題，始終都係細過我宜家住呢度少少，對大細b嚟講會好麻煩，我真係唔知搬唔搬好。唉！到時先再睇啦，睇到間屋先再算啦！

今日係中秋節翌日，我，frankie同亞齡去咗尖沙咀睇匯演，其實我同frankie己經睇咗好多次架啦，所以覺得冇咩特別，跟住就整手臘，我同亞齡整咗一隻先，大家睇吓！

跟住就到我同frankie整啦，隻手個形狀係我同佢諗架，大家睇吓，比啲意見呀！

整完之後，我哋去咗打邊爐，夏天大熱天時打邊爐，我都係第一次咋，不過都係喺酒樓，所以都唔係覺得好熱，食完之後我哋就搭車落去佐敦再搭巴士番嚟啦，嗰陣時已經係12點架啦！

今晚我真係好開心呀，因為今日係我同frankie第一個過嘅節日呀！

今日我上房屋署度揀新屋，點知我上到去先知兩房大單位比人揀晒，我呢只可以揀細單位，但係個細單位仲要細個我宜家呢個單位，仲要比貴咗租喎，我梗唔肯啦，點知嗰度啲職員同我講，係得呢啲單位架啦，咁你要唔要呀，要就入去搞手續啦！如果唔係就取消今次揀屋，等下次再有嘅時候再申請啦！