今日我睇咗亞妹嘅日記，當我睇到佢話心臟病發嘅時候，我好嬲囉！

點解？咪就係佢唔聽人講嘢囉，師傅一開始就己經講過如果佢再同呢條人一齊佢就會有性命危險，佢唔聽，一意孤行要同呢個結婚，好啦，宜家結咗婚都唔夠一個月就話入醫院，咁大家話啦，師傅係咪好準呀。

師傅仲要話佢個肚未必出到世，咁佢個日記都話醫生話個bb比正常嘅週數細咗一個禮拜，可能會影響個預產期，同埋呢心臟病葯會影響bb嘅發育，咁咪即係又應驗咗師傅嘅說話囉。

等佢仲話師傅一呢都唔準，宜家單憑呢兩件事就可以講得師傅有幾準啦。

唉！不過，都係都係唔好理咁多啦，佢唔聽人講都冇佢付，只係唔想佢呢兩個大人嘅嘢累到下一代就得啦，因為個bb始終都係冇孤架。

今日我同亞齡傾電話嘅時候聽到一個好過份嘅消息呀！

亞齡話周寶雯居然曾經講過，樊詠詩嘅出世係用佢先前冇咗嘅bb交換架，所以佢唔會錫詠詩，我聽到之後好嬲囉，你個bb出唔到世係因為個男人唔負責，話唔要，同埋係雙方家長都讚成嘅情況下落嘅，佢自己當時都心甘情願，點解事隔咁耐，佢居然將個責任推係細b身上呀。佢真係好過份囉，唔完全唔諗下，佢一開始話比人聽佢有咗嘅時候，係邊個第一個企出嚟叫佢唔好要個bb嘅，係佢個男人同埋雙方父母，唔係我呀，唔好做咗啲嘢之後，覺得後悔就將啲責任推晒係人哋度呀。

跟住亞齡仲話佢將賴寶啲琴譜同書攞晒去賣，原本仲諗住賣埋部電子琴嘅，好采亞齡醒目，話攞係佢度，如果唔係就大件事啦。咁我聽到之後就諗到唔諗咁同賴寶講，叫佢攞番部琴，賴寶聽到佢攞咗啲琴譜去賣嘅時候，好嬲囉，原來啲琴譜係賴寶借比佢用住先架咋，唔係送比佢架，當我聽到呢到嘅時候，我就叫佢一定要攞番部琴，如果唔係驚周寶雯有屋搬嘅時候，會攞部琴去放，到時真係喊到冇用呀。

好采，呢個妹都聽我講，佢一聽到之後都話一定要攞番部琴囉，咁樣都算係安心少少啦。

唉！我都唔明啲人架，唔屬於佢嘅嘢，點可以問到唔問一下就攞番賣架，賣到啲錢又唔比番人喎，唔通全部放係佢度啲嘢都係佢嘅咩，好心啲人做任何嘢之前諗清楚先啦。

今日係亞妹結婚嘅大日子，原本應該好開心嘅，但唔知點解，今日一啲都唔覺得屋企喺度搞緊喜事囉，可能係因為我哋個個都唔鍾意佢老公啦，唔知呢，總之今日就個個都唔開心啦。

但係我最嬲嘅事就係，佢哋結婚咪結婚，仲咩要老豆幫佢比住錢先呀，冇錢咪唔好結婚囉，冇錢學咩人娶老婆呀，連結婚嗰幾佰蚊都要女家出，咁樣咩人娶老婆娶新抱呀，冇錢就唔好結啦，宜家結遲一陣駛死咩，搞到要老豆比錢結婚，都唔知佢哋覺唔覺得醜架。

唉！宜家既然佢哋結咗婚囉，佢哋就一定要搬出去架啦，唔可以再係亞媽度住架啦，咁樣都好嘅，起碼唔駛再驚啲收數佬搞住亞媽先啦，係咪？但係另一方面，如果借結咗婚呢個籍口唔搬嘅，咁咪大件事，總之，佢哋一結咗婚就大把手尾跟啦，我覺得今晚嗰條仔一定會大條道理咁搬入亞媽屋企囉，因為未搵到地方呀嘛，嗰邊又唔比住囉，咁咪唯有住喺亞媽度先囉，等到搵到屋先搬囉，但係喺亞媽度好食好住，咁樣邊個會搬囉。

好病呀！

呢幾日病咗啦，所以冇打日記呀！

今日問老細借住500糧嚟睇醫生同返工，點知老細一口拒絶咗，佢話佢有好多數要過，所以借唔到比我，叫我自己諗辦法，但係我跟本就冇晒辦法，因為亞媽佢哋唔會再借錢比我架啦，咁點算呀，好病呀，好辛苦呀，感冒，咳，仲有少少燒添呀。唉！如果呢個時候 frankie 係度就好啦，起碼佢會幫我諗辦法等我冇咁辛苦先啦，借唔借到錢睇醫生己經係期次啦，最緊要係佢可以令到我冇咁辛苦先啦。

跟住我見老細唔肯借，咁我咪問梅姐囉，點知佢就用冇帶銀包嘅個籍口唔借，仲扮晒好人咁話幫我問人借喎，我聽到之後，我心諗唔借咪唔借囉，駛唔駛用咩呢咁嘅橋呀。我唔係去到冇路行，我都唔會問你借呀。

我終於知道咩嘢叫做你有難永遠冇人理你呢個道理啦！宜家啲人真係現實呀，冇事嘅時候就同你fd，但係當你有事問借錢嘅時候就...，唉！總之就慘啦，今次點算，病冇錢睇醫生，連返工錢都冇，又冇人肯錢，咁點呀，仲要到3月4日先出糧架，仲有成個禮拜呀，邊到搵錢返工呀。

今晚我照舊上師傅度請水。原先上到去都好地地嘅，同師傅、歐太個個都好好傾架，咁我都知道我一上師傅度就會見到惠姐嘅，不過我都照上，因為我同師傅講過我覺得飲水之後好咗好多，同埋我想師傅幫幫老公，等佢快啲搵到嘢做，咁好正常呀。

好啦，到惠姐上到嚟嘅時候，我己經開聲叫佢“家姐”，點知佢唔采我之餘仲對我黑口黑面，我當時好嬲呀，所以我成晚都冇再同佢講嗰一句說話。到我走啦，出門口著鞋嘅時候，我聽到師傅突然叫我，咁我咪望番入屋囉，望入屋嘅第一眼我就見到惠姐，佢見到我望番入去嘅時候，第一時間拎轉塊面，又係咁黑口黑面，我當時仲嬲得犀利。

我知佢嬲咩架，佢嬲我上個禮拜唔比希雯帶詠琳上師傅，嬲我對希雯嘅說話態度唔好(只係希雯講咋吓)，嬲我上星期六冇端端CUT佢線，同埋嬲我改咗電話呀嘛，我知架。

但係我唔明囉，第一，我係詠琳嘅亞媽，點解我唔比佢出夜街都唔得咩，一定要比希雯帶佢出去呢？雖然係希雯帶佢出去，我可以放心，希雯一定會睇住佢，但係詠琳始終都係細路女，去咁多夜街始終都係唔好，咁我先唔比佢去咋，唔通咁都有錯咩。

第二，嗰日希雯不停咁打嚟我手提，但係其實嗰陣時我係做緊公司嘢，跟本就唔得閒講電話住，但係佢就不停咁打嚟，問我點解唔比詠琳上師傅度，跟住明明係佢對我態度唔好先，佢仲對我講過一句說話，我先嬲咋，佢居然同我講“詠琳想上師傅嘅時候，你就唔比佢上;到佢要上師傅度而又唔上嘅時候，你就嬲佢，都唔知你想點”跟住就CUT我線，我當時真係好嬲囉，我好想問佢一句囉“係咪我呢個亞媽唔比個女出夜都唔得囉”，點知佢仲調轉頭同惠姐話我態度唔好，我真係好想知邊個態度唔好先囉。

第三，上個星期六，我唔係想CUT佢線架喎，只係咁啱個電話冇電，先CUT咗佢線咋，我之後都有打番比佢啦，係佢唔聽咋喎，有咩好嬲呀。梗何況佢講咗一句我好嬲嘅說話囉“宜家你係師傅，定師傅係師傅呀”我聽到之後，我覺得我呢兩個月嘅付出係唔係白費嘅呢，係，雖然嗰個先係師傅，但係上咗師傅度之後覺得點都係我覺得咋，所以我自己覺得啱啱開始好小小，我係咪應該繼續上呀，再加上老公啱啱又冇嘢做，咁我係咪應該得到老公都搵到嘢做先再考慮仲上唔上師傅度請水呢？

最後，我改咗電話嘅問題，我更加唔明佢嬲咩，我改電話關佢咩事呢，點解佢一知道我改咗電話咁嬲呢，呢點我真係唔明囉，唔通我改電話都要問過你一聲先，唔好唔得呀，你只係我堂家姐咋，唔係我亞媽呀，我做啲咩嘢唔一定要同你交待呀嘛。而且我改電話都係為咗加大嘅PLAN佢咋，如果唔係我期期電話費都會爆呀，好似今期咁，我要交247蚊電話，打多咗247分鐘呀，但係你只係會比番100蚊，但係我個電話費原本只係要交68蚊架咋，就算扣埋你嗰100蚊，我自己都要比多79呀，唔通我又問你攞番囉喎，你都唔會比啦，係咪先，所以我都唔明你有咩好嬲。

總之，今晚我真係好唔開心，好嬲囉，兩姐妹為咗啲咁嘅事而搞到大家面阻阻為咩呢？不過你要繼續嬲嘅，我冇辦法，我只係想同你講聲多謝呢三個月你對我同我家人嘅照顧。我會用時間去改變你對我嘅感覺。