今日社署筆錢終於到手啦，雖然唔係好多，但係都好過冇啦，起碼幫到我宜家啲生活先啦。但係始終都係靠人嘅錢，都係唔好攞咁耐，因為要同啲亞婆爭錢用，好似好衰咁，所以都係快啲搵嘢做，咁樣先係靠自己對手搵錢架嘛！咁樣先之洗得安心架，如果唔係會好似用緊亞婆啲錢咁，所以我始終都係想靠自己搵錢洗，但係有冇人可以介紹到工比我呀，最好就係PART-TIME，咁樣先可以瞞住社署，唔該呀！

我病咗啦，今日好唔舒服，大傷風呀，不過配咗葯食，但係食完啲葯就好眼瞓，可能係唔舒服呱，唔知呀！

今晚我同frankie傾佢公司啲嘢，我終於知道點解佢一直堅持唔比我去佢公司到幫佢手啦，原因係karen話佢耳仔軟，容易受人影響，所以karen叫佢請咩人都得，係唔好請我，我當時聽到我好嬲囉，因為由11月開始間公司係佢嘅，佢做老細嘅，而我會係半個老闆娘(呢個係我諗嘅咋，佢可能唔係咁諗嘅)，點解我作為佢身邊嘅女人，幫佢手打理公司都唔得，幫佢手要人批准，我好嬲囉！

不過，karen講得啱，佢如果唔係耳仔軟，佢就唔會聽karen講，情願上網請人到唔叫我幫佢手啦，我有時發覺佢聽karen講多過聽我講囉！我有陣時又係度諗既然第時佢接咗手之後都係karen教佢點做點做，跟住又問我意見，問完我之後，佢係buy karen嗰套多過我個套囉，咁點解要問我呢？

我好想知，點解人哋嗰啲女人，如果佢男人係做老細嘅，個女人會出嚟幫手，實行兩公婆齊齊拍住做，到真係做得辛苦嘅時候先請人，咁先係架。但係佢呢？只要karen講一句唔好請joey，佢就話唔想我幫佢手，佢請人，我真係唔係好明佢諗緊啲咩，我好想問佢我究竟係唔係佢個女人，點解我係佢個女人嘅時候，佢出嚟做老細，我呢個女人就一啲都唔可以幫佢，我好想知道呢個答案。

所以，對於佢點解唔比我去幫佢手打理間舖嘅問題，我已經心死啦！總之，我joey宜家係度講嘅，如果佢係諗住叫我得閒先落去幫手，咁就不必啦，因為我個心根本就係諗住全心全意咁幫佢手呀，而唔係好似啲二打六，得閒就出現，得閒就失踨嗰啲人呀，佢究竟要到幾時先會知道我個心係點諗嘅呢？仲要係佢知道咗之後會唔會改變到佢一定唔可以請我呢個joey幫佢嘅諗法呀？

我真係好辛苦呀，有冇人可以幫我同佢講，我個心諗咩呀？please！

今朝我打去問咗社署我個綜援嘅審批結果，好開心，因為個結果係批咗架，下個禮拜一或者二會過到收去我戶口，我真係好開心呀，趕得切係我生日前比到錢，等我可以有錢過生日，我諗呢份會係我今年最好嘅生日禮物呀！

晏晝，我去咗見工，一份係屏山，做會計，返朝8晚6，$6500，我一見完就同自己講就算佢請我，我都唔做呀，要我返大陸呀，我有案低點出境，雖然個個朋友都話可以出境，只係唔可以移民，但係我都唔係咁想啦，大陸啲治安咁差，到時又得我一個番大陸，點番呀，咁大件事，雖然以前都試過因工作原因番大陸，但係嗰陣時未有呢兩隻化骨龍，所以唔駛諗屋企，但係宜家唔同啦，要任何決定都要諗佢哋兩個先啦！

另一份就係洪水橋，都係做會計，返朝9晚6，$7000，我去到嘅時候，我女仔同我講，我應該冇咩問題嘅，因為我有好多會計經驗，佢會同老細講架啦，會係呢個禮拜內覆我請唔請喎，呢間公司就做雲石嘅，而我只係做會計，拍住見我嘅女仔一齊做，所以唔難做嘅，佢都話我好啱呢份工，我覺得呢份工會請我嘅，希望啦！

今晚，我個心係到痛，痛到我想死，但係我又唔想番醫院，所以我唯有忍，只係食啲止痛葯就算啦，跟住瞓咗一陣，一瞓就9點啦，但係frankie佢一直都冇打過比我，咁我咪打比佢囉，點知佢話佢仲做緊嘢，未走得住，到算佢啦，肯遵守佢對我嘅承諾，所以我冇怪佢，但係我好想同佢講我個心好痛，想見佢，但係我知道我一同佢講咗之後，一定會影響佢做嘢，所以都最後都係冇講到lu！希望佢睇到呢篇日記嘅時候唔好嬲啦！

今朝一早就起咗身啦，瞓唔到呀，點解？咪有係啲朋友嚟咗探我囉，我個心痛咗成晚又哮喘病發，好辛苦呀！可惜我係一個唔鍾意睇醫生嘅人嚟架，所以就算痛都好，我都冇睇醫生，因為我知道我一睇醫生就會好大件事，一定要留院，但係我今晚約咗frankie出街，所以我決定唔去，同埋唔可以比佢知，我成晚冇瞓，因為我唔想佢担心我，佢己經好多嘢煩緊，我唔想佢再煩埋我啲嘢，我唔想佢咁辛苦呀，咁樣對佢好唔公平同埋會好大負担架。

到咗晏晝，我過咗天晴邨度睇新屋，明知冇錢根本就比唔到租同按金架啦，但係我都想睇吓間屋，所以我照信上面嘅時間過去。點知過到睇屋嘅時候，我真係嚇咗一跳囉，比我想像之中仲要細呀，個主人房只係可以放得張雙人床就咩都冇啦，咁點瞓。個廳如果諗住間房就大件事啦，因為當間咗房之後，個廳就冇晒位架啦。之於個廚房同廁所就更加唔駛講啦，細到嚇親人啦，我真係唔敢想像如果我要咗嗰間屋之後，我個生活會係點囉！

到咗夜晚，我不停咁frankie，睇吓佢係邊，想係邊度同我食飯，順便話比佢聽我今朝個心痛同哮喘發作嘅時，點知我由4點鐘開始打電話打到6點都冇人聽，我當時真係好嬲囉，點解佢次次應承我嘅嘢都做唔到嘅。有時我係度唔係唔愛我呢？佢係咪想分手呢？我哋呢段感情係咪就咁完呢？佢係咪唔想再理我呢個病人呢？我唔想囉！我一路諗就一路喊，喊得好犀利。尋晚我終於同佢嘈啦，點知佢居然話我唔體諒佢，鬧佢，唔幫佢諗辦法解決問題，我聽到就更加傷心，我當時真係好想同佢講分手，但係我講唔出呀，因為我真係唔想冇咗呢段感情呀。

有冇人可以教我點做呀，我好煩呀。唔通我想我男朋友陪我食飯都有錯咩？我真係諗唔明囉！

今日我，詠琳，frankie同伯娘一齊行屯門市中心，一開始我，winnie同frankie先上咗去伯娘屋企度玩一陣狗同埋同伯娘傾一陣計，到12點左右我哋開始出發去屯門市中心食肯德雞，winnie一食就食咗三隻瑞士雞翼，飲咗盒蘋果汁，我末見過佢食咁多嘢架。

之後，落咗去兒童部買對涼鞋比佢，因為佢嗰對爛咗，所以逼住買嗰對比佢。跟住帶咗佢去玩具反斗城，佢呢個細路一入到去就周圍走，唔識停，一開始佢都冇扭買嘢，但係都咗最後嗰少少路就...，唉！扭買啲學英文字嘅串字遊戲，當然，都最後我哋幾個大人都要屈服係呢個細路手上啦！

到走嘅時候，winnie好唔捨得，一番到屋企佢就問，幾時再同frankie哥哥去街呀，今日我玩得好開心呀！

今日winnie嘅一舉一動都好似人哋嗰啲鄉下出城咁，玩唔停，發現咗好多新大陸，哈哈！