我要辭職！

今日老闆娘唔知仲咩，痴咗線，係咁喺度鬧我，我都冇得罪佢，佢點解係咁鬧我喎。

事原係咁嘅，今朝11點幾嘅時候，佢突然同我講要趕住去入數，咁佢比咗8張100蚊紙我，同300蚊廿蚊紙我，叫我即係去銀行，咁我咪出去囉，點知行到半路佢突然叫停我，問我點解唔搵其他舖頭換咗啲廿蚊紙先去銀行，我咪話銀行都唔多人，跟住佢就係條街度鬧我點解唔聽佢講嘢啦，我聽到之後就好嬲呀，但係都冇諗住辭職嘅。

但係到咗12點半左右，我就真係想辭職啦，咁公司要報稅，咁我先前問過老細啲報表係邊個簽名嘅，佢話老闆娘，我咪照做囉，點知今日比佢簽名嘅時候，佢打比老細，老細就話以後有咩嘢要比老闆娘簽嘅都要比佢睇過先，我聽到之後咪同老闆講囉，老細知架喎，咁我講嘅都係事實呀，佢居然係樓下舖面當住啲客面前鬧我，話我點解又唔聽佢講嘢喎，點解要講番轉頭喎，我聽到之後，我當時好想喊囉，又唔係我錯，點解要鬧我喎，我都係想同你講番清楚件事咋，你鬧我都冇用架。

我今日冇端端比佢鬧咗兩次，我真係好想即刻同老細講我唔做啦，我想辭職呀。我真係好嬲呀！唔好以為係老闆娘就可以亂咁鬧人先得架。

今朝返工嘅時候，係天瑞輕鐵站度撞到老豆，佢咁啱出去元朗同四姑媽飲茶，我成程車都係望住老豆隻手，佢隻手上面多咗好多啡色嘅班點呀，我知道呢啲係老人班，每個老人家都會有，但係唔知點解我見到老豆隻手嘅時候，我個心即刻酸架，我當時好想喊呀，但係因為係架車入面，我忍住唔喊架咋，跟住見到老豆個樣，一次比一次老，我個心唔知點咁呀，好難形容呀，總之就好傷心啦，因為個個亞伯亞叔姑媽姑姐都冇老豆老得咁犀利呀，我見到真係好傷心囉，我見到嘅時候，我真係覺得自己好對唔住老豆呀，養到我咁大，仲要佢担心我，我覺得自己好不孝呀。

我又係度諗，如果我當初生性啲，唔好比咁多麻煩佢老人家，可以宜家佢已經退休，日日坐係屋企湊孫啦。

計埋今日，我己經第6日冇得去便便啦，我好驚係便秘呀！

我又冇錢睇醫生或者買通便劑。就算有，呢啲咁瘀嘅事點同醫生講喎，去到葯房又點樣開口同人講要通便劑喎，好難開口架嘛，所以我最後都係冇做到，更加冇同人講過啦。

到咗今晚，我終於忍唔住同老公講呢件事，佢只係叫我飲多啲水，但係我啲幾日每日都飲好多水架啦，但係都冇便便呢，點算呀。

咁瘀嘅事點同人講呀，如果唔同人講，我又可以點做呀。有冇人可以教我一啲好嘅方法，唔駛比人知又可以去到便便嘅方法呀。

今日食完飯，老細叫我打封離職信比個同事簽，因為我唔知佢哋想要咩嘢格式，所以我打完之後就係樓梯口度睇吓見唔見老細，點知，事頭婆就鬧我點解唔係番寫字樓度做嘢，要係個樓梯口度行行企企，佢話咁樣會影響下面舖面嘅運作喎，但係我只係喺樓梯口咋，點會影響你嘅運作呀，同埋佢又唔諗吓寫字樓嘅嘢我己經做晒好耐啦，跟本就冇嘢再做，我日日反嚟都係只係得個坐字，好悶架嘛，唔通行吓都唔得呀。

另外，佢仲鬧我好問啲同事借錢喎，話屋企嘅嘢唔好帶番嚟公司喎，又話公司冇一條規矩係預支糧嘅，但係佢哋下面舖面啲同事個個都可以預支糧，點解我唔得呀，唔通下面舖面嗰啲就係伙計，寫字樓就唔係呀，點解你哋舖面做嘅嘢，寫字樓唔得呀。

佢仲鬧我，點解要將公司嘅來貨價話比啲同事聽呀，我係做會計嘅，應該有會計嘅專業操守，唔應該將公司啲來貨價亂咁講比人哋，但係大家同事唔通趕住交貨比人又唔知開幾錢比人都唔講咩，我真係覺得呢份工好難做呀。

我真係想即刻同佢講，我唔做呀，反正我今日走都未夠三個月試用期，我只要做多7日就可以走囉，到時我睇你哋邊到搵過個會計幫你手。

好耐冇打日記啦，因為早排冇咩特別，所以就冇打到啦！

今日有樣令到我好開心同興奮呀！

bb今日可以自己轉身啦，佢仲係我張床度轉嚟轉去，轉得好開心呀，轉完仲學爬，但係只係識得向後爬咋，仲未識得向前爬，佢轉完身仲對你笑，呢樣先令到我開心嘅事呀，因為佢轉完身唔係驚而係開心，我見到佢轉完身之後望住我笑，好似想話比我聽“媽咪，我終於可以自己轉身啦！”，我見到佢笑，我就由心嗰到笑出嚟，嗰一刻真係好開心架。

但係到咗今晚就慘啦，我同亞b玩咗一陣跟住去沖涼，點知當我除咗面衫嘅時候，我聽到亞b喊得好大聲，咪即刻出去睇嚟，點知亞b已經跌咗落床，仲跌到個咀留晒血呀，喊到佢收唔到聲，我見到嘅時候真係心痛呀，咪即刻幫佢止血囉，可能亞b痛啦，佢係都唔肯跟我，跟老豆，要老豆抱，當老豆抱番嘅時候咪啲水佢飲，等佢定啲先囉。

到咗bb瞓咗嘅時候先睇佢傷嘅情度囉，點知係就出牙嘅地方瘀晒呀，仲要一掂佢，佢就縮，我見到真係好心痛呀，仲不停咁鬧自己點解行開嘅時候唔放好佢先呢，因為佢宜家識得轉身，睇少一陣都會好危險架。不過，自責到冇用啦，因為亞b都跌咗囉，唯有下次行開嘅時候放好啲佢啦。