尋晚我發夢嘅時候，夢見frankie同我一齊，去呢度去嗰度，最後仲結埋婚，我當時真係好開心呀，雖然我知道唔係真嘅，同埋一定唔會發生添，但係我都覺得好開心呀。

今日我坐k74返工，經過朗屏嘅時候，我好想落車去搵佢，佢係我知道唔得，因為我要趕住返工，同埋我唔知佢想唔想見我，所以我到最後都冇落車。到咗元朗嘅時候，我真係好想去搵佢，更加想打比佢，但係我都係冇勇氣打比佢。所以我就算有幾掛住佢都好，我都係冇搵佢，因為我唔知佢想唔想我搵佢呢？所以係我未知道答案之前，我係唔會搵佢架，我唔想大家見面嘅場面係唔開心架，所以我唯有繼續用掛住佢嘅心情嚟等佢嘅答案，希望有人會幫我搵呢個答案啦。

今日惠姐打嚟比我，問我白生係咪打過比我，而我cut咗佢線，我話冇，佢又唔係好信我講。

跟住佢問我係咪冇還錢比人，仲話白生講好咗一個月還兩次錢喎。但係我跟本就冇應承過，全部嘢都係亞媽同個白生講咋，我完全唔知咩事。

我好記得當初亞媽同我話白生叫入咗$2000蚊之後其他嘅可以分期還，佢仲應承人哋4號一定會入到比佢添，咁你既然應承咗人嘅，我又唔想搞到佢同伯伯度，咪咩嘢都唔交住都還咗錢先囉。點知到咗今日出事嘅時候同佢對質，佢居然死都話冇講過，仲要話係我自己同人哋傾嘅，佢唔知，我當時聽到好嬲呀，明明係佢自己講嘅，仲咩都有事嘅時候就一句話唔知，咁就算數呀。係，雖然啲錢係我借嘅，但係你講嘅嘢，都要負番啲責任呀，唔好有事嘅時候就推卸晒呀，真係激死我呀！

冇端端比人屈，屈我自己同白生承諾咗每個還兩次，但係我真係搵佢唔到，咁點同白生傾呢，我真係唔明囉。個白生講嘢，亞媽就信到十足，我講嘅就一句都唔信，都唔知佢諗緊啲咩架。

今日唔知點解個人覺得好悶呀，唔係咁想講嘢呀！

可能係尋日嘅事啦，今日老細兩公婆都係黑口黑面咁對住我，我有時係度諗，我係咪應該轉過份工呢？

仲知我就仲係嬲老細點解尋日要咁樣嚟屈我做錯嘢喎。

尋日，太子嗰同事偉興同我講，會叫亞珍攞啲文件比我。咁我今日一開工嘅時候，就問老闆娘攞番啲文件，諗住係寫字樓到做嘅，點知佢就話唔得閒住，轉頭先。過咗一陣之後，佢突然間走上嚟寫字樓度同我“亞甜小姐，如果啲嘢唔急嘅，你打咗電話比我先呀，等我預備好之後會再叫你落嚟攞架啦，你唔會冇端端走落嚟又唔出聲呀，我唔知你咩事架，我會以為我老公有嘢要你搵我架，所以唔該你下次啲唔急嘅嘢，你打咗落嚟比我先啦，好唔好？”我聽到之後好嬲呀，我問你攞文件做嘢，你居然話我冇端端走落嚟，我當時真係好想嘈佢囉，當然梗係冇啦，只係自己嬲囉同埋只係答佢一句知道就算囉，我都費事再同佢講咁多嘢啦，費事講多錯多呀！

今日比老細嘈呀！

事原係咁嘅，今朝一開工嘅時候，老細叫我幫佢入咗條供車嘅票，跟住我就問老細啲收錢嘅問題，當時老細只係講咗一句“等我番嚟先搞”，跟住佢就走咗啦。

到咗食完飯番到嚟啦，佢又番咗嚟喎，佢就問我供車張票入咗未，我話入咗啦，跟住佢就發晒脾氣咁話“我都冇叫你入，我都話等我番嚟先搞囉”，跟住就好嬲咁衝咗出去，一去就到咗4點鐘先番嚟。

一番到嚟就係咁鬧我點解唔聽佢講嘢喎，但係我心諗明明係你叫我入咗條票先，其他嘅嘢等你番嚟先搞嘅，宜家就屈我，我當時梗係冇咁講啦，只係講句“sorry”就算啦，跟住佢鬧兩句之後就叫我以為聽清楚佢講嘅嘢，因為佢只會講一次，唔會再重覆架啦。

佢仲叫我唔好同啲同事傾咁多計喎，因為我呢個角色係唔應該同舖面啲人有任何關係喎，叫我自己留意吓喎。我聽到之後，我真係好想問佢囉，點解唔可以同啲同事傾咁多計，唔通做寫字樓嘅同舖面一定係唔夾嘅。

我今日全日都係好嬲呀，好唔開心呀！好采，放咗工之後，一見到老公就同佢訴苦，佢都企係我嗰邊，佢仲教我，如果下次老細再叫你入票嘅話，你就多口問多一句係咪呢啲票呀，老細話咗係先好去入票，如果唔係又再比人鬧架啦。我聽咗之後，我都覺得係嘅，咁樣起碼係老細叫嘅，有事我都唔駛食得咁甘呀！

今日係我用新呢個日記嚟到繼續我嘅生活史。

呢幾日我病咗啦，感冒呀！但係今日就好嚴重呀，鼻塞又喉嚨痛，仲有啲燒添呀，見到自己病，再諗吓屋企嗰兩隻恐龍，唯有係唔想同唔願意嘅情況去咗睇醫生啦。

醫生話我係一啲鼻病毒引起嘅感冒喎，我聽咗之後都唔明佢講咩，嗰醫生就話係比感冒更加犀利嘅病，就算打咗流感針都冇用嘅病，一定要另外睇醫生架，我聽完都係唔明架，唉！不過算啦，啲醫學常識，我哋呢啲普通人又點會識呀。

跟住當然唔少得我最驚嘅嘢啦，咩嚟？咪就係打針囉，當個醫生同我講打枝針好唔好，我一開始都係話唔好，但係個醫生同我如果我唔打針就會冇咁快好同埋會傳染到兩隻恐龍，我聽到之後話會傳染比佢哋之後就驚住咁比醫生打針囉。

唉！我究竟幾時先可以逃過打針呢個惡夢呀，次次睇醫生都要打針，我真係打針打到驚呀，有冇人可以救吓我呀。