人地年廿八大掃除，我就年初四先黎大掃除 ~

冇法啦，呢幾日都去咗姨媽度，

自己屋企都冇咩點返過。

難得今日冇節目，咪執下屋 lor。

原來我屋企真係有好多碟，

正版既都有幾多，不過翻版仲多

今次撿屋搵返好多正野，

全部都好值得回味 ~

撿完屋，冇聊就開咗隻碟黎睇，

叫男歌女唱，係梅艷芳同黃子華做既 ~

套戲幾好睇嫁，

雖然表面睇好似係一駒笑片，

但其實係好有意思。

如果有人有興趣可以問我借隻碟黎睇嫁 ~

入面首主題曲都好正，

係陳百強既「等」，

不過電影係梅艷芳唱既版本，

我放咗上黎嫁啦，大家不妨聽下 ~

TODAY 'S 歌詞 :

等　寂寞到夜深　
夜已漸荒涼　夜已漸昏暗
莫道你在選擇人　人亦能選擇你　
公平原沒半點偏心

@ 苦澀　慢慢向著心裡滲　
何必抱怨　曾令醉心是誰人
自願吻別心上人　糊塗換來一生淚印　
何故明是痛苦傷心

還含著笑裝開心　今宵的你可憐還可憫
目睹她遠去　她的腳印心中會永印
糊塗是你的一顆心　他朝你將無窮的後悔　
這一生你的心裡滿哀困 @      

repeat @               ( 等 - 梅艷芳 )

我都好耐冇放過歌啦，

放假放到個人冇晒靈感 tim，

睇黎要搵 d 野刺激下啦 ~

今日 0800 就要起身啦，

姨媽話要早 d 入場攞個紀念品 wor，

佢話唔早 d 去就冇嫁啦，好快就會派晒。

好耐都冇試過咁早起身啦，

成個人噩下噩下咁 ~

仲以為姨媽會識路去馬場 tim，

點知原來姨媽都唔係好識 @.@

最後我地去咗搭港鐵。

去到火炭，我地就亂撞，

點知撞下撞下又去到 wor，

原來馬場離沙田 IVE 都幾近，

如果放學去都幾方便 ~

去到都已經幾多人係門口，

不過因為未夠鐘，所以都未開門。

可能今日係賀歲盃既關係，

所以有 d 記者係度影相 ~

終於都等到夠鐘入埸啦，

入到去俾我既感覺好似返留去以前既陸運會咁，

因為個格局好似，不過梗係馬場大好多啦 ~

我同姨媽揀咗個好前既位，

個位係可以睇到 d 馬衝線個下，好正 ~

不過個位冇遮冇掩，今日仲要好大風，

所以都幾辛苦。

1000 入到去都仲未有野睇住，

1235 先開始跑第一場，

好慘呀，食風食成兩個鐘 = ="

好彩今朝買咗本 face 黎睇，

今期仲有 JIN 既專訪 tim 呀 ~

係等跑第一場既果兩個幾鐘，

其實仲有 d 表演睇，

有林峯、阿蘇、麥玲玲同埋汪明荃 ~

小妍子係唔係好羨慕呢 ?

得到發霉終於都等到第一場啦，

其實我都唔覺同電視睇既有咩分別 ~

不過跟住大家一齊嗌幾號幾號上呀，

又幾好玩 wor ~

之後要隔半個鐘先再跑第二場，

入到黎冇理由睇一場就走嫁 ma，

所以又再等過。

到咗第二埸，我地又好似頭先咁企起身睇啦，

因為差唔多開跑既時候就會有好多人企係前面擋住，

所以一定要企起身睇 ~

點知今次有 2 條茅厘十下十下坐咗我地個位 wor，

我地已經放咗個報紙係張櫈度嫁啦，

個兩條友仲想坐落去 !

雖然我地諗住睇埋呢場就走，

但係我覺得人地放咗 d 野係度，

雖然只係一 d 報紙，貴重野都跟係身姐，

你都冇理由搞人地 d 野嫁 ma。

所以我就同佢地講個位係我地嫁，

等佢地坐得咁舒服丫拿 !

點知同佢地講完之後佢地都係照坐，

我都費事理佢地，佢地都白痴既。

好啦，睇完第二埸嘞，

我同姨媽都諗住拎返 d 報紙啦，

點知果個婆娘仲詰份報紙係佢嫁 wor，

佢係當我地係白痴丫定係佢真係咁白痴呀 ?

咁既野都講得出既 ?

係都要逼到姨媽出手鬧佢先安樂，

我係隔離睇覺得好心涼呀 ~

之後姨媽帶咗我去沙圈個度見識，

個度係俾人睇下一場馬既地方，

d 馬會係個度沿住個圈圈行，

咁 d 人就可以分析下場買邊隻好嘞 ~

原本諗住睇完就走，

但係姨媽叫我揀返隻黎買下 wor。

咁我咩都唔識又冇咩運 wor，

就梗係冇中到啦 ~

睇埋第三場之後我地再係馬場度行個圈就走 lu，

馬場真係好大呀，行個圈都行咗成半個鐘。

而且今日真係好多人黎，

度度都逼滿晒人 !

不過唔知點解我愈行愈唔舒服，

好似就暈就暈咁，

所以原本約咗阿媽放工之後行街都唔得，

要返屋企休息。

因為唔舒服，所以我 d 小姐脾氣又黎嘞，

咩野都唔想講，一講野就好忟憎，

我諗姨媽都知道我又發作。

但係姨媽都冇話我，佢只係默默咁忍受。

所以我覺得自己真係好衰 .................

返到上水，估唔到咁早都有車仔檔，

可惜冇我最愛既油渣麵，

不過都有好多其它選擇 ~

同姨媽買完之後拎返屋企食，

食完我就瞓 lu，

過咗冇幾耐我阿媽都返黎 lu ~

阿媽返黎之後，

姨媽仲走入黎睇下我瞓咗未，

姨媽以為我真係瞓著咗，

其實我未，我頭先咁樣對姨媽，

佢仲咁關心我，我真係好感動呀

瞓咗兩個幾鐘，

阿媽佢地就叫我起身出街食飯。

但係因為我未瞓醒既關係，

所以個人又忟忟地，

又搵咗佢地黎出氣 .....................

好彩佢地知我係咁，

習慣晒我既性格，所以都冇話我。

有時我真係好唔明，我都冇做過 d 咩，

點解身邊既人都對我咁好 ?

我覺得自己受之有愧。

我會咁諗可能係因為我太冇安全感，

我好驚如果有一日我做錯咗野，

佢地就會離開我 .........................

不過其實呢個諗法係錯得好離譜 !

正如 AYU 所講，

「我會盡全力保護我想保護的東西，

就這麼簡單。

因為有了想保護的東西，

因為邂逅了這些人們，

所以現在的我，很堅強。

以前我誰都不信所以很軟弱。

不過卻以為，

因為我孤零零的所以很堅強，

不過 ... 事實正好相反。」

我一定要好好記住呢個 point，

唔好再鑽牛角尖 ~

TODAY 'S 歌詞 :

N / A

今日瞓到點幾先醒，

點知瞓醒個陣我阿媽同姨媽已經走晒，

得返我兩個 dup 完骨返黎既兩個表哥，

同埋四姨 & 姨丈。

人地一家人突咗我出黎搞到我幾唔好意思

所以我就打俾表姐睇下可唔可以過佢度，

表姐話 OK，咁我諗住係四姨度擦埋牙先過去啦，

點知咁岩大表哥要用廁所，

咁我諗住好快姐，所以就等下啦。

我一邊等一邊同阿倫表哥傾計，

傾傾下都唔覺過咗成個鐘。

跟住表姐打黎問我係邊，

我就話仲係四姨度，

表姐就話我有冇搞錯，

頭先打俾佢個陣又話而家黎，

但而家過咗成個鐘都未黎到 !

嚇到我走都走唔切，

連 211 都冇搭就咁行落去黃大仙地鐵站。

個時又要拎住 d 新年禮物 wor，

拎到我死死下

去到表姐到，表姐同我講話表姐夫好嬲，

因為佢地差 d 煮咗麵，好彩未落我個份咋，

如果唔係都唔知點算啦 >.<

表姐叫我快 d 同表姐夫道歉，

個時我幾驚俾人鬧，

好彩表姐夫都冇咩野咋 ........................

之後表姐仲笑我係唔係想開年。

其實點解我有屋企唔返要過表姐度呢 ?

係因為表姐同表姐夫今晚就要飛啦，

佢地去渡蜜月，要兩個禮拜後先返，

原本諗住送佢地機，但之後佢地話唔洗，

費事要我同姨媽咁走黎走去 wor。

除咗因為送表姐機之外，

仲有一個原因係我今日要去表姐屋企既，

就係姨媽話聽日帶我入馬埸。

因為我已經 18 歲女啦，都未去過馬場，

姨媽就想帶我去見識下 ~

食完夜晚餐飯之後，表姐佢地就出發去機場啦 ~

今日晏晝同佢地執行李個陣，

就知佢地今次呢個旅程一定會過得好開心，

因為見佢地真係花咗唔少心思，

又做咗好多 research bor，

wish you have a nice trip !

兩個禮拜後見 ~

TODAY 'S 歌詞 :

N / A