八月五日，話說尋晚打機打到兩點，

但奈何要係張床典黎典去，最後三點先訓得著。

出乎意料地，今日我十點半就起左身啦，

個太陽今朝肯定係西邊升起……

起左身之後就練左好耐琴，主要都係彈果三首歌。

跟住，就打左篇BLOG同埋上左陣MSN。

兩點幾又出左去學琴（因為我呢個進度係極需要補堂），

話說今天好焗，條街好似個蒸籠咁樣，再加上多煙霞。

晏啲返到屋企就繼續寫文，用左15分鐘寫完篇「心目中的…老師」。

過左一陣，又要再出街啦，今次就同個uncle同佢啲朋友打波，

今次就真係出左好多好多汗啦，佢地實在太勁啦！

我真係唔明，點解呢排我出親街，幾乎次次都落雨。

而今日打完波都唔例外，話黃雨就黃雨，眨下眼又紅雨……

企係柴灣體育館道眼光光咁望住出面，又大風、大雨，行雷閃電，唉！

經過幾番波折之後，終於去到個uncle泊車果道啦。

最諷刺就係返到屋企，竟然停哂雨，一天都光哂，離哂譜……

太期待啦，聽日晏咒上番禺挽番兩日半，好野好野！

選自：http://hk.myblog.yahoo.com/yatcheung_1997/article?mid=4456

我真係覺得自己好冇用。

比人罵兩句淨係識得駁咀、比面色人睇、發睥氣 ，

成日都為左芝麻綠豆咁少ge事同人嘈，

一有少少野唔如意就好燥，唔通我啲EQ真係咁低？

體能又唔得，跑多幾跑，就扯哂蝦咁，點打波呀？

其實我都就黎考琴啦，成日都一時彈得好；一時彈到不知所謂。

雖然啲Scale就好啲，不過兩隻手始終有啲唔協調。

至於啲歌，我就連最基本ge「彈琴放鬆」都做唔到，學咩人考八級？

彈錯少少key，個心就開始好亂，跟住就越彈越快，

好似啲機關槍咁亂咁掃射，彈完都唔知自己彈左啲咩！

淨係識得死衝爛衝，投入ge感情又唔夠，唉！我都冇野好講。

我都唔明白，我已經比之前付出更多ge努力，多啲練琴，

希望可以彈好啲，考試考好啲，點知我所付出ge同得出黎個結果唔成正比例。

話說有人同我講過：「付出之後ge成果未必即時會有架！繼續努力啦。」

聽完呢句，更加心酸。我宜家已經好辛苦啦，又大壓力，又多野煩，

再加上唔夠訓，心理同生理都可以話係痴哂線。

我真係好驚，我唔知自己考完會有幾多分，救命呀……

我真係冇能力去撐落去囉，真係好辛苦呀！

可唔可以比一日淨玩、淨休息，冇煩惱ge日子我呢？