隔左幾日又係世界杯決賽既日子，對於阿根廷同德國我真係保持中立，岩岩仲見到外國傳媒指北韓電視台同國民講北韓國家隊同葡萄牙打入世界杯決賽，小組賽仲大勝美國、中國等球隊，真係笑到我就黎斷氣，點解呢個世界上會有啲咁千奇百趣既國家...最近仲聽到「美斯被罰紅牌出場」同「角球數量」都有得賭真係有啲驚訝，或者係我見識唔得淵博啦。呢個星期終於發現到屋企張梳化係咁舒服，每次要凌晨起身睇波都係攤係度小睡...話說尋晚仲訓過龍淨係睇到荷蘭攻入巴西龍門既最後一球，希望今晚睇波唔會影響聽日中文SBA既表現啦！
尋晚明珠台播《反斗奇兵》第三集。記得佢幾年前上畫我同爸爸媽咪一齊去戲院睇，緊湊之餘又好笑，鍾意睇薯蛋頭先生變左塊薄餅、鍾意睇巴斯光年跳西班牙舞。最後成班玩具面臨被燒溶果刻手拖手，含情脈脈望住對方；甚至係安仔最後將自己最心愛既玩具送晒比一個鄰家既小妹妹呢兩個場面都好感人。其實呢套續集個劇情寫得好好，終結或者係另一個開始，果種玩具同小朋友既關係好細膩咁展現左出黎。有時候我都會係度諗，當自己再大啲既時候，細個成日帶出街既玩具車、同埋果堆會放到成屋都係既LEGO CITY系列又會點處置？
屋企個書櫃終於係今日個晏咒整理完，果六層其實都唔係咁容易應付，特別係果堆多啦A夢既短篇小說同電影版漫畫，為左唔想啲紙質咁快變黃唯有用包書膠封起晒！目前只係差FILING番今年啲HANDOUTS咋，咁樣就大功告成可以寫信做功課同溫書！夜晚去左灣仔間NOVOTEL食BUFFET DINNER，果三個鐘確切反映我地一家三口既食量，唯獨令人費解就係點解我地食極都係咁輕磅，或者呢個係大把人夢寐以求既願望:$ 生蠔、藍青口、翡翠螺、刺身、PIZZA、烤牛肉、羊架、串燒、沙律、窩夫、MOVENPICK雪糕（特別係香蕉、乳酪同比利時朱古力味），真係好想再食過！其實不停將美食放進口裏面真係好暢快，當然有咀嚼消化過，想食咩就攞咩既動作好隨意自在，或者呢樣就係自助餐吸引人之處！
希望中六師兄姊聽日文憑試放榜順風順水！一年後既呢日就輪到我，好好把握呢半年時間，裝備自己，別讓自己有後悔的機會。
|
