| «‹ May 2015 ›» | | S | M | T | W | T | F | S | | | | | | 1 | 2 | | 3 | 4 | 5 | 6 | 7 | 8 | 9 | | 10 | 11 | 12 | 13 | 14 | 15 | 16 | | 17 | 18 | 19 | 20 | 21 | 22 | 23 | | 24 | 25 | 26 | 27 | 28 | 29 | 30 | | 31 | |
|
2014 年 7 月 10 日 星期四  |
| 2o14.o7.1o |
分類: 章の中學日誌 |
意想不到巴西竟然可以七比一慘敗德國，十分鐘比對方連續狙擊四個入球，正正反映出「兵敗如山倒」呢個道理.球場上既皇者只得一個，落敗始終要去承受，但當我見到巴西門將施薩某幾次都悲痛欲絕咁跪或者躺臥係地上，就會流露出心酸既感覺...當然，打得呢篇QOOZA既時候證明我要再一次挑戰四點鐘，唔知阿根廷同荷蘭鹿死誰手？
今日我聽到兩則小故事，總結就係世界始終有人唔識運用腦袋思考。我向來極度不屑用抽籤形式決定一個學會既主席，因為咁樣實在太無認受性同埋呢啲事情似乎唔應該由命運操控。作為一個稱職既學會負責老師，總唔能夠因為唔想傷和氣就避免任命，我只係覺得用呢啲咁兒嬉既方式並唔適合，好似將一個學會既發展方向押注落去咁。另一則更係前所未有既駭聞，一位放假而身穿短裙（膝頭對上）既女同學係學校附近撞到學校某老師，個老師事後提醒佢係學校附近唔應該著短裙，怕其他要返學既同學見到就唔係咁好。究竟佢知唔知自己講既呢番說話完全唔LOGICAL，平時返學已經諸多限制，唔通放假連著條裙都要家長信申請？定係要去到新蒲崗咁遠離學校既地方至著得？除左滑稽我諗唔到有其他形容詞。
其實我想講番ART EXHIBITION既，始終都花左兩個星期多既時間去籌備，最後有咁出色既成績就係對我地最好既回報。兩個星期以黎，基本上每日都朝九晚七咁樣埋頭苦幹，而我既工作都離不開寫字、剪貼、起稿同宣傳......客觀咁講其實條TRAILER製作都好認真，不過可能個場景既色調比較陰沉所以無咁吸引。記得展覽前一日，果幅汽水罐牆比個論盡同學撞散左，我望住果堆散落地上既罐，心諗又要買多幾枝UHU慢慢修補就頹廢左落黎......不過正式展示比老師加同學欣賞當天，慶幸一切都順利進行，有時見到課室水泄不通，實施人流管制咁樣排隊進場就暗暗萌生左份滿足感，就連每個老師黎到都會踴躍咁試水印貼紙同整紙銀包，場面其實真係好鼎盛，加上我地仲有四位著左特別服飾既英雄人物助陣。呢一整天就係不停叫破喉嚨歡迎來賓，或者好激動咁提大家投5B一票，咁樣嗌難怪第二日失聲！好高興不時會聽到某啲VISITORS真挈咁樣稱讚我地既作品同佈置，肯定我地所花既心思，更加開心見到睇完我地FROM BRAVO TO MARVO美術展覽既老師同同學滿心歡喜離開展廳。最後勇奪「最成功展覽」、「最合作班別」同「最有趣攤位」三個大獎真係興奮到跳左起身！
當老師宣佈清場既時候，班上每個同學都你眼望我眼咁樣，大家心裏都不約而同有個疑問：真係要執？真係要拆番晒啲野？每除去一件掛飾、每踩肩一個空罐、每撕下一幅畫作，都需要好大既勇氣同決心。台下十年功，但台上同清場都只係需要一分鐘。轉瞬間課室回復平靜，原先掛到四處布匹既展廳頓時變得空無一物，我其實好唔捨得EXHIBITION走到終結，好似你所投資既東西一下子輸清光，甚麼都沒有，無限空虛。不過，正如JASPER離開課室前所講：終於都完喇，不過總算留左好多美好既回憶係腦海到。是的，感激現今社會有相機呢項發明，將呢啲咁珍貴既時刻一一攝下，等自己可以好好細味！
詳細無咩可以提及喇，反正全部都有照片同短片做根據，反而我想話其實每班同樣付出努力去完成呢個活動，特別係C班好多掛牆畫作，啲畫功真係技驚四座囉好無；仲有E班充滿童話色彩既3-D展品，感覺好舒服。不過，永遠都會有啲小人係背後指指點點，冷嘲熱諷咁肆意批評，其實將心比己都唔知真係咁困難姐，相信你都唔會想自己班既醜事咁樣傳揚出去，名譽任由他人踐踏。還是休息一會好，聽日又要補課、又要練波......
|
2014 年 7 月 9 日 星期三  |
| 獅城的別番體會 |
分類: 章の生活日誌 |
夜欄人靜，等待世界盃四強賽開展，更新QOOZA就最適合不過。從新加坡返到黎香港不足一個星期，希望記憶仍然猶新咁極速寫後記啦！
新加坡，繼2008年後再次走訪呢個經濟蓬勃、崇尚綠色既國家。記得上次遊覽獅城都係自己編寫行程，看遍市中心既地鐵，摸清繁複既鐵路網絡，所以某啲地方至今仍然印象深刻。不過，參加遊學團跟觀光所參觀既景點大相徑庭，有幸今次眼界擴闊左不少。
新加坡一直以黎都係靠馬來西亞既進口水源，但隨住人口增長，政府決定自給自足，將諮詢多時既計劃實行出來。記得第二日到訪新生水廠，呢個NEWATER PLANT主要係講點樣處理收集番黎既雨水，轉化成工業用途，但無論係導賞員講解，抑或工廠所開放比公眾睇既都大失所望，我本以為好似益力多廠、可樂廠、啤酒廠果啲咁可以睇多少少「生產線」，但原來被玻璃相隔既另一邊就只有好多個金屬缸同埋粗水管，話雖如此工廠外既景色怡人，特別係條溪澗！同樣關於水既供應，第三日我地參觀左個叫MARINA BARRAGE既大型水壩。呢個耗資唔知幾多錢既水壩除左將雨水儲起，仲會係潮退排出部分水源，防止氾濫成災。我覺得新加坡其實真係好捨得花資金係呢啲環保基建上面，單單係個GALLERY已經惹人注目，裏面所展示既野真係叫人大開眼界，加上個導賞員充滿熱誠，講既又係熟悉而清楚既純正英語，而唔係SINGLISH-V- 畫廊頂層仲有大片綠油油既莫地，比香港啟德郵輪碼頭個空中花園更勝一籌。當我地成團四十位學生加埋三位老師都失控咁樣影相，各式各樣既組合，奇型熱血既甫士，留下太多美好既回憶。同日晏咒，我地去左GARDENS BY THE BAY，呢個園林有好多棵外形有趣既樹，用途都係促進光合作用一連串既化學反應，以提供更多電量，呢個地方帶比我好舒服既感覺，市中心內竟然可以有個規模咁廣既綠化帶，相信係香港永遠都唔會有機會見到，不得不提就係果道橫跨幾棵樹既吊橋，我在橋上看風景，附近多幢高樓大廈都盡收眼底，最開心既莫過於影相留念啦！題外話，LYDIA同師兄企係橋上面躊躇左好一段時間，原來畏高既威力係咁大既。
另外呢次旅程我幾享受參觀有關城市規劃、交通運輸、房屋發展、土生華人既博物館，呢四個地方將新加坡社會方面既發展勾劃出黎，仿真度極高既城市模型、富有互動效果既展廳......新加坡發展新市鎮真係好全面，康樂設施同其他配套一應俱全，仲有果啲組屋（港稱公屋）每間都至少五百呎，入住既市民仲唔洗申報收入，馬拉印度同華人各個民族都守望相助，生活融合，果種鄰里之間既關係有啲似以前既香港，其實徙置區都不錯丫！話說組屋仲有個固定既民族比例，比如一個印度家庭搬走之後會有另一個印度家庭入伙。以上既內容絕無誇張失實，的確新加坡係好多方面都比香港優勝，如果要我重新選擇，或者可以考慮新加坡作為出生地。
第四日我地仲參觀左SINGAPORE INSTITUTE OF MANAGEMENT，雖然面積、配套都係香港好，但果大半個鐘既CAMPUS TOUR好難忘，修讀會計既QUAN超級NICE同埋佢好肯分享自己既經歷，嘻嘻最後仲交換埋FACEBOOK！除左SIM大學，對於MINT TOY MUSEUM真係要給讚，五層展廳，播放悅耳既迪士尼電影主題曲，眼前就係一個個放置鐵皮玩具、毛公仔、模型等既玻璃櫃，加上多幅掛係牆上既海報，好似置身係個玩具世界咁樣，當自己見到米奇老鼠、唐老鴨、丁丁、大力水火、小飛俠阿童木呢啲角色果時啲共嗚真係BABA聲咁樣走晒出黎，童年是多麼的美好。
至於食物方面，整體都無特別驚喜，我諗我會比較鍾意學長會四月去突破青年村時食果兩餐囉。不過最後果日既早餐認真不錯，係牛車水果間亞坤食左馳名既生雞蛋同架央多士，薄脆多士同果舊牛油簡直係絕配，我仲先後飲左杯拉茶同埋咖啡，味道不錯喔！其實係新加坡地道既熟食市場搵食係不錯既選擇，大眾化價錢，而且食物質素或者比有冷氣既餐廳好添，最回味無窮就係EAST COAST每人夾幾蚊坡紙就食到好香既燒雞翼同埋串燒，天啊<3 題外話，我仲係間餅店買左好好味既斑蘭蛋糕同斑蘭芝士卷。即使運到返黎香港，隔住個膠袋都聞到好清香既斑蘭味，鬆軟既蛋糕，芝士同忌廉既配答，我如果攞到既實各掃一打返香港-3-
遊學團離不開觀光，獅頭魚尾像、牛車水、小印度、清真寺呢啲地方同六年前無咩太大分別，只係我嫌過程有少少走馬看花，真係點到即止咁樣。第二日我地去左聖淘沙環球影城...個門口影相，隔離個水族館除左大之外同海洋公園無甚分別，我比較鍾意搭果啲架空列車去周圍發掘得意野影相！只可惜部相機啲電池比我用乾晒，難得去到SILOSO啲沙灘都無得影相T^T雖然頹廢左陣，但RITA提醒左我最好既相機係雙眼，或者都係時候靜心欣賞藍天白雲，世外桃源既美景！最後果日我地仲有機會遊船河，CLARKE QUAY係我上次自遊行既酒店座落既區域，但六年後呢條運河旁邊既建築物風格都改變左好多，每幢樓房外牆都塗上一抹艷麗既色彩，最鍾意呢種歐陸風格！坐係船上面眺望沿岸兩邊既風光真係好寫意，唔知道坐係摩天輪上面俯視獅城又係怎樣的感覺？
2013年暑假，首次離開父母踏上北京既旅途，過程中認識好多新朋友。2014年暑假，再次暫別家庭，與成班認識左幾年既好友相聚於獅城。每到一個景點就瘋狂拍照，留下倩影；每個晚上都係燃燒青春，吵吵鬧鬧，只靠啤牌共度夜晚。呢一切似乎好熱血，但宜家回想起黎，感覺就係好唔盡興，始終欠缺了些什麼似的。我都唔識點樣形容，有時候每晚返到自己房間，尚未耗盡電力既時候就有啲空虛......不過點樣都好，同成班癲癲喪喪既好朋友共度五日好難得！
話說出發前我同RICKY佢地係樓上CAFE閒聊；話說我十七年黎第一次搭凌晨巴士前往機場；話說深夜到達機場既時候見到呼呼欲睡既遊人同精力充沛既我們；話說MANGO件行李無送去新加坡搞到人心惶惶；話說旅程頭幾日我都失聲，原來講不出聲係咁辛苦，笑果時連自己都聽唔到，講句說話無個字岩音，或者係上天懲罰我平時口若懸河？但最後果晚我飲左成晚清熱酷，食左成晚薯片、即食麵同朱古力之後，第二朝即刻康復；話說好多同學上車就訓教，但領隊同導遊依然好鍚我地，我地既反應無阻佢落力既講解；話說有晚食良惹菜個老闆加飯加汁加西瓜，仲親自餵RITA、LORRAINE同RICKY食飯；話說大家去機場果時臨別依依，唔希望旅程走到終結；話說我同LYDIA同BREAD係機場狂買野返香港，旨在將所有碎銀用晒去，我地仲一毫兩毫咁數比店員；話說我回程坐係窗口位都係雲層上空見到好美既日出，儘管最後係機上淨係訓左半個鐘都值得；話說我返到香港之後獨個兒係麥當勞食早餐；話說...太多太多瑣碎既片段。
一小時三十分鐘完成二千四百字既後記，實屬高速！ |
« | 3 | 4 | 5 | 6 | 7 | 8 | 9 | 10 | 11 | 12 | ... | 214 | »
|
