瞓　唔　著　。

或者每年，一到年尾，
我都會諗起啲感情嘢。

諗起幾年前有人打黎話新年快樂，
唔知點應好，好緊張咁樣，之後年年都等，
但係自從嗰次之後呢件事就無再發生。

之後等左七年電話，早幾個月有人明知我有鍾意嘅人都要追我，
一直猛攻，仲搞到佢唔安樂左一段日子，失眠左幾晚（應該係？），
之後終於應承，
係我唔認老唔認輸吸引佢呱，我諗。
血統所致，佢甚至都話幾鍾意我媽，
話無乜伯母會對佢咁好，一齊品茶。
我好鍾意佢沖比我嘅茶，濃得黎，個心好甜。
甚至大家相似到…我應該同佢一齊大先啱。

由中學同學結婚睇下邊個首先跑出都有黑馬，
到我拍拖啲朋友都相當驚訝，講人地追我就更加想打鑊我咁濟，
咁我真係無點樣追人追到手嘅經驗阿……！
瑤瑤話想黎屋企搵阿媽食飯，
特登揀個啲人返哂工返哂學嘅時間，上樓途中都比阿yo撞到，
嗰刻我除左撼頭埋牆算喇。
事實上，我同邊個朋友出街，都總會撞到其他朋友，
咁，係佢地之間有傳聞都不足為奇。

不過咁，靚還靚，我唔想用任何人去比較，
仲要嘢嘢都用小公主比，恨不得即刻反枱（╯’皿’）╯┴──┴
又係，過往自認無堅不催，身邊有咁多靚model都無動心，
好難唔用佢比，噢，今年都無講merry chrissiemas。
或者係無得講。

我甚至認為，我唔抵可憐，即使遇到乜嘢事而分手都好，
仲為感情而煩惱，我就只會被感情左右一生，
唔知會唔會後悔，前輩話會囉。
唔值得可憐，係有好多人即使尋覓一世，
就連拖手，失戀嘅資格都無，而我就日日都痛不欲生。
父母知我掛住瑤瑤，每當有人口痕問我拍拖未都會幫我開脫，
連爸爸都出聲鼓勵，我諗件事已經變得好嚴重，
阿媽會問瑤瑤最近點，會問邊樣邊樣唔係佢架咩，會問佢幾時得閒飲茶，
但係佢地知道我地已經分手，都仲要咁問，我諗阿媽都幾掛住佢。

除夕夜，似乎更寂寞，在於有幾種意義
 

話說尋日，籌備完好幾個月

搵劇本、作者同意、度畫面、搵景、出初稿、定地點、改劇本、組團，
最難莫過於定時間，以及，不停燒銀紙。
義氣之作。所以無出糧比佢地，
老老實實咁嘅陣容計公價平極都三千蚊一日，
未計道具器材，仲要拍三場戲，太多啦，痴孖筋。
原先理想係一日只拍一場戲，但係礙於我做director偏偏係事業上愈黎愈忙，
所以唯有…拍快啲。

老實，係如廁安排同飲食上有失當，要無人阻住嘅代價就係無廁所係附近。
以及我無出全數去撐起膳食lol

不停被拒嗰種灰，與練就面皮成尺厚。

黑白相我真係tune得極有感覺，正呀。

當然，身為導演因為演員唔夠，所以會出場客串，
頂你，明明玩mood玩言情，我一出場就變gag片，無論做咩都係…
有段橋段話要扮無辜，唔知係我太入戲定咩原因，
佢地個樣係爆笑到狂ng，係真係攞我黎笑，呀呀呀呀呀！！！！