尋日，日光非常曬同熱，我地兩兄弟計劃踩單車去西貢，本來仲想搵多d朋友一齊去，但個個都有野做，唉!咁算啦，兩兄弟自行去就算啦!不過有一個唔錯既經歷。
我地兩個係大約13:00出發，之後一路行大窩西支路，太和，大埔，元洲仔小休加水，吐露港，沙田馬場則既孖橋小休，轉左去左馬鞍山海傍公園加水，入隧道再去西沙路...
講起西沙路，其實呢條路係星期日及公眾假期唔比單車入，有幸尋日係星期六，所以進入係冇問題，不過斜路的確係好多，佢唔似沙頭角鹿頸咁坡度好斜但短，西沙路係坡度好長但唔係太斜，所以攻頂既方式只可以慢慢有耐性去上，而唔係奔牛咁炸上去。
咁我地預計由馬鞍山去西貢保守估計都係成個鐘，點知我地比預計既快，大約33分鐘就到左西貢市迴旋處，咁我地選擇轉右入市中心，因為我地係西沙路已經用左d水，對上補給已經係馬鞍山海傍公園。
我地係西貢用手機影左d相留念，因為呢一日係我地首次以單車入西貢，心情莫名興奮...係西貢碼頭休息之際，見到有好多遊艇，通常都係去遊船河，我唔明白點解d女仔成日驚死曬黑，但係又要玩遊船河，真係同自己既美白戰略有d唱反調...
咁我地由市中心再出發，行大網仔路，中途經過我同細佬曾經去過既香港外展訓練學校既大網仔基地，咁呢個基地對我就無咩料到，我只係去同屋企人接細佬係訓練完之後出關，我同細佬係分開基地，那個地方叫往灣洲，炎熱既天氣加上晚上係會熄左個發電機，所以呢晚上係一間昇鐵屋底下訓都幾辛苦架...
大網仔完成既時間只係22分鐘，比我預計都係快，開初我都覺得要1個鐘15分鐘完成，因為我覺得上斜都係一個廢時既原因，不過大網仔路真係好窄架，上山既時候d車都要就住我地既位置。咁幸好好快就到左北潭凹，北潭凹係一個經典既西貢集合點，例如行山遠足、一d公開既越野長跑比賽、毅行者挑戰麥理浩徑既起步召集點、一天旅遊團多數會去既地方...咁我地都影返張相紀錄留念，幾開心既!
過左北潭凹管理站電閘，我地向黃石碼頭出發，黃石碼頭對我黎講係最深刻，因為呢個地方係我去外展時登船既地方，係個時我係好開心同緊張，因為我個時係去一個我認為香港最荒蕪既方...
最後我地大概25分鐘就到左黃石，真係好鬼開心，北潭路我以最高速64km/h下山好爽!到左黃石都係拍照又拍照啦!水清、陽光很曬、好多人釣魚、好靜...
好啦!行程有去當然有返啦!返去既時候其實都幾係野，因為落左幾多就要上返山幾多，咁都幾累啦!由黃石上山見到有個老外著住ASIA PACIFIA AIRLINES(國泰航空公司車衫)既，佢落山超快!仲同我地SAY HELLO!之後我地返回北潭凹時，又見到佢返到去北潭凹，我同細佬大驚，因為呢個鬼佬係基本上無休息，就咁上山下山先做到呢個時間，我自問真係冇咁好氣力，一個字「SHIT!」
最慘係行西沙路，後面既私家車追上黎，單車上山又點會夠車快呢?的士佬又串，係咁「呠」我地，有時我覺得香港人好無良心，大家都係揸車姐，你都要遷就一下對方既感受同埋困難!
當返到去孖橋既時候，我地都開始有D倦意...不過都要頂硬上，我地原則係一蚊車錢都唔洗就到西貢，一蚊車錢都唔洗就返上水既屋企!
係吐露港，我以保持33既速度回元洲仔，好累!細佬跟唔上...^^
我地最後返到屋企既時間係20:55，9點都唔洗就返到屋企，之後我同細佬食左三大碗飯呀! |
