尋日仆過半死，今日大戰好多地方，沙田孖橋、科學園、大埔一帶、大美督、馬鞍山加鹿頸...真係爽到冇得頂!
咁今日有阿然、阿B、我、阿宏、阿偉哥，仲有豆漿哥!咁今日天氣真係熱到傻...加上有煙霞...好熱好焗!
豆漿哥以前總是以為自己架車好快，其實今日已經做左一個證明，有時候車貴真係有佢既價值
然仔換左CANNONDALE CAAD9，真係好快!我幾喜歡個D咁簡單既拉花，我覺得CANNONDALE真係有TASTE...
咁阿宏依然都係幾有狀態!我覺得呢位小兄弟真係經過長年既訓練，我覺得佢係一個小鐵人!
偉哥就真係強差人意，依然都係一個無咩進步既狀態，講真佢唔肯發力去追，咁我只係覺得佢係一個冇為速度去想過既人...咁我覺得佢咁辛苦由街車升級上去MTB，咁仲慢過D街車既，不如佢轉返落去街車，唔好搞咁多野，買返淑女仔玩囉!
今日一齊玩車好開心，因為大家有陣營咁去追逐，我覺得同阿然夾戰術係好好玩，加埋細佬都係一個享受，有埋阿宏係到，幾架輪住食風帶車，係好好玩既事!可惜豆漿同偉哥冇得享受咁好既野...
後來我地去左大埔苑記食什河，好好食!不過然仔似乎係落得太多辣油，搞到佢個人太熱!
之後我今日第一次踩車入馬鞍山，我覺得馬鞍山真係悶到不得了，根本我覺得呢個係一個死城，冇資源、冇咩人...開城咁耐，入住既人口都唔係多，我唔知馬鞍山既存在意義在何處?
今日係大美督都有好多人踩車，不過天氣熱始終唔及天冷多!咁都有幾多女仔都係到踩，不過呢唔見得有邊個真係靚既...
上鹿頸，偉哥第一時間比我感覺目光呆滯，講真佢真係能力不足，我今日同阿然加1埋細佬好成功衝上漁護站，以前淑女仔真係推到仆街...咁偉哥就當然係推出上，佢係半死狀態...之後再鏟上新娘潭，嘩!同淑女仔既時間相差極遠，今日係好快就上左新娘潭...阿然第一個到，我慢佢一個車位，之後我同阿宏一齊衝線，好開心!細佬隔左10多個車位就到左...偉哥好遲到，但總算到左!
係新娘潭停車位小涼亭，向來我同細佬都覺得果個亭仔比人感覺好恐怖，今日直頭係亭個邊小休!但係發現左好多奇怪現象，第一: 上到涼亭，雖然係好累，正常人覺得熱同累，總會想有個涼亭乘涼，但係今日我地今日總係坐唔定，唔多想係個涼亭仔休息，就連出面個d車主鍾意飛下車個d...都係寧願係出面曬太陽抽下煙...
第二:偉哥平時都好活潑，但係佢係新娘潭...完全係唔多聲咁坐係亭仔...
我開頭都諗: 「個亭真係咁大剎氣?」「涼亭點解總係無人想坐?」「我為何對果個亭總係有d恐懼感覺?」或者呢個始終係靈異域...
最後我地落鹿頸，我就爆快落左去，有60.1kmh...好正!
|
