尋晚同一大班fd,一齊係綠悠軒某酒樓一齊打邊爐,因為我地既好友雞翼今日就要走,唉!咁快就要走,仲一走就要走兩年...
咁打邊爐當然開心啦,真係好難得成班fd可以一齊食野,仲一齊飲啤,好彩冇叫阿b黎,因為阿b好鍾意飲啤酒,佢黎到d啤酒肯定冇左大把...尋日打邊爐最好食既都係肥牛,最可怕我諗係個d貢丸,個d丸可能雪得太耐,睇落d丸係熟左浮起,但粒丸d心入面仲係凍,當然係唔食啦!
尋晚我同steven飲左勁多啤,連我地都唔知自己飲左幾多,好彩自己仲係冇車,否則就大鑊lo!我地估飲左10至12杯,隻杯仲要唔細,我估有老麥既中杯咁大,成班友都唔知飲左幾多「咋」,好彩個間野話明係啤酒任去,否則結帳都唔平!因為一「咋」都成枝再多少既啤酒!尋日應該同steven飲左有半打既份量...行出門口都有少少wing wing地...
咁雖然食得飽,飲得爽,但亦有人唔知天高地厚,飲到自己大醉,呢個就係韻魚...我地成班都估佢可能係唔捨得雞翼,搞到係度一味「借酒消愁」,佢係勇到自己飲左2大杯,差在未吹哂...飲左之後,佢就開始wingwing地,之後佢仲話去廁所!我地已經見佢行路行到「飄哂移」,都知道唔掂...咁本來就阿嫂挺住佢慢慢行,突然佢仲仆埋,咁成班fd咪走哂出黎挺起佢!之後仲有少少語言不清!出奇地佢電話突然響起,咁佢居然可以半清醒地聽電話,對答如流!真係要比個「服」字...後期佢「飛白鴿」幾個round之後,足之都好少少...但都係醉緊!
到左11點幾,咁我打比我阿媽,就話遲d返,之後阿媽佢問我咩事,我講返個reason...佢就居然罵我:個fd醉左,又關你咩事ar?你好快d返黎啦,如果唔係你唔好返黎屋企...之後我梗係唔理佢ga啦,真係咩人黎ga!咁冷血都得?人黎ga大佬,話之我訓街都好,朋友我幫硬,屋企人?老豆kai既,阿媽冷血既,除左名b最正常,呢d咁既屋企要唔要都無所謂,反正我第時一蚊都唔會比佢地,今日佢地咁冷血咁對我,他朝佢要接受返呢個後果,最多我要落地獄,但我絕對冇後悔尋晚所作既事,因為呢d叫「義」!
比阿媽cut左線,心情當然係非常不爽啦!但救人要緊,韻魚搞成咁,都唔知點...冇理由叫佢訓街ga?咁雞翼就非常仁慈地帶左韻魚上佢屋企,幸好佢老豆唔係惡爺,比著我老豆「彭」左我門先啦...咁佢老豆整左d熱茶比韻魚,咁韻魚佢又要飛多轉白鴒...
到左12點,西瓜,阿雄佢地幾個要閃先...咁反正咁多人都係齋企,而且佢地可以好快返到去,因為佢地4個都住華明個邊!佢地走左,得返我同steven加阿嫂陪雞翼加韻魚,好明顯韻魚佢就要過一晚夜,訓返一晚好既先至掂...最後我地3個都要走啦,始終佢係雞翼屋企大致係安全左,同時訓始終要安靜,咁走都係好既!
返到屋企,真係比隻冷血既阿媽lock鬼左我門,我按門鐘,好彩我老豆睇緊書,佢開返門比我...沖左一個靚涼後,之後就訓了
咁今日朝早8點幾9點,借左個營比教會之後,我就去左機鋪打左3鋪灣岸,到左10點幾,再會steven佢地送雞翼機,但badnews係,由於機場保安加強左,加上雞翼佢屋企人迫住佢入閘,咁冇計啦!只好由送機,變成機場一日遊...
其實韻魚真係好傻,唉!為咩呢...搞到自己又辛苦又飄移,你估打灣岸咩?自己唔飲得就唔好飲啦...搵酒同自己身體黎挑戰,真係未死過...就算要飲既,真係要適可而止,要留定一個距離去飲,唔係一氣過吹哂,咁飲我都飲唔到啦!唔係叫你唔飲,而係睇住自己能力,充大頭鬼?飲死左真係call黑車係咁先...
我好慶幸我仲未考車牌,如果考左車牌又有車,尋晚就煩lo!唔好講揸車,肯定尋晚同架車入bill都成問題,又要睇住韻魚,自己又有少少飄飄地!如果自己夠薑去揸,肯定揸唔直!到時肯定打哂s,什至比鐵馬大哥stop仲要吹波波,咁就傻仔啦!扣幾分(總分15,自己慢慢計)...唔揸又要比筆錢去停車場,自己又要搭的士...
|
