今早一起身, 11:00 AM, 就覺得個肚好痛, 下意識就覺得今次係堅料.
而且每隔5分鐘度就會痛一次, 每次痛都維持40秒到. 但痛既程度就唔算好勁.., 到1:00度仲發現有少少見紅, 就肯定今次真係堅料哪.
郁郁B真係要出世啦~~~
於是馬上打電話比阿文, 點知真係在危急關頭阿文既電話先黎唔通wor~~甘我就即刻打比傑傑, 話比佢聽我陣痛哪~
之後, 就叫了外賣 "栗米肉粒飯", 同埋走去沖涼。
阿文食飯時候打返黎, 我話比佢知我真係陣痛, 今次肯定係堅料, 但我仲未算好痛, 應該唔駛甘早入醫院住. 阿文即刻緊張起來~因為佢返去開工既地方, 電話係收唔到既, 佢就每隔一個鐘度就走出黎打電話比我, 問我而家覺得點, 要唔要佢馬上回來同我入院, 但因為我都唔算好痛, 所以都想阿文返埋今日工先.
我發現當我唔郁既時候, 會隔得耐d先再痛, 於是我就食完飯坐係廳度睇電視.
等到阿文5:00pm返到黎, 我都唔算好痛, 我地就照食晚飯, 同埋我仲趁呢段時間食哂我想食既野, 例如係雪糕啦, 糖不甩湯丸.
仲要睇埋8:00 pm個套同事三分親, 我先換衫入院
去到聯合醫院大約9:30 pm, 我地好識路甘去了2A房登記入院.
姑娘都話記得我之前已經黎過一次呀....跟住既程序我都知道哂:
換病人衫, 訓上床駁機聽BB心跳.
係駁機期間, 陣痛勁左好多!!痛得很利害.
姑娘就過來幫我睇下開左幾多度, 點知就話我已經開到2度, 要推我入產房...我都唔敢相信! 真係甘快~~~~~??
姑娘仲幫我穿羊水(穿羊水既過程係唔痛既), 穿完羊水之後既陣痛就痛得更加利害~
當時, 阿文都係我身邊陪著我, 姑娘比左支笑氣, 叫我一開始感覺到痛, 就要吸, 大大力吸!
實在好痛, 試著大大力甘吸那個笑氣, 吸到個人暈陀陀甘, 阿文係我旁邊一路提我呼吸的節奏.
我係覺得好想大便甘, 但又要忍住, 唔可以痾住.
呢個階段真係痛到想死..
痛左兩個鐘後, 12:00 AM
姑娘就叫我用力, 但我用錯哂力, 同埋我覺得係吸笑氣吸得勁得滯, 我好似冇力生甘.
阿文係我旁邊不斷叫我加油, 又問我點樣可以幫到我..但我已經冇力氣回答阿文了.
只能維持一痛就用力, 唔痛就稍為休息
試左個幾鐘, 1:15 AM, 姑娘見我都係生唔到, 就打算叫阿文離開產房, 因為醫生要黎幫我助產(即係可能要吸阿B出黎)
但隔左幾分鐘, 姑娘又話我有D起色, 叫我留定一口氣, 好大力既, 用黎將BB整個推出.
我就跟住做哪, 係我用最大力既時候, 姑娘既剪刀同時一剪.
我就"呀~~~~~!!!"左一聲, 郁郁B就彈出來了, 隨即已經聽到郁郁B好嚮亮既哭聲了!!
此時此刻, 我只係覺得好累...累到什麼都唔想諗哪...
姑娘把BB抱到我眼前, 告訴我BB係男仔, 幾重同埋係幾點出世既.
姑娘仲話"媽咪生得甘辛苦, 快D抱下BB先啦~!"
但我就話 "唔抱得唔得呀, 我隻手完全無力哪....."
姑娘於是就話 "唔抱呀, 甘就鍚下BB啦.."
我心諗, 唔錫得唔得呀....BB個樣甘鬼醜樣既, 即個笛子魔童甘... 但最後我都有錫到BB..阿文都有錫..
呢個時候, 姑娘係幫緊我將個胎盤拉埋出黎既, 我太累了, 都冇哂感覺哪
姑娘幫BB沖完涼後, 再將BB抱到我面前, 告訴我BB係兩隻眼仔同肩上都有紅印胎記
之後就將BB放入保暖箱度, 阿文亦要係呢個時候離開哪. 因為我要進行縫針
本來姑娘叫阿文可以回家休息的了, 因為我縫完針仲要觀察一段時間先會上病房既, 但阿文就堅持係出面等我
係縫針既時候, 我都要靠笑氣黎止痛...真係幾痛嫁...同埋我印象中縫針都真係縫左好耐..
4:00 AM 開始推我上病房
阿文果然係門口度等我, 但我連講多句既氣力都冇哪, 姑娘就叫阿文到今天探病時間先黎過哪
上到病房已經4:30 AM
就係甘, 我就完成左將郁郁B帶黎呢個世界既工程哪!
好醜樣...
浮屍甘...
爸爸的喜悅
媽媽的喜悅
呢張相係11月4日影既, 我個肚有43"啦~~
