今日係中一生涯既最後一日，亦都係派成績表既日子，我今日八點幾先起咗身，跟住洗面、刷牙。

出到門口都已經搭10啦，又落住雨，真係好狼狽。

終於返到嚟學校，幾驚遲到!上到去課室，老師就派番d功課簿、新學期書單、月記簿.......。冇幾耐，有人開咪宣佈得獎同學要落去Hall，咁我同阿娟、楊書敏、黃雯艷一齊落去。

落到去Hall，已經有好多同學坐晒係到，我地都嗱嗱聲坐低，我攞咩獎? 咪「學業成績優異獎」囉~

聽完一輪訓話後，終於到頒獎既時間，我地d得獎者個個行晒出去，準備上台領獎，有好多人都好似琴日綵排咁，行得好，d步驟有記得，不過，今日有一個步驟，係之前冇綵排過既，就係.................校長係我地上台個陣同我地握手。

好啦!成個頒獎禮完成晒啦，又到咗今日另一個高潮，就係攞成績表。

大家都好期待呢一刻既來臨，臨派成績表個陣，老師就同我地講:成績表上有個格仔，格仔上寫有「准升」，就代表成功升中二;而寫住「試升」，則代表俾你試下升上中二;而咩都冇呢，就代表可能冇機會升中二，即繼續讀中一。大家聽到之後，都好驚，因為本來只係有冇名次，現家仲要擔心有冇得升，真係.........

最後，攞左成績表，好彩係准升，不過，仲最令我喜出望外既，係我攞左全班第3名呀!!!好開心。

跟住2:00又返番來學校綵排話戲，本來我剩係做幕後，點知個社長話仲有d角色冇人做，於是就搵咗我同阿盈做，真係............

最後，返到屋企阿媽買咗d蝦，話慶祝喎，正呀!

終結，今日係中一生涯最後一日，無咩遺憾，希望來年繼續有好成績啦!!!