今日同阿媽出咗去天水圍搵書，本來約咗Iris兩點半嘅，但早到咗，所以就叫咗佢落嚟。

但佢未嚟之前，我就同阿媽喺嘉湖新北江度睇下書先啦!嘩，點都估唔到，呢度嘅程況仲比屯門勁，檔口嘅數量就差唔多啦，但D人就勁到爆燈啦，同一個檔口嘅人可以問我要唔要書成幾次嘅，姐係一個問完，之後又有另一個問你要唔要書，兩個人都係同一個檔口架喎，所以呢…都幾煩下。

之後，Iris嚟咗啦，阿媽就周圍行啦，咁我同Iris就繼續搵書啦。

搵左一輪，都係冇咩收穫，搵地理作業啦，得一本係05年修訂版，仲要係好花個隻;搵英文listening，就個個都俾第2版我，我要第3版呀;搵普通話作業，就俾第二版(即新版)我，第一版就冇喎;不過好彩，到最後，我都有買左d書，買咗一本工作紙($8)、一本科學作業($23)同一本歷史書($129)。

買完書之後，Iris話元朗果邊都有舊書賣，所以就同阿媽喺味太郎食咗個「吉列帶子拉麵」($21)，就過咗去元朗啦!

最後，都係買唔到其他書啦，不過就去咗好好美食店食咗碗仔翅，阿媽就食煎釀三寶同魚蛋腸粉。(好味!)

當然，去元朗一定要買既著名特產----老婆餅。