因為有d書好想買，而書展又有折嘅原因，所以今日又去多一次書展。

今次吸收咗上次嘅教訓，已經約埋表姐，叫佢買定飛先入場，費事又要走去兒童天地，不停上上落落先到hall1，但係，天意呢樣嘢，真係好難講…

話說今次去到分流個陣，又係排第一啦，諗住唔駛好耐就可以入到去，但點知，唔知書展裡面發生咩事，仲要出動埋警察，搞到條人龍調番轉頭行，無啦啦由排頭位變咗排第尾，係人都嬲啦!

好啦，以為咁都算啦，點知又要行番上去上次買飛嗰度，都唔知幾鬼死逼，幸好，只係逼咗一陣，之後再行一條很隱閉嘅樓梯落番去之前嗰度，再行去一條水洩不通嘅路，先到hall1，真係…

去到hall1啦，個表姐又要我即刻帶佢去搵姆明d野，咁就帶佢去啦，搵到間嘢啦，佢就不斷掃姆明d嘢啦，但我因為嚟呢度係要搵我想要嘅書，所以我就行開咗，等阿媽同表姐一齊，其實我本身就唔知本書邊度有得買，所以就不停行，不停行…終於搵到啦，但咁啱又未有貨，要6:00先有貨番，唉!

好啦，我決定等到6:00先番嚟買本書，咁我就行去明報同刊度，諗住買d相啦，點知嗰度人頭湧湧，我走埋睇下咩事，原來黃宗澤嚟咗，d人仲猛用手機影、影、影，搞到我買唔成相，只好上grand hall同hall2先啦!

去到grand hall，即刻走去政府新聞處，做咩嘢?梗係買書啦!呢本書係商務(屯門)就冇折嘅，但喺度唔多唔少都會有少少折頭，所以就買咗啦!

好啦，之後行咗入去hall2，今次係第二個入口入去，所以我要行番上次買書嗰度呢，但要用唔少腳骨力。番番去上次買書間嘢啦，果然如Iris所講嘅，特價書係有，但啱我睇嘅，早已買晒;啱我睇嘅又冇折或者係要買多d書先有折，所以今次喺hall2冇咩收獲。

好啦，過咗6:00啦，落番去hall1買我要嘅書先，行番落去買個陣，以為係冇折，但點知都有，仲有書籤送呀!正!

好啦，買完呢本書之後，就諗住行多陣就走啦，但臨走個陣，唔記得邊個檔口啦，賣英皇d電影原著小說，你知唔知要幾多錢?竟然只係要$10，嘩，搞到要賤買(其實仲有好多未賣)，好可惜，行過d人都冇點望XD

最後，喺「天地」度買多一本電影小說就走咗。

今日嘅收獲:

第1本:The逼city  $34.5

第2本:閃電雲•王菀之寫真  $54.4

第3本:餃子  $44