今日本來瞓得好好，但就俾阿媽個d電話聲嘈到醒咗，頂唔順啦，去過廁所之後問佢咩事，先知表姐喺報IVE嗰陣玩失蹤，唉!

攪到成個家族為咗佢，不停打電話搵佢，阿媽仲打爆晒d分鐘，姑媽又喊，阿爸番緊工又要打電話搵佢，真係……

但坦白講呀，表姐都唔想咁，香港d教育制度成日都改嚟改去，一時又話三三四，一時又要改d評分準則，想玩死人咩?

好啦，言歸正傳，講番表姐啦，打咗好多電話之後，表姐終於番左屋企，但就鎖自己喺房。但之後，都肯出黎。

咁我同阿媽就去IVE度等佢啦，原本坐巴士嘅，但因為落雨，所以坐西鐵。

同阿媽搭到去南昌總站啦，諗住轉地鐵去長沙灣，但發現原來喺美孚轉係近d架，所以搭番西鐵去美孚，再轉地鐵去長沙灣。

好啦，到咗長沙灣啦，一出到地鐵口，個陣冇咩雨，但有風，咁因為唔係好清楚IVE係邊，所以就唔知點解上咗條天橋，上到去，咁啱姑媽就嚟啦，咁好自然就要落番嚟啦，真係…

跟住，就見到表姐啦，再行去IVE啦，去到IVE門口個陣，突然唔知d咩野跌左落地，但嗰陣好大風，所以都睇唔到係咩嚟，就入咗去IVE啦!

呢度嘅環境都唔錯，咁阿媽佢地就上去登記啦，剩得我喺度，咁我見到有個位可以上網，諗住上網搵少少嘢啦，但原來要係呢度嘅人先得，所以用唔到。

好啦，佢地落番黎啦，咁我地就去咗呢度canteen食野，但我明明叫燒汁雞飯，但點知竟然俾咗白汁雞飯我(燒汁=白汁，唔係掛?)唯有同阿媽換啦，但實質上，都係唔好食。

好啦，食完啦，就上去一樓學生資助啦，但搵嚟搵去都搵唔到，之後仲有個人(應該係校工)，佢話就嚟掛8號風球啦，我心諗:「咁快?我喺美孚個陣都係3號咋喎!」

算啦!之後，繼續問人學生資助係邊?終於問到啦，原來就喺個canteen後面，真係…

好啦搞點晒所有嘢，就諗住去信和啦，但呢個時候，8號風球就掛咗啦，阿媽叫我唔好去，但我硬頸，但最後，信和有開，但十居其九都收咗，條管理員都趕人走，因為要閂門，唉!

最後，同阿媽搭60x番屋企，條路好塞，要成個鐘先番到去。

8號風球，討厭