今日係第一次同人面交，今次買家要嘅係少爺占本《人類精選》，原先出價$30，但後來改為$40，但呢個買家都要，證明佢真係好鍾意呢本書，但其實每次交易呢，我都係做中間人，貨物唔喺我手，係要等到真係有買家要，我先會去買番嚟，再賣俾個買家，咁樣做其實好好，因為一方面我可能幫人搵到心頭好，另一方面我又可以幫d舖頭賣出咗一本書，一舉兩得，如果你問我有冇從中賺錢，有，但唔多。

今日11點幾俾阿媽個電話嘈醒咗，佢話就嚟收工，問我去買書先定食咗嘢先，我諗住我去買咗先再食嘢(因為約咗個買家2:00)，咁之後梳洗好，我就出咗去啦。

去到利寶嗰度，咁岩間舖仲未開，嗰陣大約都有十幾間舖開咗，冇辦法啦，唯有同阿媽食完嘢先再番轉頭買啦。

同阿媽番去前日間舖頭度食，今日得兩個人喺舖面，所以等咗好耐先有嘢食，唉!(如是者，嗰陣都已經12點幾，所以被逼要同買家改時間，改咗3:30-4:00)

食完嘢，就同阿媽番去利寶，但點知間舖未開，咁阿媽問隔離舖頭d人幾時會開，咁個哥哥就話:「應該…(望下隻錶)咦?如無意外就5分鐘後!」，5分鐘後都好d，咁我同阿媽行一陣先啦，行行下個陣，見到一間糖果舖有7-11果 d Hello Kitty年份磁石貼賣呀，只係$3一個，咁岩又有一個年份我冇，所以就買咗XD。

行完之後，間舖終於開啦，我即刻走過去買本《人類精選》，好彩仲有姐，之後我問佢幾多錢，佢話$8，我就呆左呆(因為我聽到$18)，我就再問多次，佢話$8，我都係呆左呆(因為之前問過係$10)，但既然平咗$2，梗係要買啦!

買完之後，就同阿媽去安定搭輕鐵去元朗，本來諗住交收完就即刻走，慳番d車錢，但點知阿媽話要去埋天水圍度搵書，但阿媽話車錢冇咩問題，所以就咁決定!去到某個站嘅時候，我就打俾買家，叫佢去豐年路交收(嗰陣係2:06)，咁佢話要5-10分鐘先到，心諗:「應該同我到豐年路嘅時間差唔多!」。

當我到咗豐年路，個買家就打嚟啦，佢話佢到咗，問我那一邊嘅月台，我話近住麥當勞嗰邊，咁佢就收線啦!收咗線之後，我周圍望下有冇人岩岩收線(即係望個買家喺邊)，但又睇唔到，直至到有一班輕鐵咁岩埋站，有一個女仔行緊過嚟，我初頭諗會唔會喺佢，於是就打多個電話俾佢，結果個女仔個手機真係著，咁即係佢啦，咁我拎本書俾佢，正當佢拎錢俾我個陣，佢又跌咗d嘢出嚟(只係一張紙)，咁我幫佢執番啦，之後佢俾咗$40我，就走咗啦。

咁我同阿媽行去對面月台搭761P去樂湖買書啦，期間，我地傾番頭先嘅嘢，真係估唔到個買家咁後生，因為之前傾電話，以為佢係一個比較年紀成熟嘅女買家(係聽聲認為)，同埋第2次打俾佢個陣(係另一個人幫個接電話)，我聽到一d放杯嘅聲，所以可能佢喺一d餐廳度做，但佢頭先走嘅時候，係向元朗大會堂嗰邊走，所以又可能佢係喺大會堂嘅餐廳度做。

好啦，到咗樂湖就冇拍卡，因為心諗唔洗幾耐就可以出番啦，咁同阿媽喺裡面行，行左好幾間都冇，之後行到去一間「嘉湖書店」，嗰度有英文聆聽同電腦，但只係得九折，阿媽心諗(其實之後講番俾我知):「咁我使喺度買?去正豐得啦!」

最後只係喺正豐度買咗本普通話作業就走啦，之後阿媽諗住搭輕鐵去天水圍西鐵站搭西鐵，因為我地由安定搭去元朗，再搭去天水圍，都就嚟兩個鐘，所以就天水圍循環線去西鐵站，但點知，搭到去某站，先發現原來我地應該喺對面月台搭先啱~

冇辦法啦，唔上都上咗啦，只好環繞天水圍一周啦，但好景不常，呢個時候竟然遇到查票員，但都好彩冇事，但離兩個鐘頭越嚟越近，幸好，都趕到喺兩個鐘頭前出閘同搭西鐵。番到去屯門，同阿媽周圍行下，行行下，阿媽話有d肚餓，但大快活又冇位又貴，所以我地去吉之島美食廣場度「免費試食」

食完之後(唔算多嘢食)，阿媽就去咗一個水果罐頭嘅檔口，咁我就番去再食，試食麵嘅時候，有個小朋友想再食一小碗(之前食咗一次)，但個姐姐唔俾，要留俾其他人試(嗯!做得好!)

最後同阿媽行去華都，順便問下德盛(係書店，唔係女傭嗰間)有冇新書番，竟然有喎，咁梗係買啦，而且都係85折，買咗一本3上地理書同英文聆聽。