今日係第二次同人面交，但其實真係去面交嗰個係我阿媽，咁對方今次要嘅係《好天氣》同《少爺占1999》，賺咗$290。

面交完，就同阿媽去大家樂食嘢啦。食完嘢就去吉之島個美食廣場諗住試食囉，但今日d試食檔唔多，並且麻麻地好食。

之後，同阿媽落去華都睇下有書番嚟未啦，都係仲未番，要等到月尾先有，冇辦法，咁唯有同阿媽出去旺角間檸檬書店度睇下有冇啦，同阿媽坐60x去到嗰度，以為好有規模好大間啦，點知原來只係一間細到冇人有既舖仔，只係得兩個裝書櫃，結果梗係搵唔到我要嘅書，但嗰個人仲要話因為個網未update，所以冇喎!真係…

算啦，咁我同阿媽周圍行下啦，行到去一間舖頭，嗰度有好多7-11嘅嘢呀，仲只係$2，所以就勁買囉，足足買咗13個呀!

買完之後，同阿媽去咗隔離嘅MK1超級數碼廣場度行，雖然係好新同大，但舖就唔多，自然人流都唔多啦!

好啦，跟住就去咗信和，我地由底行到上頂，係底層度本來想買「美女廚房」嘅(只係$30/盒)，但一開盒睇，發現都幾花下，所以冇買。

之後行晒成層，就落番地下搭升降機去10樓，睇下又有冇平嘢執，一上到去，又係好多人啦，但今次想買嘅嘢又多咗喎，但最後都只係買咗edmond同張衛健嗰套「齊天大聖孫悟空」($178)、hocc隻「艷光四射」($75)同一隻阿媽好想要嘅「全家幅」($9)，足足洗咗今日賺番嚟嘅錢一半仲要多呀，好肉赤!