今日阿媽話要入沙田拎嘢，我記得Iris話嗰度有好多書店，所以就同阿媽入去沙田啦!

咁我先同阿媽去安定間麥當勞食嘢，食完就去搭263啦，但一上車，開始覺得個胃有d抽筋，我以為一陣會冇事啦，但直至架車去到總站個陣，我都仲覺得痛，但唔理啦，都要落車架啦!

落到車，同阿媽去一去廁所(因為都坐左好耐車)，去完啦，d痛就消失咗，我以為冇事啦!咁同阿媽出番去，咁阿媽個同事未嚟，咁我地咪周圍行下囉，就行咗去「大眾書局」，真係好大架，除咗書，仲有唱片賣，但好貴。

咁之後就做私人嘢(叫得私人，梗係唔講得啦)，做做下個陣，突然又覺得好痛，阿媽又出咗去搵個同事，咁自己就出去坐下啦，坐左一陣，見好似又好番d，咁就起身啦，但一起身，我又覺得好痛，心諗一定要去一去廁所，可能會好d，但點知一入到去個陣，阿媽就打俾我，我個時覺得非常非常痛，猛同阿媽講好痛，之後就一路行番出去，但點知一行出去，我就已經好似冇晒力咁，暈咗喺廁所門口，個時睇嘢已經好唔清楚，見到咩都好黃，又有耳嗚，但好彩阿媽同佢同事呢個時候嚟到，咁就扶起咗我，我個時四肢乏力，隻眼不停流眼水，好似就嚟死咁，我叫阿媽同我去大家樂坐，咁岩有一個位，咁我就坐左落去，嗰陣d人話我面青口唇白，我初頭都唔信，所以坐定左之後，拎塊鏡出黎，見到自己個口唇真係白晒，青就唔係好覺，咁講到呢度，阿媽都已經知我咩事，就係低血糖，但冇理由架，明明喺麥當勞有飲汽水，冇理由冇血糖呀，但唔發生都發生咗，只好麻煩阿媽個同事幫手買一杯汽水，令我d血糖升番啦!

坐左一陣，終於睇嘢好番d，但仲有耳嗚，唉，我仲要麻煩人地「大家樂」嘅經理拎支藥油俾我，因為自己已經有成幾年冇嚟沙田，一時坐唔慣長途車，所以…下次都係要帶定一d糖同藥油喺身，起碼自己都可以支撐住一陣。

好啦，當我差唔多恢復狀態，就同我媽行去「希爾頓商場」食嘢(因為阿媽個同事未食嘢)，但我又唔肚餓，只好佢地食嘢，我就四周圍行下，行下行下，又行番去大眾，繼續做私人嘢，做完冇幾耐，阿媽就打嚟問我喺邊，之後，佢地就行咗嚟大眾，之後我去咗圖書館(因為有本書就過期)。

還完書，就上番去搵阿媽啦，之後我地就去Iris講嘅「好運中心」度行啦，果度真係好多書店，尤其是有一間「學生書店」，除咗有教科書買，仲有流行小說嗰d，價錢都只係大眾嘅一半，真係好平，連Theresa嗰本《T with sunshine》都有，仲只係$35，stephy嗰本《不要忘記》都有，只係$30並係第二版，真係好抵，可惜我麻麻地stephy同theresa，所以冇買。

過多陣，就同阿媽番咗屋企lu，係架巴士度仲見到hocc訪問張繼聰，幾好睇XD