今日10點幾起咗身，今日同阿媽去書展，咁我就自己搭輕鐵去join埋我阿媽，，等緊輕鐵個陣，竟然見到麥俊輝喎(後來佢喺市中心落咗車)，之後喺屯門西鐵站搭961過去啦，點知架車咁耐都未到，再等啦，先等到架車。

可惜，去到會場，都已經過咗1:00，冇得買到10蚊d飛啦!

好啦，最後就買咗$25果d飛，之後就入場啦，但我地行咗好多個鐵馬、好多條自動電梯、仲行埋入一個我唔需要入既兒童圖書展覽館，先去到Hall1，唉~

喺Hall1度有好多我要嘅書呀，有錦繡藍田、消滅九龍、殺出香港等啦!可惜全部都係得8折，折咗都要成80幾蚊一本，我就唔捨得買啦，之後，我同阿媽就去咗埋邊既美食檔啦，但係d嘢超貴，一碗公仔麵都要成$20，但由於太肚餓嘅關係，所以都買咗碗食，但估唔到碗嘢又細又冇味，真係…，不過，阿媽都買咗一杯楊枝甘露，但固然唔平啦，都好過冇呀，而且算好飲啦!

既然喺Hall1冇收獲，梗係要轉攻去Hall2啦，好明顯呢一層比下面嘅Hall1冇太多人，行起黎都舒服d，而且d書都平d，所以喺度有收獲，而且平到三折，正呀!以下係我嘅收獲:

第1本:萬歲少女萬萬歲 $23.1

第2本:酸糖果 $23.1

第3本:馳放的片刻 $25.2

之後，就同阿媽走咗啦，臨走之前，篤咗串魚蛋食，就搭咗村巴番去啦。

但番到屋企之前，發生咗一段小插曲，我買d書嘅code竟然未除晒，結果同阿媽去兆鄰百佳買嘢個陣，擺喺門口個防盜器就響啦，真係……。

但總括而言，今日都唔差得晒嘅。