今日我真係冇出街啦~剩係落左街買下午茶咋~但係唔知點解好似唔係好做到功課 可能訓得太晏掛......但係又真係唔想起身........
夜晚繼續聯絡既工作,JointU那邊定左9號開會啦~自己呢邊好似仲有好多野要攪,又有好多野可以執黎做,不過我唔執啦~廢事下次開會傾開我又做左I既野就唔好啦~內務既野內務幹事攪,外務既我會攪~呢個係分工問題,唔好怪我啦...... 不過真係攪唔掂時,我會幫手的~但係係真係知道自己做唔掂前,做左佢先啦~
我而家有時都係覺得,內務既野比外務輕鬆,唔駛對住咁多人,人少d易d溝通,某種意義上都係一種幸福黎既~

今日算係過得去啦~訓完覺之後有返d心機~不過都察覺到自己最近成日唉聲嘆氣,唔知點解~要多多注意先得啦~
下午時諗諗吓,都係想去行吓街,所以就去左沙田行~好豪咁食左個$110既lunch 好耐冇試過咁豪~只係想假期享受一下,我諗唔過份掛 之後就行街啦~買左好多野~去到無印時心大心細的,都係幫支莊買左另一本記事簿~自己買左本細的~又買左d糖同螺絲批套裝~去到好運時又勁買漫畫同DVD,花費唔少,不過感覺個人放鬆左同開心左 聽日我就會留係屋企做功課架啦~
今晚同尤魚傾開偈,發覺自己個心好沉重,重得好緊要...我真係咁放唔開嗎?其實好似'御用閒人'既對白咁,可能我自己要求太高,太過強求~其實既來之則安之,凡事隨遇而安,咁樣個人會開心d~我都係時候放低一d重擔啦....
另外今晚先發覺做聯絡都幾麻煩,一時咁樣一時又唔係咁樣,唔知點咁~不過做得呢個位,我一定會做好佢既~
唏~我一定要繼續努力仲有戒掉唉聲嘆氣既習慣呢~

好悶呀~心情同生活都好悶~唔知點解,想搵同學行吓街都搵唔到,男朋友又唔係香港,真係好悶呀....我自己其實都有功課要做,不過趁假期想懶幾日而已~睇黎個勢都係迫我提早開工,咁聽日我唯有乖乖地做功課啦~ 不過我可能都會自己一個去近近地既地方行吓既...

又一本日記啦但係都冇辦法,因為之前那一本壞了,所以就又申請了呢本~今日發生左好多事,JointU既職位已經定左,我果然做左人力~雖然之前有諗過做主席,不過我冇凝聚力呢個都係事實....不過大門做主席我都好放心...暫時就係咁啦~不過自己係City支莊既外務副主席,理唔到太多內政,而家又唔駛我理太多外政,即係...我hea hea吓都可以了吧~都好既...回歸平凡,之後真係可以對住個天嘆茶啦...(退休狀)

前日我同哈爾重逢啦~好開心呀^^我去左又一城既戲院睇~哈爾依然都係咁有型^0^同尤魚和Treeman一齊去睇的,由於好耐都冇同朋友一齊睇戲所以好開心呢^^下次一定要再一齊去睇^^

今日證實個vowter壞左,好灰呀....復活節假期間我部notebook都上唔到網啦........

尋(23號凌晨)晚我冇訓覺,同阿藻,尤魚,阿培聊天聊到天光~言談間講到莊務的事情,突然之間好像有所感悟.......

或者即使係外務副主席,只要有心,都唔會同莊員疏遠,其實,就算職位好細,一樣有佢既效用,意見一樣會被接納......

或者我唔駛擔心咁多?我知道我已經唔可以再郁動任何既位置,希望將來一切都會順利啦.....