今日一上到課室,我隔離嗰個人問我整燈籠d膠紙用晒未,因為老師派膠紙時,係兩個人一齊用的。我琴日整咗咁多野,當然用晒啦,然後隔離嗰個又講咗幾句難聽嘅說話,我又頂咗佢幾句,結果換來嘅係,一整個上午都喺度冷戰。
今日唔知點解,老師無端端講一d唔關課本上嘅內容嘅野,比如說,數學老師用咗半堂嚴肅地同我地全班講升中d野;英文老師又唔知喺邊個話題講起數學d野。
視藝堂時,我地全班都落晒去視藝室繼續做嗰個討厭嘅燈籠,點解我會話佢討厭?咁係因為有時候d滕會失去黏力,繼而一次又一次彈到我塊面到。呢一堂主要係為呢個燈籠黏個d包裝紙,個d白膠漿好噁心呀!乾咗之後,就附咗喺你隻手隻上面,變成一d唔知點講嘅野。
食完飯之後嗰個小息,發生咗一個既美麗又冤枉嘅誤會,話說c走咗去做風紀之後,我將頭伸出去,但係卻被c見到,以為我想睇佢走咗未,然後重創佢張椅,我當然否認,其實我心裏面諗嘅野同佢諗嘅都係一樣,結果被一群女仔圍埋過嚟罵我,我馬上諗咗一個簡直唔係藉口嘅藉口:「我之所以將個頭伸出去,係突然唔記得咗廁所係邊,伸個頭出去望一下炸」佢地當然唔信,繼續罵,罵到我受唔到,作咗一個借尿循嘅藉口出去。
行到一半時,我聽到有d笑聲同我將枱被重踢嘅聲音,我急忙行返去課室,如我所料,成班女仔真係喺度整我將枱,我急忙拎起我個書包,拎去我最好朋友──郁國傑個度。小完息之後,我地要去聽個d升中講座,我馬上哄返我隔離嗰個,哄人多麼易啊!
呢個升中講座,家長都嚟埋聽,講者係信義中學嘅校長,由於我想入信義讀,所以我打醒十二分精神去聽佢講嘅內容,大概聽咗兩堂嘅時間後,講座宣佈結束。放學時,成班女仔都想目睹我媽迷人嘅風采,等到我媽出現時就歡天起地咁走,都唔知佢地搞乜......
