今日上中文堂時,又有校長嚟監督,所以中文老師好似成個人都變晒咁,又邪惡變到善良,比如說,平時佢叫我地答問題時,都會叫我地全名,但係係呢一堂,佢竟然破天荒咁叫我地個名最後個兩個字,真係假!
上常識堂的時候,常識老師唔知點解講到我地嘅背隻後面個d神經線,佢講得好快,以致到我地全班都唔係幾明佢講d咩,大概講咗成十五分鐘,到打鐘時,佢先醒起原來佢啱啱講嘅係唔係課本裏嘅內容,急忙講返正題,講返書裏面d野,攪到我地遲咗五分鐘先落堂。
一路d堂上大致上都冇咩問題,臨食飯前個一堂,因為我係全級英文成績最好個十二名之中,所以我和同班兩名同學一齊上另一個英文班。係呢個班裏面,嚟咗好多新人,也踢走咗好多舊人,只有我同另外兩個男同學有得留底。呢一堂主要教中學時主要嘅對話技巧,大致上都冇咩特別。
食完飯之後,小息時,我地全班可以去電腦室,但我係個度覺得好無聊,因為個度乜野網站都封鎖咗(包括你而家上緊呢個)。小息完之後,我地上返去課室,不過係老師未嚟之前,我隔離嗰個人無端端用佢鼻裏面d分泌物攞出嚟嚇我,我唔知點解佢會咁做,再次證明佢腦面有幾條神經線打咗幾個死結。
最尾個堂,我地六年級個個都要落去聽說話技巧課,上到一半時,講者(嗰個就係我嘅常識老師)突然罵我地成班男仔無攞筆出嚟抄底佢講嘅重點,攪到俾佢罵咗一餐。
返到屋企,我先醒起要做視藝嗰個燈籠模型,急忙攞起d老師派嘅膠紙,因為我以前未用過,所以都幾笨手笨腳,搞咗成半個鐘先做得晒。
