今朝一返到學校,係早會,所以我和朋友係操場漫無目的咁行嚟行去。睇嚟過咗兩日假期之後,同級嘅人都冇再傳我吻c,雖然間唔中有一兩個女同學嚟取笑我,不過有傳嘅人好明顯少咗好多。

  一上到課室,直到小息時,我同c照樣係不瞅不睬,咁樣對於佢同我嚟講都係一件好事,當第二個小息過咗之後,係常識堂,上完之後,發生咗一件令我覺得好嬲嘅一件事。

  話說當我諗著俾我本手冊俾隔離嗰個互核時,我擺咗枝原芯筆係本手冊上面,推過我隔離位張枱,但係佢仲拾緊野,未得閒同我簽名,但係佢隔離行嗰個女同學卻行過嚟,拎走咗我枝原芯筆個筆蓋,拎咗去俾啊c到,c面無表情,二話不說就行咗去垃圾桶,扔咗個筆蓋,我簡直唔敢相信佢咁夠敢扔。當我正想報復時,音樂老師剛好叫我地出去排隊去音樂室。

  上到音樂室,即使優美的音樂都無法洗掉我嘅憤怒,我不停咁踢嗰個攞咗我個筆蓋俾c嘅女同學,搞到佢連歌都唱唔到,但係c離我個距離好遠,所以無去報復,等到放學時,我問佢係咪真係扔咗個筆蓋,佢無應我,繼續同佢個同學傾計,呢個時候,無數嘅怒火充上我個腦袋,令到我一時衝動狠狠地踢咗佢個書包一下,過咗十秒鐘之後,我先知道我做咗d咩,於是急忙拉著一個朋友走佬。

  返到屋企,怒火又衝上我全身每一條神經線,做功課時,我氣得一連整斷咗兩枝鉛筆,心諗,點解呢個世界上有d咁黑人憎嘅八婆。做完功課後,我隔離坐嗰個同學打電話嚟,同我玩「誠實與大膽」,咁先令我嘅憤怒被淋息咗少少。