雖然並唔係今日發生，不過寫出黎唔會被淡忘。
興幸自己無陰陽眼，無見過d野，不過都經歷過小小，
以下係疑似靈異個案，只係解釋唔到未知係唔係。
第一位：最驚果次就係好細個(無記錯應該係小學雞)
當我係房坐係床果陣係耳邊好清楚聽到一聲女人叫聲，
(寫緊呢句果陣個心都仲係寒)嚇到我腳軟喊埋出黎，
當時係打風落雨，我媽解釋話係風聲，
不過自此我都未聽過咁樣o既風聲。
第二位：都係好細個，仲細過上面單野，
我望出窗口見到對面座廈有個好大o既人影係度跳舞，
個人影係有層樓咁大，當然我唔排除係某種投射技術，
呢單野未必係靈異事件，不過至今亦無再見過，
亦解釋唔到點解可以投射到咁大個影...
第三位：呢單真係細到我都唔知讀左幼稚園未，
夜晚訓醒望出窗見到有魚游緊(好誇張哩，好似童話故事咁)
當然，亦可能只係夢，但真實到今日都仲記得。
呢兩單野因為太細個，只覺得奇怪完全唔識驚。
第四位：呢個就係中學後o既時期，
當晚我同莊兆毫、蔡樂霖一齊響康怡花園公園仔吹水，
忽然係棵樹上面有隻好似貓咁大o既黑影高速閃過，
當時我同莊兆毫都目睹，後來亦理性分析番，
唔係貓(樹上面喎)、唔係鳥(好大隻喎)仲要高速，
無可能有咁o既物體咁o既速度經過之後唔見左。
第五位：呢個應該近呢十年內o既事，
當時屋企僭建範圍仲未清拆，有次打開個假天花，
見到一舊好似老鼠咁o既石雕係入面，舊野仲要有眼，
奇就奇在，邊個放舊野入去？點會無端端有舊咁野？
第六位：呢個到上年夏季都仲有發生o既不解之謎，
話說我會放個電風扇係電腦檯隔離，平時無開風扇，
我用緊腦果陣個風扇經常會無端端「砰」一聲響，
就好似有一D細小o既物件撞擊扇葉咁，
我有諗過會唔會係d蟲，但之後一定搵唔到相關o既蟲，
仲要每日總會聽到幾次以上，無理由每日撞幾次架，
仲係呢幾年黎都有發生，同一隻蟲應該唔係度啦。
不過好似衣家冬天咁，d風扇用個袋包實就無發聲。
跟住要寫o既都係日誌寫過，可參閱慄正局分類，不作詳述。
第七位：蟲何而來果篇，第八位：澳門靈探果篇。 |
