又係唔係咩野新番，故事整體而言都相當出色，
亦有意想不到o既發展，但頭十話莫名其妙，容易令人棄番。
果十話用黎迎造故事舞台，充滿唔同組織品流複雜o既都市，
坊間不斷傳出組織與組織之間o既角力鬥爭，
再穿插帝人、紀田、杏里三個同學柴娃娃o既校圍生活，
以及每個角色都交帶一下佢o既背景，花瓶角色o既戲份都好重。
又塑造出傳說般o既無頭騎士，但呢幾樣野都扯唔埋九唔答八，
到中段，看似置身於事外，對呢d組織感到畏懼o既帝人、紀田，
原來各自分別係dollars o既首領同黃巾賊o既將軍，
杏里居然仲係妖刀罪歌o既操縱者，故事變得異常有意思。
三個好友都隱瞞住自己o既身份，亦唔知對方o既身份。
等睇佢地幾時身份敗露，甚至好友反目o既一幕，
幕後有個為左睇好戲o既花生友精心策劃組織之間o既紛爭，
呢個角色感覺似HxH o既團長，長期一副空有成竹o既態度。
佢仲持有無頭騎士o既頭，到故事完都無乜下文，留伏線？
尾聲紀田知道帝人身份、杏里又知道紀田身份，
偏偏係呢d關頭又玩失縱，無辦法三口六面講清楚。
要最尾搞場大龍鳳先可以擺平件事，但呢場交太兒戲，
寧願比無頭騎士大展身手仲好，居然話dollas成員混入黃巾賊內，
話混就混到，仲幾下子就控制局面，所謂組織都幾流下。
第25話算係一集交待各人無聊o既事後生活。
個人認為兩個妖刀操縱者對決果幾話都有驚喜，
話說砍人魔本來係妖刀，殺到埋杏里時原來杏里都係妖刀。
另外，劇中會出現其他動畫作品o既角色，
例如第一話就出現狼與香辛料o既赫羅紙版(開頭以為類似姐)
然後又出現地獄少女電影海報、灼眼夏娜o既figuar等。

記得兩年前o既千奇百趣，當時主要係講日本野，
的確有好多都睇到O咀(果陣都唔係集集睇)
例如講有d奇人可以出街全程頭頂托住個花樽唔跌...
衣家介紹o既奇趣野就圍繞省港澳，但唔夠力水囉，
講下d螢火蟲，講下間欄屋上面有個神位，
同d同事響好地方(茶餐廳)一路食晚飯一路睇，
同事CS都話：「有幾奇呀？」
就好似：「千奇百趣，椒絲腐乳炒通菜，仲有牛肉添。」
用叮噹把聲講，乜都比佢千奇百趣晒啦。
然後輸左o既嘉賓要接愛絲襪笠頭o既懲罰，
好多靚女就咁形像幻滅啦，笠左之後變左豬頭。
學杜文澤話齋：「有陰影架！」
如果d名星稍微顧及形像，就米鬼參加呢個節目啦。

雖然加得唔算多，但點都要賀一賀。

為Royce慶生，約左拎姐、Emily一齊食lunch，
大家都離開左亙動兩年，仲可以約埋一齊食飯，難得。
本來諗住食APM CoCo日本料理，但等左幾個字都未有位，
但求就手過左隔離羽壽司，即刻有位唔洗等。
當日我送左個Magic mouse比Royce作為生日禮物，
公價$518架，算係咁啦。 XD

EA出o既名作The Sims移植到facebook平台，
出左咁短時間facebook個list已有廿幾人玩緊，
漫延得好快(我facebook得百幾人黎講有玩o既算多啦)
系統相當豐富，比起其他facebook game無咁快沉悶。
不過硬件要求出奇地高，我屋企部開都窒到行唔到，
要番公司先玩到，所以我係無乜煲o既玩家。
先黎講下賺錢，早期可以靠練結他、微波爐、電腦賺錢，
(當然仲可以剪草、執垃圾啦，不過效率無咁高)
以練結他為例，一開始練Scales，每練一次賺12蚊，
練夠5次就學有所成，可以進一步練Arpeggios，
每練一次Arpeggios賺13蚊，如此類推，練習更高技巧，
所賺到o既錢會更多。但練一次結他會扣一格閃電，
閃電最多15格，所以一段時間內只可以練15次，
用晒d閃電就要等時間黎叉電，每四分鐘回復一格電。
當結他練到咁上下，要再升級就要一d唔知咩野，
呢d唔知咩野可以叫朋友send黎或平時無意中取得(?)
無就卡等升唔到上去，不過就算練番Lv1一樣有錢收。
小技巧：當Mood值全滿時每練一次結他都有額外bonus，
以Lv5黎講，mood值全滿練一次可得$16+8總共24蚊。
所以任何時候都keep住mood值全滿係有著數。
到到果樣樂器練到咁上下又可以買琴練，
務求做到以最少o既閃電賺到最大金錢o既方向進發。
講下mood，分別有社交、娛樂、食野、大便、乾淨、精神，
其實邊樣唔夠就只要o禁果粒掣，角色就會自動解決。
只有社交值比較煩，係自己屋企並唔能夠就咁o禁粒掣解決，
要足不出戶解決社交就要手動打電話，要扣閃電，
一係就要去朋友屋企解決(都係要扣閃電)
再講下技能，角色可以透過寶箱點數學習唔同技能，
有d技能學左可以唔洗大便，有d技能學左唔洗沖涼都乾淨，
有d技能學左可以同花草樹木傾計(咁就唔洗去朋友屋企)
都增加到社交值，但聽講學左角色會自然自語痴左線...
有招忍者技能學左就仲有得瞬間移動，唔洗慢慢行。
再講佈置自己屋企，將屋企佈置到天花龍鳳、獨一無二，
亦係The sims最大目標之一，用錢添置家具、擴建土地，
有d家私就要夠level先比買，有d家私右上角有錘仔icon，
即係買左番屋企仲要組裝先用得，組裝就要釘等材料，
呢d材料可以叫朋友send黎或平時無意中取得(?)
講埋社交，要同朋友發展關係亦係最大目標之一，
可以發展到普通朋友、好朋友、情侶、舊情人(分左手)，
要同朋友個角色傾計去增加好友值，
再向佢提出交往要求，只要對方(真人)同意，
就可發展情侶關係，仲可以發生性行為、一齊沖涼等事件，
The sims無話唔比同性戀，男女、男男、女女都以做情侶。
我同上司講隻Game咁hit又咁複雜，出番本攻略有得諗，
佢話頂多出得一手(16頁)，我心諗剩係上面咁多樣野，
每樣詳細介紹下都有排講啦。