好地地雞比送飯，做乜要咁手多幫隻雞斬件？
家陣我唔識得自己搣黎食？斬件都唔係問題，
問題係把刀又唔夠利，勁多骨碎，口感差勁！
呢d咪就係畫蛇添足囉！不過又有咁o既講法，
聽聞斬件就係佢暗啞底抽起部份肉令人唔覺，
即係唔係足本一隻比，可能兩隻比送三碟飯，
唔怪得食落硬係好似爭緊d野啦...頂。

年輕o既主持做一個老餅o既節目，好唔夾，
一向呢個時段都係講d潮野o既叱吒叱叱吒，
以前響公司一到下晝就同d同事一齊聽，一齊笑，
都不失為辦工時段o既共同樂趣。
衣家轉左講old school野，好唔掂囉。
就算係想比後生o既一輩去認識d上一代o既文化，
頂多做一個環節啦，唔好全個節目做，
仲要集集請一位老名星黎做嘉賓，好唔吸引。
一向寸咀o既當勞同少爺占，連雲海都比佢寸疾，
(真係一物治一物，一向恰慣亞祖o既雲海，
早排個叱吒902經常唔夠當勞講，好好笑)
衣家要佢地夾一個好有份量o既鄭裕玲，
佢地邊夠膽寸咀呢？唔驚第時係tvb無運行咩？
但佢地就住就住唔寸人即刻無野好聽啦。
唯一可取之處仲保留番廣播劇-鋼鐵老豆。

今日係中秋節正日，d同事都好早就收晒工，
放左工之後嘗試答601落灣仔，真係響集城落，
以後響觀塘直落188就方便好多lu~

響公司用mac os版倉頡，係屋企用windows版倉頡，
雖然大致上都相同，但有d字拆碼唔同，有d仲係常用字，
例如：遲、屬、鬼、面、假、應、非
有d字排序唔同，例如「唔」呢個咁常用o既字os居然排第2，
常用到剩係一編網誌都出左5個「唔」字啦。
比一個未必人人識讀o既「跖」字優先？無野呀fa？
搞到變相要打多個碼囉，平時「口一一口」變做「口一一口2」
win版「果」係第2響os版又變左第1(「困」字變左2)
搞到經常係win版打左os碼，os版打左win碼，好煩！
仲有os x版倉頡無得用[頭碼]+[*]+[尾碼]黎當速成，
搞到中間d碼真係諗唔到都無得走盞，以前os9都仲有呢個功能，
os x做乜無左架？好在只打1個碼都有得揀果個碼開頭o既字。

又係公司聽番前晚果集摩星嶺，呢集幾爆趣喎，
講係羅茲威爾出現o既非外星人現像，
例如有個無底深潭，d羊會族隻族隻跳晒落去唔見晒，
又有架車跌左落呢個潭入面，過一排係第二個山洞出現番。
之後又講下當地公路有幾隻史前速龍過馬路，仲要迷你版。
叮噹應該話：「係咪有人用時光機帶左佢地番黎呀？」
又講下夜晚有無頭女騎士出沒，仲要有典故，
話說呢個無頭女騎士生前要迫婚，但個男人有情婦而悔婚，
咁就拎枝槍殺左個男人同個情婦再自己爆頭...
又講話出現八爪魚人、羊人、半透明馬，真係千奇百趣，
當然都幾難會相信，但當係搞笑野聽下確係幾過隱，
即係睇何里活d科幻片都係為左娛樂姐。

Clamp少女畫風+獵奇，向廢怯致敬嗎？
故事節奏奇慢，悶到無力追看，
對話亦非常沉悶，例如A問：「沒事嗎？」
B隔一秒答：「沒事」，A又問「真的沒事嗎？」
B再答：「嗯」，A回應「太好了。」睇到訓著。
女主角個格亦唔討好，一時又cool一時又天然呆，
身手好到可以空中打關斗o既人會行行下仆親？唔合理。
番學又唱「今日はいい天気」，好小學雞呀~
睇到第6話末段開始有d睇頭，寧寧比怪襲擊，
想睇一向唔公開身份o既小夜點收科，
點知個寧寧被「麻美」掉，死無對証。
跟住連諾諾都比小夜分屍，一集死左兩個非路人角色了。
不過拖到第7話先發功，遲左d，好似廢怯第3話就獵奇，
或者Blood C應該都挽回唔少收視率。
其實呢套野幾賣暴力，先後都有唔少路人比怪咬爛。
另一賣點根本就係睇小夜點樣比d怪折磨、糟質，
但係又勁硬淨，斬幾多刀都唔分屍，噴幾多血都死唔去，
眼球果集又係明放餐屎，明明有用棍篤落小夜o既機會，
點解唔掉轉用有利刃果邊插落去黎個致命一擊？
又有機會掃低小夜，如果掃果個位係利刃都切斷腳啦，
唔係d怪處處留手，小夜早就被四分五裂啦。
第8話簡直係戇居，小夜睇住怪物殺死幾個同學先出手，
唔好再遲d？編劇果個係咪腦殘黎架？