睇左o既有：
《境界上的地平線》第1話，未來科幻背景o既校園故事(?)
學生有巨乳少女、水涌粒頭o肌肉男、香腸咀印度男、
一把正經男人聲o既史來姆(?)生物等，極之九唔答八，
應該係後宮kai野一套，男主角(?)眼神唔討好，無乜力追落去。

《C3》第1話，又係一套行貨男主角屋企突然多左條女o既橋段，
條女又係一開始無衫著、不食人間煙火o既傲嬌美少女比佢照顧...
可能好多宅男都渴望呢d劇情發生響自己身上，呢d橋出極都有。

《我的朋友很少》第0(?)話，睇過o既新番中人設最討好，
不過睇黎又係IS果種後宮爭寵戲，興趣唔大。

未睇但打算睇o既有：
《Persona4》(PPS譯女神異聞錄IV)，Game改編動畫，
雖然無玩過，但人設有《無頭騎士異聞錄》風格(唔知動畫似唔似)
我好buy呢種城市潮童(諗唔第2d字形容 XD)o既色彩。

《灼眼的夏娜III》呢都想睇，不過都無睇過第1第2季，
一睇就睇第3有d兩頭唔到岸(都怪PPS一直都無灼眼)

《Fate/Zero》又係未睇過前面果d，不過呢套好似係前傳，
當新野睇應該唔會有衝突掛？加上音樂係由尾浦由紀負責，
我勁鐘意佢果種聖殿、悲壯o既音樂風格。
(廢怯小圓果D BGM同ED、空之境界o既歌都係佢o既作品)

其他：
《未來日記》睇過漫畫版幾期，講一班人要用未來日記亙相殘殺，
鐘意男主角o既女主角我妻由乃係個外表美少女o既腹黑病態跟縱狂，
同時佢地都係要亙相殘殺o既對手，睇怕都幾難有好結果，
發展落去都幾令人不安...

小學雞高達AGE，幾個月前一出人設已經飽受劣評，
係想打小學雞市場，但有無顧及老fans感受？
高達應該要有壯士一去不復返(?)o既情懷加d政治同埋陰謀，
衣家個勢似係勇者王定熱血最強囉，不過好難講o既，
話唔定又仿傚廢怯咁向陽風格突然獵奇殺你個操手不及。

《爆漫2》、《世界一初戀2》、侵略花枝娘2等都無打算睇~

一部十二話o既動畫用左十話去演一場鬧劇，你都算威。
真係睇第1話然後直接睇11同12話中間果d飛晒佢都得。
十一話黎個超展開，小夜身邊o既人全部都係做戲，
之前死左o既同學唔make sense地出番黎，話有咩野護符，
咁就想濛混過個劇情，變魔術咩？擺明格硬黎啦 =_="
即係由始至終小夜一個真心朋友/親人都無，
要死o既都係要死，有咩死法未用過12話都出齊晒，
將諾諾定寧寧掰開大腿撕開，重口味，村民都黎個大屠殺，
將一堆活人放落個大桶(?)度再用攪拌器(?)一次過攪碎，

諗得出或諗唔到o既死法通通都有，12話根本係睇d人點死。
一向嚴肅o既父親大人都變做怪物，小夜將佢兩隻手切甩，
到結尾幕後搞手文人先生坐直昇機走佬，掉低一堆謎團，
隻狗仔依然係唔知咩黎，難道呢d係第二季o既伏線？
連一直無穿無爛過o既小夜最尾都要比人爆頭，但係無死到。

另外PPS衣家先放出唔知幾多年前o既Blood+(有50話)贈慶，
睇左兩話又ok喎，完全無Blood C果種沉悶氣氛。

估唔到李氏力場失效，納沙填補蝕左國慶假期o既遺憾。
(10月1係星期6，番一至五o既人係唔係都放假架啦)
雖然好多時做傳媒打八號都要照番，但打左電話番公司，
無人聽，即係番到公司都無人開門啦，咁就唔番咯。
我果邊風就唔覺大，係間唔中落幾下雨，無乜八號feel。
直到四點幾改掛三號波，夜晚8點仲走去印廠拎藍紙，
都係一d風都無...

話說今早番工答港鐵，坐我隔離果條友係度咳，
驚比佢傳染，見佢咳多幾咳我就行開搵另一個位企。
再望一望條友，丫，係度淫笑喎，奸計得逞咁，
之後留意左好耐佢無再咳過，我心諗坐番埋佢又咳番啦。
即係唔想隔離有人坐，想坐得寬躺d霸晒兩個位，
專登以咳趕客啦，呢d人又奈佢唔何，走埋去鬧佢咩？
答車難得搵到位坐，最驚隔離左右有人咳或打乞痴，
有時仲要坐左埋位先知中伏，而其他位又無晒先慘...
我都明白咳呢d野忍唔到(除左扮果d)
所以換轉答車我咳我都唔介意d人會彈開~

去coco食咖喱飯八十幾蚊，食青葉138蚊任食，
叫碟飯過二百蚊應該係第1次(無計啦我呢d窮人係咁架啦)
蔡記話要食日本野，咁耐無見就豪一次啦，
去銅鑼灣wtc食，間野無留意叫乜名，
拎左飛等位都等左半個鐘，貴都算啦，都要等咁耐，
佢叫左個炸蠔豬扒定食，198蚊(未計加1)
我就叫左個炸大蝦豬柳定食，都係198蚊(未計加1)
係就係幾好食，不過二百幾蚊食餐飯真係貴左d。