微波爐呢種電器都算易壞掛？
前公司G-zone又壞過微波爐，
衣家間公司都有一部微波爐壞左，
今日輪到我屋企部微波爐壞，
聽講對上部微波爐都係用左一陣就壞，
仲唔係易壞？

本來都無買飛，幾個月前問同事R飛，尋日佢都話唔好意思無呀，
免費o既野唔強求咁多啦，咪話唔緊要啦下次先啦。
點知今日下午六點打個電話黎話有位剩喎睇唔睇？兩個鐘後開始，
咁不斷搵人陪睇，搵左田中、Kenny、強哥、燦、松、Laurence等人，
唔係打去無人聽就話約左人一陣有野搞唔黎得。
都990蚊飛架你估平野架，鬼咩，臨時臨急要搵人唔容易。
之後搵左+樂去睇，Alan話佢係L'Arc忠粉，咁一定唔會浪費啦！
上次睇X-japan跟saya帶路，答地鐵再轉的士，
今次就自己由香港站答去機場快線，一出站就已經係博覽館。
入到場好在趕得切，今次企個位雖然遠d，但附近左右無乜人，
可以自由活動，只係拎部iphone影相都比實Q阻止(唔好話舉大機)
全晚氣氛一樣激昂，巡例都講幾句廣東話向香港o既粉絲問好，
有唱鋼鍊o既op，不過可惜無唱到Gundam 00 o既op，
又話去廟街買左個釣魚玩具(佢地落去呢d地方可以全身而退咩？)
不過無好似X-japan咁彈獅子山下之類o既香港經典。
Encore時都係觀眾係咁踩個觀眾席隆隆作響，當然唔少得人浪，
坐前面果d變左立法會d官員咁比L'Arc掟蕉，笑左~

唔覺得派傳單其實係搵緊你笨咩？塞d垃圾比你，
唔好忘記佢係有錢收架！每拎多張傳單佢都多左錢落袋。
有乜辦法對付？有得告佢地阻街我第一個告左！
最好o既對付方法就係唔好拎佢地d傳單，
等d老細知道派傳單達唔到宣傳作用就唔再請人派，
條街都夠多人架啦，少左d傳單亞嬸舒服好多。
派傳單o既係靚女都算啦，係要搵埋d亞嬸，
仲要黑口黑面擺明趕客，影響市容，唔好話拎佢張傳單，
見到佢都想混路走，宣傳唔到仲有反效果添，何必呢？

假假地都叫做響傳媒界打滾左好一段日子，
不過係負責美術，唔係寫文章。
其實做編輯都係我想做o既其中一種職業，
自問行文流暢，話晒作文都係我強項之一，
今期問老總R左一版稿比我寫Game，
就寫Tales無雙，排埋比佢，一take pass！
可惜小弟讀得書少，要認真做呢行睇怕路途遙遠，
莫非「細個唔讀書，大個做Game書」？
真係做Game書就吃力得多啦，
要迫自己玩d唔想玩o既Game，
衣家咁咪幾好，可以寫下自己鐘意o既Game。

或許你聽過twitter、微博，但未必聽過噗浪。
的確，我都係近期先認識呢樣野，
而早係2008年plurk已經面世。
plurk其實好似facebook o既近況咁，
通常都係一句起兩句止，
一出就連朋友個wall都自動顯示埋。
其實都可以係比facebook取代所以plurk先咁唔出名...
不過奇就奇在plurk特別吸引一堆同人界o既朋友，
我識得o既人有plurk acc o既共通點都係玩同人。
今時今日真係乜野都要放上網，
食串魚蛋又要分享，行過尖咀都要同人分享，
咁鎖碎o既事無理由一一寫晒落blog度架？
plurk就係收納呢d雞毛蒜皮o既好平台。