個名應該叫「我的後宮很多」，現實情節o既異想天開，
女生玩Gal Game，含羞讀埋d工口對白呢d有味情節...
(不過理科毫無忌諱七情上面咁讀工口野又無乜味喎)
仲有玩偽MHP3同心跳回憶，有玩過o既人更o答落有味。
話時話佢隻聖劍刀鍛治似到咁？好似唔係影射咁簡單。
後宮雖多，但小鳩係妹、幸村偽娘、理科變態、修女弱智，
到頭來真正食得o既得番夜空同埋星奈，二擇一o既話，
個人比較buy鷹配夜空，但夜空經常欺負星奈，
照咁睇奸角可能到最後未必能修成正果。
不過故事中經常插入鷹o既童年玩伴，睇落雖然係仔，
但就髮色、瞳孔色、同把聲推段果個根本就係夜空，
而且夜空本人應該已經知道，只係一直都唔去相認。
睇下憑呢一點結尾可唔可以一齊啦，暫時睇到第9話。
全套劇都相當歡樂，一路睇一路笑。

一晚內由12話睇到24話，終於睇晒全套。
我無玩過原作，好似話呢個只係其中一個ending，
原作仲有其他結局，有紅死、岡倫死等bad end，
動畫版呢個保住所有角色條命o既算係good end。
劇本相當出色，開頭岡倫做左孤獨之監視者都幾慘，
改變左o既世界得自己一個知道，其他人當佢傻。
佢為求令真由里唔洗死而不斷做唔同o既事企圖改變世界，
但無論去到邊，真由里時晨一到都出現唔同o既致命意外。
岡倫睇住佢o既幼馴染死左幾廿次都救唔到，變得麻木，
開頭死果幾次情緒激動，到後來死左只係冷冷講句抱歉，
甚至為左要計算佢死亡o既時間專登做實驗等佢死，
其實對岡倫而言係受緊幾大打激，睇到都心酸。
而響岡倫面前經歷一幕生死劫，例如紅係隔離被槍擊，
跳番去之前世界線，紅若無其視咁望住岡倫，
仲要對佢吐糟，和階氣氛之下滲出一絲絲莫名o既悽涼。
話要改變咩野1%世界線變動率就要回朔番，
搞左咁多野個世界都無推進過，係咁砍掉重練米話唔頹。
原來被改變過o既人都殘留另一個世界線o既回憶，
故事即刻變得明朗，岡倫都未至於係孤獨監視者咁頹。
後期岡倫去到唔同世界線，紅都可以好快地相信佢，
為佢出謀獻策，亦都顯得岡倫唔係剩係自己一個作戰。
後來發現回朔到第一封D-mail紅係會死去，
而岡倫同紅係(突然)相愛o既，岡倫忍痛選擇失去至愛，
諗住一切可以改變，點知打工戰士都係未來番黎，
今次唔係SERN統佔世界，係爆發第三次世界大戰，
而阻止事件o既關鍵反而要唔比紅死，咁先叫做大團完。
故事由頭到尾都係以岡倫o既視點去運作，
都想知響其他人眼中岡倫跳去其他世界線後係點，
係岡倫響佢地面前消失丫？定亦或乜都無發生，
由另一個岡倫繼續飾演果個世界線o既岡倫？
跟住眾人睇住跳線失敗o既岡倫：「點解咁o既？無理由架」
又或者果個岡倫失去左靈魂好似植物人咁棟左係度？
呢一點紅都係故事問過岡倫，只係一句who __ care交待...
如果跳左線o既岡倫係消失或者植物左，
佢d同伴都幾慘，咁就失去左佢地重視o既岡倫。
題外話：用回到過去、時光機呢d橋可以話實無死，
諗起以前由kinki kids個堂本光定光一做o既日劇，
講佢去到幾多歲心臟麻痺死左醒番又番番過去，
然後籍住未來o既記憶改變人生，中彩票，
做埋集團CEO，但佢去到果個時候都係要死，
然後又loop番自己o既人生，loop到佢自己都無癮，
有次居然認識到同佢一樣特質o既時光旅客(女仔)，
之後係點已經唔記得，不過到衣家諗番個故仔仍然吸引。

尋晚同亞媽去睇優先場，套戲賣點係乜？
除左johnny depp之外我諗唔到第二d野。
佢飾演一個頹廢記者，群埋d頹廢朋友，
識到個有錢佬，有錢佬比job佢做，
點知有錢佬條女又無端端鐘意左佢...
(鐘意佢d咩呢？因為佢係johnny depp?)
然後有錢佬反轉豬肚，份工都無埋，
就話搞反擊，用剩番果100蚊去滾大舊錢，
諗住印一次報紙唱衰個有錢佬同人渣，
通常呢d劇情個主角都可以絕地反擊，
但呢套無，到佢由100蚊滾大到6千蚊，
到最後依然條件未夠白做一趟，
只係查走左有錢佬架小型遊艇就算，
(又會話渣就渣走到o既，佢真係魔盜王咩)
然後出一段字話主角做到出色o既記者，
下？就咁用段字交貨就算？好爛囉。

以前都keep住聽903，每日播d派台作，
咁就自然緊貼最新流行曲動向，
唱k都唔洗唱《相逢何必曾相識》。
自從欣宜進攻樂壇後，我就停聽903一排，
好驚聽到佢d作品！
如果佢好似艾粒咁唱d騎呢歌又無乜野，
米鬼走偶像路線啦！好反感呀！
唔係歧視樣衰乜野，係街見到我唔會出聲，
但扭開電視都係預左想睇靚野，
肥同樣衰唔好污染呢個名星世界！
仲要走玉女路線果下恐怖！
諗住佢過下口隱唱一排就自動退出樂壇啦，
呢排都開始聽番903，換個新o既HKtoolbar，
一如以往咁聽1872遊花園，
完節目例排播派台作，
聽完之後話係欣宜o既make me cry，
唔係呀fa？又出新歌？搞錯呀？
要搞到聽親女聲唱歌都要熄收音機先開心咩？

講黑社會爭住唔想做坐管個位，
係插左唔少笑位，但笑點唔夠力水，
未能令人噴飯。
整體而言算幾無聊，一場鬧劇死咁多人，
可見兩位主角都幾冷血無情，
話就話入黑社會係唔o岩，
但果d假假地都係為你出生入死o既人，
係唔係因為佢地係黑社會而死不足惜？