番到公司老細叫左我入房話Sindy做埋今個禮拜五，
咁又係o既，每日d工作做極都做唔完，我都估到會咁。
兩個人負責砌本雙週刊，A書88頁+B書48頁不突止，
仲要搞埋小說、繪本o既書(我仲有每月o既叢書)，
唔係唔得o既，我每日要貼埋自己d私人時間囉，
做呢行OT無補水架嘛，OT都預左架啦，
但日日要OT就唔對路啦，人工又唔係高喎...
我只要求一個禮拜有4日準時放工姐？唔過份嘛？
都算啦，假設有一個人請病假咁點？咪要脫期？
如果唔及早解決人手不足呢個問題，
請新人番黎都可能做兩野唔對路辭職，惡性循環喎。
公司d位都塞到滿晒，仲要已經兩張檯變三張檯，
四格變五格，睇怕都間無可間，未必請到多過人，
一係全個art team一齊share新雜誌，
不過佢地做左咁多年穩定工作量突然加多左野，
咁咪變相減薪？d新人唔定工作量就話可加可減姐，
計我話最好o既解決方案就係雙週變月刊。
同時可減輕編輯部o既工作量雙贏~

估唔到2011年十月番唯一睇晒o既只係得呢套，
用左11集鋪o既伏筆(夜空就係鷹o既童年玩伴)
黎到12話終於要爆啦！期待佢地有乜展開，
結果係...無，仍然係草草了事，殘念。
唔通真係比我之前講中，壞人無得修成正果？
尾聲雖依舊歡樂氣氛，但背後略帶絲絲悽酸。

放工約左Royce落旺角，4點幾都未食lunch，
搵左間豬鼻日本料理，呢d時段唔洗等位，爽。
用餐後就開始屠龍，幫佢清左兩個HR7 key quest，
發現外面已經質滿等位o既人... XD
拿拿林埋單廢事白木到比人趕咁樣衰~ XD
轉駕步，決定去星巴克玩定係join團，
反正一場來到旺角，當然試下join團啦。
去到金雞25樓，原來同場有兩大forum團，
一個高登一個gaf，但兩團人各不相干。
查實大家都係芒亨友應該彼此無分國界，
一齊玩咪仲熱鬧，再者MH3G大不如前，
想當年MHP盛世係去到邊間麥記都總有一兩團，
甚至旺角果d長期都有四五團座陣，
只可惜MH3G出響普及度低o既N3DS上，
一般芒亨友未必肯為左隻game而出機，
機價14XX+GAME價4XX+百幾蚊slide pad(未必洗)，
大拿拿差唔多二千蚊先有得玩，門檻太高啦。
就算今集幾好亦枉然，浪費左一隻好GAME。
番屋企又落樓下間麥記兜個圈睇下有無獵人，
估唔到真係有一個玩緊(出左MH3G之後試幾次都無)
我就埋去撩佢一齊打，佢村任做到9星但仲係HR4，
就幫佢打幾個key quest，一路打一路傾開，
原來呢位人兄就係為左GAME而出機o既忠粉，
我欣賞佢，就算自己無乜得著都值得扶持佢一把，
雖然都幫唔得幾多(點都令佢清幾個任快些小啦。
最重要令佢知道唔係只得佢孤身作戰，
周圍都仲有其他獵人，MH3G未至於真係咁少人玩。
既然咁有heart，順便見議佢參加金雞芒亨聚會，
重現昔日一大班獵人一齊狩獵o既光景。
不過打完後都係無同佢交換電話，有緣先見啦 XD

連番工作辛苦左33個鐘，放兩日假叫做有個位抖下氣，
不過都無充份地休息，兩日時間比MH3G佔據左...
Laurence幫我由HR6衝到界限突破，搞掂埋煉黑龍，
清埋d食材任，當然就要搞下隻HR40月迅龍啦，
隻野煩過煩膠，本身迅龍都夠快啦，仲要識隱形，
每下fing尾同拍尾都四方八面射毒針，好難避，
打一場都用晒d解毒藥...最慘仲要彈刀，點打呀？
但佢套裝技能幾正，匠、挑戰者、掘多下、屬性無效，
仲要難得地男裝唔肉酸，每部位未升過都100防，
好吸引下喎，迫我要對多呢隻咁o既野唔知幾多次啦。

2011年最後兩日就係響公司通頂渡過，
由30號星期五朝早11點做到31號夜晚7點...
連續33個鐘無番屋企無乜點訓過(只係恰左陣)
全晚同公司d人好似hi晒野咁，
一路做一路唱歌，收音機仲要播埋d懷舊金曲，
90後都未聽過o既歌主編都一路跟住唱，
又彈埋結他，充份地苦中作樂...
31號果日連lunch都無食過，
本來夜晚6點就走，去到地鐵站收到印廠打黎，
話漏左頁數同錯頁碼，又番番公司執埋佢...
跟住隊番個kfc當係慰勞下自己，
番到屋企就緊係以昏睡迎接2012年啦。