星期一踩過公園個單車徑，
無辦法一氣呵成環繞一週，
特別係灣位都要停一停車再起動。
經過禮拜四晚再踩熟d，
今日再挑戰單車徑，成功環繞3週目！
不過踩完後架單車擺上樓上，
聽講條車呔每個禮拜都要入一入氣，
踩埋呢次下次再踩都要入氣先踩到，
而我都未買入氣果舊野，
應該會無踩得咁頻密。

呢件事我都諗緊寫唔寫好，某程度上都想淡忘左佢。
話說Laurence又黎我屋企hea，咁我同佢響客廳吹水啦，
講緊佢前公司d操底同事，我就食緊西餅，
傾傾下佢神色有異，問「你屋企係咪有果d野？」
然後打眼色示意我身後邊，我當堂呆滯左。
佢話見到廚房響大約離地唔夠1米高突然有執啡色毛髮，
慢慢攝番入去，當時我坐響張疏化係背向住廚房，
屋企得我同Laurence兩個人，亦無任何小動物...
事後送番Laurence落街答車，討論番件事，
佢話唔係眼花，好實在地形容到果件物體o既型狀，
我都唔敢即刻番番屋企住，到佢上車後都仲同佢傾電話。
最慘唔係響街見到，係自己個單位，都仲要住落去架嘛，
當晚訓教都勁驚，形住形住，杯弓蛇影，
有一下訓著左突然責醒左，望到天花版橫樑位有舊黑影，
就好似Laurence形容果件物件o既形狀咁，
慢慢消失左，我都叫左一聲「喂？」出黎，
果野我唔肯定我係咪眼花，似係太驚而產生幻覺，
亦可能真係果d野，又或者係夢境o既殘像...
不過我20年黎都未見過呢種幻覺，
亦未試過夢o既影像會響睜開眼出現...
而我印像中當時個夢都唔係好野(唔係點會責醒？)
但完全唔記得內容(責醒果一刻已經諗唔番內容係乜)
總之就係好驚，打呢篇blog時都仲好驚。

香港人有種盲目跟潮流o既習性，
唔經過自己o既審美眼光去買野。
好似最近興o既係衫袖手爭位貼塊布o既款，
老實講我覺得好畫蛇添足囉，
更令我諗起以前老夫子畫乞衣o既技巧，
就係響件衫度縫塊布上去。
心諗邊個會買？又真係有身邊o既人話買左。
之前女裝hit過d毛毛鞋，又係勁奇怪囉。
緊貼潮流唔係壞，但都要識分靚同肉酸，
唔係只會輪為商人o既獵物。

呢種秋涼天氣又未洗著到厚及及，著開d長袖T-shirt，
但圓領位略嫌單調，所以加多條頸巾就fit啦，
近排見到d環狀頸巾好似幾方便，只係8字形咁撓兩個圈，
直接笠落頭就得，唔會有條巾頭或巾尾hea出黎條條fing，
又唔怕行行下跌左條頸巾或比風吹甩。
之前響izzue見到有隻民族patten款幾靚，賣6百幾蚊，
呢個價錢都唔係問題，可惜摸落手幾吉下，
咁o既價錢o既布質都咁？失敗。
響其他衫鋪都睇唔arm心水，一係就靚patten但唔係環狀。
今日響BSX見到有條patten OK o既環狀頸巾，盛惠230，
最重要摸落好舒服，呢d先係頸巾架嘛！成交。
講開頸巾，我一直都覺得頸巾最唔值錢，根本就係買塊布，
衫褲都要裁要逢要造工，頸巾基乎乜都無賣幾百幾搵笨下。

對上果次踩單車都差唔多兩年前(2010年頭)
要等約齊人去大尾督就蚊訓，自己一個去咁遠又唔慣，
一直都想買架單車，咁就可以keep住隔一排踩，
終於忍唔住手買左架doppelganger215玩下，
(詳情： http://www.doppelganger.jp/product/215/ )
呢架$3120可摺有防震，同牌子同size可摺仲有$2570，
就係爭個防震，同埋渣手位比較窄。
對上有隻$7770，爭兩倍價錢就係因為夠輕身。
仲有$2540，係可摺系列size最大，同普通單車一樣。
本來想買呢架，但考盧到阻訂同難以上公車而打消。
買左番去就即刻去附近d公園o既單車徑試車，
哇，條路好窄！絕對唔適合初哥，踩得勁辛苦，
又阻住其他踩者，咁去單車徑以外o既地方踩啦，
發覺好多都有牌列出唔比踩單車，過份！
咁大o既公園都唔踩得可以係邊度踩？踩馬路？
我仲係新手邊敢踩馬路，咁即係唔洗踩啦？
港島區洗唔洗咁拙拙迫人呀？踩個單車都唔比？
所以話係港島區長大o既人多數唔識踩單車係正確o既。
衣家真係有d後悔買，後悔在驚有可能得物無所用。
呢幾日再物識一下附近有咩好地方可以踩啦，
真係無o既話可能都要將架單車賣出去...