馬俊偉表現唔出大將之風，尤其唱大戲果陣，一d豪氣都無。
(不過TVB係得呢d貨架啦)換轉胡軍去做即刻唔同晒啦。
故事講聶多寶走去投考御前侍衛，幾經辛苦終於做到，
得到裕親王扶助，上位上得快，升到御前侍衛統領，
聶多寶發現自己身世同太皇太后有不共戴天之仇，
打算同裕親王聯手對抗太皇太后，裕親王一直想謀朝篡位，
不擇手段，聶多寶已經睇唔過眼，但都照同流合污，
納蘭告知聶多寶養父母自盡真相係裕親王背後疏擺，
聶多寶同裕親王反面(其實我比較想劇情係由始至終都無反面)
單係op已經劇透得很，就知聶多寶會同裕親王反目，
裕親王想殺聶多寶不果，多寶又以先帝遺詔要求同裕親王再合作，
其實就係想扇佢一棟，等佢篡位後先黎拉佢落台。
結局果兩集擺明趕收工咁，之前太皇太后驚端敏格格係假冒，
又要滴血驗親又要睇胎印，但聶多寶話自己係四阿哥，
太皇太后唔驗血都信晒仲要七情上臉，咁兒戲。
裕親王想做皇帝就唔比，但區區一個多寶做王又唔多反對？
其實真係好格硬來，裕親王d兵馬已經包圍晒紫禁城，
基本上有幾多理由反佢都無用，突然納蘭趕來救駕又比佢救到，
搞咁多野祈萬昌o既父愛又係假o既(所以多寶唔報祈家仇？
最尾都要無厘頭整死紫凝，懶係要悲情咁。

呢個字通常用黎評價部機(手機/相機/電腦等)值唔值呢個價錢。
睇到本女性雜誌，一個手袋兩萬幾，對鞋八九千實屬等閒事，
見到條迷你裙七千幾，心諗值唔值呀？！
d相機器材賣七千幾，階因有精密o既零件、機械、高科技o既結晶，
一部咁輕薄o既手題電腦，可以上網、睇片、玩game做到咁多野，
其實諗落都幾神奇，不得不配服科技o既發展，賣七千幾都值。
但一條迷你裙，拎塊普通布車埋，比埋佢有極靚o既cuting啦，
賣七千幾唔覺得過份咩？著左識飛咩？
買番同一塊布，自己跟番佢車條一模一樣o既都唔係話唔可能，
掉番轉，要自己整部一模一樣o既相機係無可能。
甚至響街市廿蚊都買到條差唔多款，最多布質同車工差d。
d手袋用咩鱷魚皮造賣咁貴算啦我唔怪佢，話晒鱷魚皮都珍貴，
但條裙唔係鑲金架，點解可以賣咁貴？真係願者上釣啦。
幾百蚊個ANS袋又係裝咁多野，幾萬蚊個miu miu袋又係裝咁多，
為左果份虛榮心用多一百倍o既價錢，好威咩？
唔計果d月入幾萬o既，節衣縮食用幾個月糧買個袋就真愚蠢。
再講，我從來都唔覺得女人帶名牌袋係靚或有品味，相反，
係覺得佢將港女、公主病、虛榮、大洗等字刻晒響個額頭度。

呢套唔係咩野新番，只係因為負責分鏡o既係新房，
睇過廢怯小圓後見識過新房獨特o既表達手法，
想睇睇佢其他作品，就係咁樣睇左化物語動畫。
呢套o既新房風格更濃烈，就算唔講係佢做一睇都認得出！
全套野靜態圖片可能比動態多，係佢先夠膽咁玩！
(其實到左廢怯已經收歛左好多，做到恰到好處)
睇左頭幾話後竟然比戰場原黑儀果種氣質傲嬌深深吸引！
所以追晒落去，又再一次證明一套受歡迎o既作品，
唔一定係要故事好，只要角色夠吸引一樣掂！
甚至覺得如果無左戰場原全套野已經失去叫座力。
戰場原有別於釘宮式傲嬌，極高EQ控制情緒，
淡定、臨危不亂，無野可以令佢激動(除左見到蟹果集...)
甚至裸露於人前亦唔會面紅，同Saber相似。
仲有無感情照稿讀o既「嘿嘿嘿」同扮驚訝都一大萌點。
單係睇戰場原同亞良良木o既對話已經好enjoy，
(部份幾集係對話同靜態圖片佔左90%時間...)
男主角基本上係上條當麻格(唔好意思我的確先入為主)
整套動畫無路人出現過，都係d帶左安全帽o既紙牌，
學校亦好似得佢地幾個學生咁，甚至全個世界都得佢地幾個咁，
除左小忍外有出場o既角色都有對白，
造出角色鮮明，亦係此作特色之一。
只係15話已經有5個op咁多！製作組真係幾落本。
(pps得12話，害我最後3話要係極唔穩定o既56.com睇)
睇番wiki話之後d偽物語、花物語、傷物語都無乜戰場原，
可能無力追落去...(動畫化先再考慮啦...)

一向都唔睇開港漫，亦無睇過半本龍虎門，
見無線播電影版就睇下啦，到中段係打得幾型o既，
馬坤遇襲果度，佢除條頸巾綁落隻手幾型，
動作一氣呵成無多餘動作唔洗考慮點樣綁，
正常人都要諗由左邊跨過去定右邊攬過去...
然後咩野棍妖老妖企o既甫屎都好有台型，
火雲邪神渣住龍虎門塊牌單手打元華都蕭架，
可見套野d動作真係度得唔錯(梗係啦又元華又甄子丹)
不過尾段d金鐘罩獨龍轉就有d惡搞，
fing fing下雙折棍fing到有團氣圍住自己，
已經唔係拳來腳往o既打鬥啦，表演魔術咩？
王小龍仲識降龍十八掌，囧左，咁有無獨孤九劍？
尾段劇情又係好似周星馳d《食神》、《功夫》咁，
練一日就即刻神功蓋世打贏大佬，
一早搵奇俠教武功咪天下無敵囉，開間龍虎門托咩？
一係話佢地苦練十幾廿年再去報仇都好d丫~

女人行行下街拎個鏡盒照鏡補妝就天經地異，
男人都要照鏡架，睇下個髮型有無亂到。
奈何無乜鏡合係for男性用...sosad
行過潮特或格仔鋪睇鏡一係粉紅色一係就心型，
點敢拎出黎用呀？早排小弟就搵到明治朱古力鏡盒，
算係夠中性，最近見到以macbook air造型鏡盒，更man！
男人拎出黎絕對無違和感，d人最多以為係火機(?)
造功相當精緻，keyboard、USB插位都整埋，
不過唔平，差唔多五十蚊個。