亞媽經常都想我做份實Q工，話乜都唔洗做番工等放工好爽，
我就係唔想做呢d等發呆o既工，好浪費時間浪費人生o既感覺，
又學唔到野又悶，寧願做份由朝忙到晚o既工感覺充實好多。
邊有d亞媽想個仔做實Q架？真係丫~ =.="
趁仲係廿字頭，我好想跳出出版社呢個框框，
可以做埋inhouse design或者production house，
擴闊自己o既工作範疇，起碼雜誌做唔掂都可以跳去廣告公司，
廣告公司做唔黎又可以跳番去做雜誌，多條出路買個保障。
如果衣家做實Q、店務員、侍應，咁就一世啦，轉唔到出去啦，
調番轉，呢d手版眼見功夫，幾時做都無話唔得架，
做開設計唔做都可以做些粉，但做開些粉唔做無可能做到設計。
慶幸地我身處係一個無乜負擔o既家庭(雖然唔係有錢)
仲可以簡工做時盡量淹尖一d，我知有d人唔容許簡工做，
全家等緊佢開飯，佢只可以一心賺錢養活頭家唔到佢諗咁多，
所以見到有d人廿歲做執貨做到三十歲，咁就一世...
一過左30歲d老細就唔想請個咁o既新手黎學野架啦，
請個廿歲arm arm畢業o既細路可以壓價聽教聽話又好恰。
樂觀d諗或者草草埋埋搞生意囉，不過衣個時勢創業？算吧啦。

1989年宮崎峻o既動畫電影，相信好多90後o既人都唔多有印象。
係最近練緊彈風之丘(日文明明叫海の見える街唔明點解叫風之丘)
所以專登開番黎睇，不過首歌只係kiki飛緊出城o既一段小插曲。
睇落個故事完全無印象，應該以前都無睇過...
故事講述巫女界有個習俗一到16歲(定13歲)就要出城市住一排，
咁kiki就飛出去搵個城落腳，有間麵包店主收留佢並聘用佢做速遞員，
然後運下貨，結交下朋友，又救下隻貓，又整下餅，又病下，
都係d鎖碎野串連埋，感覺好小品o既治癒系劇情，有遺大作之風，
係最尾勇救個男仔叫做大陣丈d...
整套戲洋溢住溫馨o既氣息，陌生人亦無乜居心熱情款待kiki，
比d小朋友睇完以為現實世界真係咁和諧就比人賣豬仔都唔知咩事。
都有d bug位，魔女話要買電話，店主話比個電話佢用，
但都好似無真正用過，最後都係寫信比佢屋企人，咁要電話做乜？
自kiki魔力減弱後，即使回復番，隻貓無再講過野...有d冷情。

真係懶去結識朋友，以前曾經有過積極咁擴闊社交圈子o既諗法，
多個朋友多個照應之類，衣家真係無左果份熱情。
有d人我當佢朋友佢當我路人，係facebook留個言當睇唔到，
(之後有出最新狀況，係無回應人)我真係諗，呢d人識黎做乜？
有d人識左十年，都只係響MSN講幾句，有d直情hi佢都唔回應，
再講，MSN有幾十人on，又有幾多個會主動hi人丫？
我唔相信呢d人仲有機會可以有乜發展空間囉，講真，
唔通真係過一排會約出黎飲茶咩？有時真係咁諗過，
touch wood難聽d講句，可能到佢就死果日都只係響MSN講句bye...
本來相識亦是緣份，隨住網絡發達，呢種level o既朋友越黎越多，
響facebook、響online game、響forum、響chatroom，
只令d人更加唔去珍惜朋友，我keep住同d人contact，
到頭來連facebook都del埋，之後add番佢換來一句「你是誰？」
有d女仔，每逢生日個facebook過百句「happy birthday」，
我都懶得加多句，反正我敢肯定邊個無同佢講佢都唔會知道。
呢d人更加唔可能會珍惜朋友，佢覺得d人同佢慶生係理所當然。
不過我唔會del人，因為我都被人del過，真係有d火，
枉我當你frd你del我？我d網絡社交工具唔多人，邊個del我一目了然。
經歷過一次又一次o既洗禮，你叫我點會唔疲累丫？
我亦都明白點解有d人MSN或facebook得幾丁友，佢地一早睇化左。
好在，都仲有少數知己，亦有一d會keep住約出黎飲杯野o既好友，
所以話，係朋友o既就係朋友，果d識左幾年都唔彩人就算把啦。

只係今個禮拜就見兩份工，今次去柴灣工廠區見工，
雖然地段係近但唔方便，巴士落車後要步行一大段路先到，
或者會有其他更近目的地o既交通工具我唔知...
個老細幾好笑容，又話做Game書幾好玩又盛，又問有乜興趣，
又話自己以前開影樓...
而公司規模唔細，入到呢間應該拎到唔少寶貴經驗。

衣家先黎講呢單野應該有d過氣，不過都好想講幾句。
當年某小超溝到isabela好似好幸福，
但我一d都唔覺得幸福...(並唔係唔抵得
isabela係真正愛某小超丫？定亦或愛佢d錢？
衣家分左手，isabela穩袋30益，30益呀！
3益都夠用一世有突啦。(我諗好多人一世都用唔過千萬添
我經常諗好似我呢d咁平庸o既人得到一段戀情，
個女仔真係鐘意我先同我一齊，因為我唔靚仔又唔有錢，
呢d就真真正正o既幸福啦！(當然現實歸現實幻想歸幻想
雖然我唔排除有錢都有真愛，但相信幾難分得出係咪真愛，
甚至乎條女痴埋黎話係真愛，個有錢佬都唔會信啦。
唔好話愛情，友情都變得模糊，曾經聽過某集團太子爺，
佢經常認為痴埋佢身邊o既人，都係為左係佢身上拎著數，
變得更加唔信任人(除左d同佢同level o既有錢人...
好似我呢d咁，可以毫無顧忌咁結識朋友，亦係一份自由，
其實含住金鎖匙出世o既人都未必真係咁快樂，
心靈上或許好空虛。