原來下面漏水投訴到食環處，尋晚又有聲稱食環處o既人員要求入屋調查。
我咪問漏水又關食環處事？佢話佢係食環處漏水辦。(咁o既部門都有？囧rz
食環處都黎得，聽日又會唔會有漁濃處或者電檢處o既人黎拍門......
查實下層話漏水果個部份都係僭建，遲早都要清拆，潛建野漏水有乜出奇？
程序上要拆左上層先輪到下層佢地先未拆，衣家有多兩間房佢地用已經賺左，
條友睇過之後都話如果查明係僭建部份係唔會跟進。

(呢個文章分類真係放係食環處呀？ 囧)

見我blog都係以drummania做id，頭像後面都有部鼓機，就知我係好dm啦。
我唔係打得勁，不過真係鐘意玩。近年少玩左，主要係好多機鋪驚死你偷棍，
每次要比廿蚊按金租佢枝爛鬼棍，我又唔帶私家Q，出街兩手空空無袋，
唔通插係褲袋咩？本來手痕想打兩鋪過下手癮，要做多個步驟大大減低意慾。
租左棍要還棍拎番按金，有時枝棍租左比人又要等條友還番枝棍先有得打，
如果條友白木，跟左佢機唔肯比棍你，用手打呀？無棍咪唔玩囉，邊個損失？
dm已經越黎越少人打啦，仲整埋d咁反智o既制度趕客？要吸引人打機，
就係要方便丫嘛，即慶散紙包有幾個一蚊埋位入錢就玩玩完就走先係正路。
灣仔機城就識做呢，大方咁放晒d棍係度，所以我都打左幾鋪。唔單止咁，
d鼓版質感好好唔痴棍，踩掣鬆得黎又唔會食左落去，打起上黎好輕鬆，
比平時用少左力水，唔錯。不過只打V6($3)無打到V7唔知部V7係咪一樣咁好。
美中不足o既地方係V6偏細聲，比V7 d聲音蓋過晒，聽唔到聲就無左節奏感，
真係睇note黎打...
另外又手痕打左兩鋪KOFXIII，之前見人地開到練習模式，我都唔知點開，
就試下o禁晒4個掣再o禁start，哈又真係開到練習模式喎(會唔會本身係咁？
個練習模式可以打7分鐘，無限氣2P企係度無限血比你任折磨打。
其實呢個mode都幾好，總好過打電腦，練完d招施展係玩家身上係好有滿足感。
跟住見人又開練習mode，我試下對面挑機，原來都係可以強制比人挑o既...
仲諗住呢個系統可以保障d新米唔洗比人拔苗，你有你打佢有佢練招。
唔似得街霸4，入錢都唔一定挑到對面，真係你有你打佢有佢打。

仲嫌香港設計學校唔夠多？十年前設計呢個行業已經飽和，
僧多粥少o既程況下，人工不斷下調。
曾幾何時做設計都幾風光，衣家只會同低收入人士畫上等號。
設計行業向來吃力不討好，每日無OT錢o既超時工作係行規。
香港矢口磚一年容納6500名學生，米玩啦，1日都無1個職位空缺，
一年比盡你有365個職位空缺，即係17個學生爭1個空缺，
喂米住，未計其他設計學校o既畢業生喎，
仲有歷屆讀過設計/從事過設計行業o既失業人事呢？爭崩額頭啦。
一上矢口磚個官網，睇下佢個介紹，做乜d字痴晒地？點讀？
整篇野出黎人地讀唔到叫乜野設計呀？

仲話耗資12億興建，政府有錢唔該做福下社會啦，
每日港鐵金鐘站乘客超出列車上限幾倍，連續幾班車都上唔到車，
好心開多幾個月台整多幾班車啦，做乜整間設計學校出黎一獲熟？
蘋果日報仲批評勞斯萊斯級校舍華而不實，整d V柱阻住人行路，
男廁品字尿兜迫窄，納稅人d錢就係不明不白去晒呢度囉。

d中學生讀完中學係又走去讀設計唔係又走去讀設計，
設計畢業生只會一年比一年多，但設計行業唔會一年比一年多，
今年得十本雜誌下年唔會有二十本雜誌，最多會有五本執粒，
又有五本新o既雜誌走出黎，結果都係得十本雜誌。
d老細唔會因為多左設計畢業生所以開多幾間廣告公司架嘛。
香港又無乜生產業邊洗咁多設計丫？
以上言論只針對政府開設計學校o既令設計界無啖好食o既做法~

不出所料今集真係講呢單野，話說9月9號雷電交加o既晚上，
天文台接獲多宗目擊UFO個案，有人影埋相係facebook forward。
而且當晚錄得2萬幾次閃電紀錄(又有人話係UFO閃出黎...)
香港好少可發生呢D咁巨話題性o既神秘事件，唔講呢個講乜？
唔單止摩星嶺4號，連潘兆聰o既恐怖在線都係9月10號果晚有講。
我個人就唔多信張相係真o既UFO，我都認為係燈柱反光，
在下都試過影到因為反射而造出黎o既鬼火相片虛驚一場。
影得相多發現呢種現像經常出現已見慣不怪。
而天文台o既人就以理性分析，話其他個案可能係咩野LED風箏，
雲海就話落緊大雨起唔到風箏，就算飛緊都比D雨水打番落黎。
計我話，雷電交加邊個夠擔死放風箏？唔驚比電電親？
又話可能係球狀閃電體，呢個真係幾特別o既天文現象喎。
仲有一個唔尋常o既現像，就係港鳥區無乜行雷聲，呢個真喎，
D人係facebook都講到佢果邊行雷點勁點勁，我呢邊無乜特別，
又無狂風暴雨，最多閃幾下黎一個細響聲，通常齋閃無聲。
半題外話，節目提及近年較多o既UFO現像，就係隱形UFO，
即係只聽到聲而睇唔到實物，話外星人都廢事比藍星人睇到。
咦呢樣我真係有疑似個案喎，試過夜晚係屋企聽到d奇怪引擎聲，
果刻都有幻想過係UFO停留係半空產生，望出窗外乜都見唔到。
幻想姐，好玩丫嘛，當然我完全唔認為係咩野UFO發出怪聲，
只係唔知d咩野機器運作發出呢d聲，不過奇在唔係經常發生...

話說尋日個裝修佬無黎，佢o既解釋係因為落雨(一滴雨都無囉)
今日佢黎整，我全日就沐浴係噪音之下。開頭預計3日完工，
不過到6點收工只係拆左五份一表層o既石屎，入面仲有鋼筋...
一袋袋o既石屎碎搬左出廳，堆積左十幾袋，唉，3日？好難Lu∼
夜晚落雨，樓下單位投訴漏水，實Q走上黎嘈，仲話要報警。
又話要出去搵d咩野遮住先，佢都傻o既，出面濕滑一叉錯腳就係咁先，
唔好話我，就算搵番個裝修佬都唔會同你做，報警都無用架啦，
佢點都要崖一晚。不過條友都有病，原來連朝早裝修嘈佢都要投訴，
不過無人理佢之嘛，如果佢嘈得成，我諗以後都無人裝修到。
連日黎落雨，個工程又要一再押後，禮拜日又奉旨唔開工(行規)
都唔知要幾耐先完工Lu∼