她是我心目中最完美的女神，多年來我每一天也想著她，
要是能跟她在一起，我願意放棄一切。
要是能跟她在一起，我希望能夠永遠永遠。
要是能跟她在一起，我絕對不再看別的女孩，
因為這世上已沒有人比她更完美。
或許，在其他人眼中她只是一般的平凡，談不上漂亮，
可是我不知何時開始審美觀念已經由她來定位，
她是100分，越近似她的人越高分，沒有比100分更高的人。
當然不只是外表，不論她的性格、她的習慣、她的言行舉止、
她的嗜好、她的一切一切都在我心目中都是最完美。
面對著她有一種莫名奇妙的壓力，
也從來沒有人能像她這樣影響我的情緒。
跟她相遇某程度上是不幸，我漸漸對別的女孩沒有興趣，
只可惜，我又不能得到她，既然不能得到她我寧願從不認識她。
無可否認，她的男友絕對是這世界上最最最幸福的人！

今日又收到由屋宇署寄黎o既信件，內容係接獲投訴指我地屋企唔合符標準。
邊鬼個得閒去投訴呀？d街坊咁得閒咩？如果要動工最大得益咪就係裝修商囉。
據從事裝修業o既人透露，佢地係會得閒周圍去搵一d唔符合規格o既建築報寸。
如果唔製造問題佢地又邊有工開丫？無賊警察就失業，無病人醫院都執笠。
拿！如果出現問題會危害他人當然要及早處理啦，不過我地唔係坐視不理喎，
早幾年已經收到通告要整呢樣整果樣，我地已經搵師傅裝修過拆o既都拆晒，
衣家又話有問題？咁即係之前個師傅未能夠妥善處理結構問題啦，
咁屋宇署怪罪落黎係邊個o既責任？錢我地又出左啦，我地亦唔係專業人仕，
無讀過建築，整完仲有無問題我鬼知咩？

適逢農曆七月十四，發生左一件舉國震驚o既菲律賓挾持事件。
全日各大公眾新聞組、facebook o既朋友都係討論呢個topic。
事緣一名前菲律賓警員門多薩因不滿被無理隔職挾持康泰旅遊巴要求復職，
但談判破裂，流血收場，犯人被射殺，有9名香港旅客不幸遇難，
以及幾名旅客受傷。
網上亦流傳唔少黑幕，其中指門多薩起初飾放老幼婦孺可見非冷血之徒，
犯人目的為求引見傳媒，但當地警方居然拒絕呢個咁簡單o既要求，
當局為阻止其爆大獲不惜殺人滅口，更指其實香港旅客乃當地警方所殺，
混亂之下將殺人罪駕禍於門多薩，咁就殺犯有大條道理。
又有拍得其中一名香港旅客靠近車窗被警方錘擊至死，
犯人企響車頭玻璃位置被警方亂窗掃射同時亦傷及香港旅客。
據報導旅遊巴司機衝出黎發佈車內人質全死，亦有陰謀論說法，
究竟司機係咪講呢樣野只有警方先知，不過發放假消息，
係為左方便警方唔洗顧及人質安危o既無責任行動。
至目前為止真相仍未確認，或等待當事人質進一步憶述事件經過。
從新聞片段睇到當地o既特種部隊相當姐手姐腳，縮埋係下面，
尤其掉枝營光棒入去做乜？中秋節呀？又掉唔入又執番再掉入去，
用繩索綁住車門企圖拉開車門，之後又將條繩拋開一邊，想點？
不過網民指菲律賓唔重視港人性命，一D都唔出奇o既，
菲律賓人一直做香港人o既傭工，覺得香港人平時高高在上踩住佢地，
自然對香港人恨之入骨啦。
網上流傳一張一班菲律賓穿著校服女學生於案發現場集體歡笑合照留念，
就好似參觀D咩名聖古蹟到此一遊咁，咩心態呀？
唔少港人憤言要杯葛菲律賓人，聲稱見到賓賓有衝埋去中佢幾拳o既衝動，
借題指出菲律賓民族o既低劣、腐敗、無能，更要求中國出兵攻打菲律賓...
班人又偏激左D，不過相信D菲傭到街市買菜難免會比菜販及街坊指指點點，
種族仇恨就係由呢D事萌生，我覺得又唔洗一枝竹打一船人o既。
不過菲律賓都算，居然有華人於facebook發表「死o既人數少過盒麥樂雞」，
及有國內女生於blog表示「仍有香港旅客未死感到失望」，更令人震怒！

由在下親自操刀o既地獄少女私影，
特別嗚謝Melody Wong抽空cos閻魔愛，一個仙都無收。
地獄少女呢個題材真係好好玩，好多野可以發揮。
今次o既人像攝影有別於一般龍友o既大光圈散景相，
燃燒我o既設計魂，以photoshop迎造出盡量忠於原著o既氣氛。



那是固意造出偏紅的效果，閻魔愛在另一個世界都是偏紅色的...









整個系列都彌漫著曼珠沙華，固此放了一些在圖內。



拉開紅線的一刻 ，你的怨恨 ，我們已收下了。

	呢隻卡樂B薯條味道就好似M記果d薯條翻炸咁，非常好食。 不過差唔多10蚊兜，食兩野就無，唔多化算。
	後來見到呢隻卡樂B桶裝薯條，size同品客薯片一樣， 諗住有排食啦，係就係幾come食o既，不過隻味唔係上面果隻......
	而係似呢隻薯條，本身都唔貴，幾蚊包都幾come食。
	講完卡樂B又講下Lay's薯片，呢樽野，驟眼睇似潔廁劑、洗潔精， 可以渣住枝清潔用品食喎，咁得意，咪買兩罐試試。 一枝原味一枝洋蔥味，都13蚊枝，之前又未食過Lay's d薯片。 點知佢d薯片勁厚，薯片緊係越薄越有口感架嘛~ 洋蔥味同品客果隻無分別，口感就係品客好好多。 (袋裝Lay's薯片又唔同味喎)

個人最鐘意薯片排行榜：
第一位：卡樂B燒烤味薯片(應該算係原味，我無見過卡樂B真正o既原味)
第二位：卡樂B熱浪薯片(話就話辣味但一D都唔辣，恰到好處)
第三位：卡樂B咖喱味薯片(其實頭三位o既水準都一樣級數)
第四位：品客洋蔥味薯片(品客其他味就麻麻，而且比其他牌子熱氣)
第五位：珍珍燒烤味薯片(其實似卡樂B隻燒烤味，不過珍珍硬係有d濃濃地)