又一套歷史人物女體化o既動畫，老實講我幾討厭咁樣o既惡搞。
尤其是類似一騎當千、戀姬無雙呢類將三國人物女體化仲要H，
大佬，唔少華人都拜關帝架，道教六壬門亦有拜諸葛孔明，
唔該尊重一下人地宗教，玩還玩唔好拎人地供奉o既神靈黎玩！
呢D行為等同泄濁神靈！一騎當千只係揭過幾頁已經爆衫露點，
我唔知仲會惡搞到咩野地步，戀姬無雙值情睇都無睇過。
日本仔要惡搞就拎日本史黎惡搞啦！我無意見。
呢套百花繚亂就惡搞日本戰國史，將真田幸村、柳生十兵衛、
服部半藏等人物女體化，唔少得H，好似係一騎當千班底製作。
不過惡搞日本史亦唔係咩新鮮事，新撰組女體化都有幾套，
諗深層唔覺得呢d惡搞好噁心咩？明明係彪形大漢、豐滿o既肌肉、
一口濃密o既鬍鬚，居然變做萌女？咁都萌得落咩心態呀？
無可否認女中豪傑確有一定o既魅力，但唔該用原創角色丫！
再唔係講貂嬋、大小嬌、王月英幾好抽都得姐(KOEI三國無雙正是)
吞食天地、三國戰紀、三國無雙等以三國題材o既作品我唔太反對，
武將本來應該威風凜凜，硬要放入巾幗英雄寧願佢原創角色。
講開又講，本來覺得Fate/Stay Night入面o既Saber唔錯，
不過後來得知Saber係亞瑟王女體化後亦無乜好感了。

是日跟呂師傅、Holly、兩位武當道長到東莞茶山拜會東岳廟主持，
5:45am已經起身，訓得兩個幾鐘，7:15am係九龍塘火車站跟佢地會合。
過關後答廣深鐵路和諧號，乜原來衣家國內o既火車興送蒸餾水？
車飛係一張印有磁帶o既紙張，可以好似八達通咁o都落個sensor度。
車廂內格局高尚，不比飛機差，或者通車唔耐，所以keep得幾新淨。
一出車站就比乞衣睇中，乞到我地接的士。d乞衣真係幾影響社會形象，
D遊客見到會點諗？「哇，乜呢個城市咁陰公呀？」印象大打折扣啦。
抵達茶山東岳廟，地方大係預左啦，但古唔到廟宇有遊樂場有餐廳，
雖然唔算華麗，遊樂場亦有頹頹地o既感覺。
據主持講茶山名字由來有段故，相傳以前係叫賊山，今取其諧音。
大陸人興係茶機洗杯，茶機設有排水系統，倒瀉水都唔怕周圍流。
食過飯後，我地到Daniel o既製衣廠打下牙較，並等黃景燊過黎。
吹水得知東岳廟一D典故，相傳以前廟門有兩隻白馬石雕像，
村落不時有白馬出沒偷食農作物，有日村民用棍痛打偷食o既馬腳，
之後發現廟門o既白馬石雕像其中一隻腳爛左。係真係假無從稽考。
當然理性分析最多只係有人唔小心整爛左然後作故仔......
夜晚係廣洲o既KK通知廣深鐵路停駛，差D可能要係大陸訓一晚。
得到黃景燊協助，開左兩個鐘私家車送我地到廣洲火車站同KK會合，
到廣洲後列車服務恢復番，好在有帶人民幣，買飛時係唔收港幣。
回程時發生左件趣事，Holly係火車訓教，有個細路係走廊跳黎跳去，
跟住Holly彈起身指住個細路大聲鬧「跳_完未呀？！」勁好笑！
我諗個細路唔係香港人，應該聽唔明，不過都無再跳。
其實東莞同廣洲城市格局都幾似印尼雅加達，係印尼文變晒中文字。
不過聞說治安唔好，而且內地人啤啤貢，好多時我都唔敢舉單反影相。

尋晚同舊朋友傾電話(1年總會搵一兩次)得知佢衣家係G-zone做排版。
曾做過同行o既我當然好多野交流，但估唔到佢曾任職廣告公司多年，
然後自己搞網上拍賣做埋老細，今時今日會做番轉頭做二打六。
眾所周知排版呢行吃力不討好，工作時間長兼人工低，點解佢肯做？
原來G-zone係一個禮拜番四日半，哇蟹∼工務員都係五日制炸播！
唔單止咁，佢地仲要係番下晝1點幾，食完Lunch先番工。
唔係senior人工都八千五，係行頭內有咁o既待遇算係一份優差啦。
就算果幾日要通頂，辛苦過後都有兩日假期補番數完全唔同講法！
當然做過呢行都明白，所謂番半日，都係當佢無算啦。
唔計呢半日都係行五日制啦，無乜問題。
可能亙動媒體太刻薄啦，先會覺得佢o既待遇唔錯，聽日要去東莞，
後日send份求職信去G-zone碰碰運氣先。

跟一位blog友提起呢個少年JUMP LOGO，我非常欣賞，順便在此同大家分享~
從正面睇係一個獨眼海盜船長，但只要扭45度就係萌少女o既側面。
意味住少年JUMP既有熱血o既少年漫(海盜)，亦有萌系o既少女，妙呀~

講起LOGO，從事過design行業o既我，對於商標設計有一份執著，
覺得LOGO總要同機構有密設關係，有concept，例如舊時香港電訊LOGO，
係三條白線"T"字覆蓋落個圓球狀，意指線路覆蓋全球，T代表Telephone。
中國銀行LOGO，一個銅錢中間有個「中」字，銅錢同銀行亦相當貼題。
東亞銀行都唔錯，個LOGO係個東字，東字中間藏左亞字，亦有覆蓋全球之意。
仲有一d純粹將機構名稱砌成圖案，意味無咁深遠，例如OK便利店、LG等。
不過有唔少LOGO係毫無心思，例如相機品牌Ricoh、Panasonic、Canon等，
只係用普通字體寫出，求其係電腦都打到出黎，我覺得唔算係LOGO囉。
眼見市面上亦有極多九唔答八o既LOGO，例如pccw果d一格格，Mosaic？
以前亞sir話pccw寄信比客戶，出LOGO要落彩色，因為LOGO係彩色砌成，
單色根本唔係果樣野，變相成本高左。又唔係靚... =_="'

由台灣FK Digital開發o既街機平面格鬥Game，畫風似Guilty Gear系列，
係G-zone單睇定格硬照覺得幾吸引，於是上Youtube search下片睇。
始終動作(姿勢方面)比較生硬，超必「親！」果一聲好似同KOF一樣，
點解d角色係講日文o既？台灣開發應該講台語丫~
歌都有得唱丫「全世界都在學台灣話，台灣人的話越來越國際化」
台灣話 http://www.youtube.com/watch?v=HH1ZrIrpAxI
據說開發商想打入日本，真係唔想潑冷水，從畫面、人設、動作黎講，
今時今日咁o既水準吸引唔到日本人囉，唔好話日本人，香港都難。
做得又唔係好過人，無乜特別，係日本花多眼亂o既遊戲界好難殺出一條路，
十年前做到咁o既質素就應該有得諗，搵番台灣人支持都OK o既。

再者，格鬥Game都逐催息微，就算係都玩高達果d啦，
衣家d友仔唔會記果d入力要求複雜o既「小跳打背重拳前輕拳八稚女」
高達黎黎去去都係前前後後o禁掣射擊o禁多幾下斬幾下。
無啦，街機市場都比online game取代啦，尤其香港o既機鋪變晒賭場，
咩野角子機老虎機廿一點，都已經唔係果陣時o既氣氛。
CAPCOM隻SSF4都只出落家用機啦，又係o既，家陣家用機挑機咁普及，
以前就話有隻Game都要請朋友上屋企先有得大戰300回合，
衣家上網就可以挑世界各地各路英雄，仲洗落機鋪挑機咩？
CAPCOM仲賺多左添，以前賣塊底版比間機鋪，賺左底版錢果筆，
之後有100個人定一萬個人入錢都係機鋪落袋，擺10年8年都唔關CAPCOM事。
衣家CAPCOM賣隻Game比玩家直接賺玩家錢，100個玩家買CAPCOM就賺100個，
十萬個玩家買CAPCOM就賺十萬個，d錢仲洗鬼過機鋪呢個中間人？
玩乜鬼格鬥Game丫？都係開facebook去人地個農場偷下菜算啦。