呢次係唔知第幾次發中學o既夢，始終覺得讀書時期係人生最美好o既光景，
無憂無慮享受青春，雖然生處其中往往察覺唔到，離開校園後先會懷念。
個夢發生係禮堂，校方好似搞緊d歌唱show，請左好多名星黎獻唱，
(其實Yes!經常搞呢d活動，不過讀書時期未曾係我校發生過類似個案)
居然有名星唱左我填詞o既作品，巧開針，即刻拎我部N79(手機)拍低影片。
(我讀書果陣d手機莫講話拍片，影相都無，當時o既手機連彩mon都未有，
衣家o既90後真幸福，可以將校園生活o既一點一滴保存落黎)
中學時期o既我一向都係填詞能手，能夠比果位歌星唱番相等再一步o既認同。
不過我從來唔追星唔崇拜偶像，所以會發呢種夢都幾匪夷所思。
今時今日都慨嘆懷才不遇，無乜人賞識(唔係無o既，唔多囉...)有感而發吧。

好耐無開過FEZ，唔可以靠patch update，要重裝過，
一登入揀人畫面空無一人，做乜同我del晒d角色呀？！
雖然之前個紀錄都唔算好勁，但都耗左唔少時間去升，
仲有套法利亞裝、妖耳等(買唔番...)，通通都同我清晒？
衣家又要由0開始玩過？搞錯呀！彩佢都有味！
(唔知點解所持寶石仲有624未剷...都係之前剩落o既)
我瑪奇夠好耐無玩過，d人都仲係度啦！

以前曾經都試過，發左幾個鐘夢，可能現實只係過左十分鐘...
就呢個point我假設左一個理論，夢境係唔受時空限制...
坊間亦流傳過一個實驗，幾個人o禁住實驗者心口令佢短暫休克，
過1分鐘要設法整醒佢(唔係會有生命危險)實驗者會發左一個長夢，
可能係去左主題公園玩左一日，但實際上時間只係過左1分鐘。
講番潛行空間，當初係比天空同地下都係街道o既電影海報吸引，
呢套戲就係講夢，題材相當嶄新，講述利安納度能夠控掣夢景，
可以潛入人地個夢入面盜取機密，稱之為潛盜。
然而當時人亦有防範意識，尤其是達官貴人更接受過防衛訓練，
有人入侵佢夢境會出現警衛將其驅逐，潛盜者突破重圍方能完任。
套戲亦設定好多理論，如上面題及o既發夢1粒鐘現實1分鐘概念，
人o既大腦係發夢時會比平時轉快唔知幾多倍所以先有呢種現象，
而且仲有夢中夢、夢中夢中夢等，夢中夢腦部比發夢再轉得更快，
所以透過多層夢更可以做到一瞬間過幾十年o既效果。係講得通o既，
不過有無科學根據就不得而知。
夢往往係中間插播，例如個夢係餐廳食緊野，你唔會諗起開始係點，
又點解黎左呢間餐聽。
每位潛盜者都有一個屬於自己o既圖騰(?)去分辨果度係現實定夢境，
利安納度o既係一個陀螺，係夢入面會不停轉，但現實就唔可以。
當夢境中死亡就即刻醒番。不過潛盜者利用鎮靜劑令目標訓得更耐，
而呢個狀態之下係夢境死亡亦唔能夠醒番，會進入深層混沌長眠，
系統就講住咁多先。
不過利安納度有一個心魔，就係佢o既亡妻小梅，佢一直念念不忘，
試圖以夢素造小梅出黎延續愛情，而呢個小梅不斷係任務中倒亂。
觀眾當然一頭霧水，不過到末段先交代一切。
原來當初利安同小梅一齊發夢，係夢入面佢地好似神咁要乜有乜，
咁爽所以抽離唔到夢境，係夢入面過左幾十年。不過番番現實，
小梅都分唔出係現實定夢，諗住死可以醒番咁就真係死左啦。
最尾爆出原來利安試過向佢妻殖入意念，所以小梅o既死佢都有責。
故事重心係講佢地進行有錢佬齋騰o既任務，要向另一富商洗腦，
阻止佢聾斷市場。
潛盜者一行6人經過重重難關，又要扮目標o既熟人博取佢o既信任，
又要假裝目標o既守衛令佢自己破解自己o既加鎖等等，
到最後一切看似順利，利安納度亦得到佢想要o既回報，洗脫罪名，
同兒女團聚，然而佢o既圖騰仍然轉過不停...升字幕。
意味住利安納度或許未醒過黎，任務失敗，雖然電影無清楚交待...
留待觀眾自行腦內補元。
套戲可以話將好多好多野塞晒係個零鐘入面，所以絕無冷場。
不過打鬥場面有d混亂，雪山果幕幾乎分唔清邊邊打邊邊...

2003年的一套韓國電影，名不經傳，也談不上什麼大卡士陣容，
(宋康吴粉絲別打我)只是朋友向我推介，所以在pps看了。
故事圍繞著1989年兩名幹探在某村落調查連環變態殺人案件，
兇徒都是在雨天專挑穿著紅衣的女士強姦，再用她內褲罩住受害者。
其中一名幹探處事手法喜歡憑直覺，然後把疑犯屈打成招落口供，
另一位則相反，兩人合不來經常吵架。
原來當年韓國的鑑證科技有夠落後，屍體上發現精液也不能辨認出是誰...
經過一輪明查暗訪，找到最吻合的疑犯，卻因證句不足而不能起訴，
一向和平處事的幹探居然也想以暴力迫供，反被主張暴力的阻止，
原是狗咬狗骨的二人萌生出BL友情的萌芽。
最後還是抓不到兇手，我才記起電影開端已說了「兇徒至今仍未落網」，
鏡頭一轉就十多年後，幹探已經有兒女沒當警察了，一次從遊舊地，
再去當年發現屍體的坑渠探頭研究，那一幕鏡頭慢慢攝進去，
觀眾或會以為又藏了屍體什麼的，當然什麼也沒有了，一路人經過，
好奇問他在研究什麼？隨即又說有另一人也同樣地研究，升字幕...
留下樸素迷離的伏筆，究竟做同樣行為的人，是兇手？還是當年的伙記？
尾段表現得很有張力，這樣的結局比起破案還來得令人印象深刻。
完了又寫著改篇自什麼小說的，咦？究竟是真人真事改篇？
還是整個故事都是虛構？

朝早9點幾於上環信德中心同holly、大福、呂少會合，差唔多12點抵達澳門。
承蒙澳門狐仙堂堂主關照，是次行程包伙食。下午到檀香山食左個葡國雞飯，
聽聞檀香山係澳門出名o既食市，分店眾多。不過同行o既朋友似乎唔多滿意...
堂主家姐當場斥責職員凍檸水水位飽滿倒唔到糖水，holly又嫌咖哩汁欠佳，
此舉或許觸怒在場職員，4個職員企係counter啤行我地果檯。
可惜天公不做美，當日正值黑色暴雨警告。夜晚7點搞遊地獄(當然我唔玩 XD)
因天雨關係部份人士未能出席。10點幾變番毛毛雨，我地過去荒廢酒店靈探，
呢d唔係主題公園o既鬼屋，而係真正鬼屋，不過我地十幾人(連堂主朋友)入去，
都唔會太驚。酒店已荒廢多年，據堂主講多次進行裝修不果又鬧鬼云云，
一入去見到牆上有血掌印，極之詭異。又掛左塊鏡，團友更聳擁女士去照鏡。
內裡頹垣敗瓦，牆身爆裂、鋼筋外露、拆卸o既門亂放地下，仲要有尿味，
或者係d流浪狗所做o既。如無電筒入面係伸手不見五指，d梯級位一定睇唔到。
再行入去見一間間房，有d大房亦有半牆咁大o既鏡，d鏡唔少破裂。
走上2樓，不時都比天花版滴水滴中，地下亦一個個水潭，水位約達5mm，
感覺唔係恐唔恐怖係好唔衛生。3樓部份高處更無圍欄，一個叉錯腳係咁先，
真係無鬼都危險啦，所以都係落番去，有d房更有無人供奉o既土地神位，
個業主(?)乜都拎走晒剩係留個土地係度，想點？咁就決定響呢間房招魂，
點香燒衣灑溪錢過後，留一男一女坐係果間房入面，其他人出晒去。
基本上全程都無乜特別事發生，係鬼影幢幢，不過唔肯定係眼花定真係鬼，
感覺上人o既眼進入黑暗環境係好容易見到d黑影好似旭緊咁，又脹又縮。
比較靈異o既係有一野比d類似四隻手指擦過左臂，一望後面無其他人，
(前面o既人亦唔似可以咁樣擦過)我又諗係唔係天花版有物體脫落擦過等。
事後分享時部份團友話入某BOSS房感到壓力頭痛。
雖然咁多人入去唔算恐怖，但氣氛真係幾迫人，如果要一個人入去都米話唔驚，
是次活動又係一樣唔錯o既經歷。