向來在下都用倉頡輸入法，唔用速成o既原因係速成要打得快要死記一D無意義數字，
例如打個「的」字要打"竹+戈"然後o禁9，而呢個9就係死記無得解，點解唔係3號、
唔係6號係9號？「的」字都還好，又例如打個「倉」打左"人+口"然後要簡第3頁o既4號。
係o既，如果速成打得快係快過倉頡，因為好多字都係平均3個碼，倉頡好多要4至5個碼，
但要死背無意義o既次序有違本人o既作風。
倉頡所有碼都依照一套公式去拆，全部有得解，雖然都有部份撞字碼o既要死記無辦法，
例「困」字同「果」字都係一樣"田+木"，不過多數都係兩個簡一個，唔會有十幾個撞。
由於速成只係倉頡o既頭尾碼，識速成o既人未必識拆倉頡，識倉頡o既人就100%識速成。
係公司，我亦係活生生o既倉頡字典，所有同事有字唔明都問我XD，佢地就係用速成o既，
而且唔係新學中文輸入而係用左好多年玩Online Game、MSN，D常用字都打得滾瓜爛熟，
可惜工作上經常預到常用字以外o既字眼，一黎佢地無得背number而卡住左個速度，
二黎係連拆都唔識拆。
用慣倉頡o既人唔會有呢個問題，只要個字識寫就98%識打，有時唔識打係連點寫都唔記得。
唔係100%原因係有個別字用正常諗法拆唔到，例如「鼻」字，下面果個通常用廿字去解，
但倉頡*拆碼係根據電腦造字為標準，下面果兩棟係無穿o既，即係π字，所以尾碼係中字。
而「算」字下面果兩棟係穿o既所以都係廿字尾碼，不過呢d字都係佔少數。
倉頡其實可以隨時當速成用，有時打打下真係唔知中間果d碼點拆，打頭尾碼中間+＊，
例如唔知個「的」字中間果d點點拆，就打"竹＊戈"咁佢就出番速成o既選字比你簡。
不過打左咁多年倉頡，見到d字都已經唔洗再經過個腦去諗點拆，係反射神經咁自動拆，
想打果個字字隻手就自動做野，就算非常用字甚至未見過o既字唔識讀o既字都一樣，
階因大部份非常用字都係由常用字砌出黎，中文字係萬變不離奇中。
何解咁有興致講倉頡，本來係生活o既一部份，就好似周圍o既空氣咁，唔講唔覺佢存在，
係最近我有個中學朋友細細個(中四果年)就留學英國，差唔多早兩年先番番黎港定居，
英文差唔多係佢第一語言，中文輸入法對佢黎講已經無格值，而最近佢同我一齊玩MHFO，
深明白到唔識中文好難係遊戲立足，連開個quest都搵唔到人入，於是衣家先黎學打字，
經我適心(?)指導下，係短短幾日內已經能夠自己打到D怪名，火龍、炎王、魚蟹都識打，
雖然打字速度有待改善，衣家o既佢已可打到70% o既常用字，真係打唔到先用同音代替。
(其實MHFO已經算係一隻無乜溝通o既Game，d人有怪就打打完就走可以全日都唔洗出聲。
打緊怪果陣都無手打字咁滯，公頻亦甚少有人傾計，個個開quest洗頻一秒五六行點傾。)
咁先令我回憶番當初點學中文輸入，起初都係用小蒙恬手寫版，不過呢件野造功差劣，
當時市價百幾蚊塊，唔夠兩個月就壞1塊，前前後後壞左五六塊先開始同手寫版講拜拜。
當年有賴mIRC、ICQ差唔多一個月內就已經打倉頡打得好快。
(*唔單止倉頡速成，手機常用o既五筆輸入都係以電腦造字為準，所以拆黎拆去都拆唔到，
一睇番個電腦字o既結構先仿然大俉。好似個「次」字以為果撇係打斜，點知係打橫，
要用橫筆去拆) |
